Bubi bwa Yerusalema
16
1 Iyuki lya Yehowa lyavule kundi lingo nu lyatendile bunee: 2 “Lolesia Yerusalema bubi bwage. 3 Nu tenda bunee: ‘Yehowa, Mwiya Bwangato Bunsania, akutenda bubuno ku Yerusalema; kubutwa kwobe nu kikanga kyobe byatukile ku kisi kya Kanana. So abezaga muAmori, nu nyoko muHiti. 4 Nu ku misagu za kubutwa kwobe, ku bindi biwabutilwe, itutu lyobe talyasesilwe, aba ntwogezibwe mazi. Nu ntwabikilwe munkange, aba ntwakandilwe n'isusi. 5 Takuli liso lyakukwilide kyombo buno likukitile bunsania bwa bitondo bibino bya kyombo. Tondo wisilwe mu kalula, kubuno mutima wobe wasombilwe mu bindi biwabutilwe. 6 Nkungu zinatingile kwobe nu kukumona uki wibulubutia mu mikila zobe, gago uki wibulubuta mu mikila zobe nakubwide bunee: “Lama!” 7 Nakutalikide munago wobe anga bisugu bya mu isoa; witide kuba munene, wamonine kuba musoga nunse, mabele mobe makulile nu nzwili zobe zasile; tondo wabezaga mundulu, ntwabezaga na nsulu. 8 Nu nkungu zinatingaga kwobe kukulola, nkungu zezo wabezaga ukutundwa. Nakwanzide mupimbo wa nsulu zane nu kukukila mundulu wobe, ububo nakulumbilide nu kukita idagano nobe, u bukutenda Yehowa, Mwiya Bwangato Bunsania.
9 Ububo nakogezie mu mazi nu kukwengia nunse mu mikila nu nakubongezie mwambo. 10 Nu nakuvwalikizie nsulu za malebo nu nakuvwalikizie bikoba bya nyama; nakukandile nsulu nsoga nu nakukukide na nsulu. 11 Nakulebezie na malebo nu mikotola ku maboko mobe nu busanga mu ikosi lyobe. 12 Nabikile kimpini ku mwembe wobe nu ku matuzi mobe, nu nkumbu nsoga ku itoe lyobe. 13 Bubo walebezibwe na olo nu feza nu nsulu zobe zabezaga zabota, nu nsulu zalukwa busoga, nu nsulu za malebo. Walide bugali busoga nu buuki nu makiti; wabezaga musoga nu wabede na lukita lwa mukota. 14 Luganuno lwobe lwakukile munkatini mwa bilongo ku kabamba ka busoga bwobe. Kubuno wabezaga wasililila ku kabamba ka lutanuno lwane lunabikile muguli, u bukutenda Yehowa, Mwiya Bwangato Bunsania.
15 Tondo walemaninne busoga bwobe nu wakitile bitondo bya butazi ku kabamba ka lutanuno lwobe; wabalanganizie butazi bwobe ku bantu bansania batingaga; wabezaga wabo. 16 Watolile nsulu zobe nu kwikitila kiziki kya gantata kyalebibwa n'idangi lya nkita ningi, wakitile bitondo bya butazi kubeli; bitondo anga bibino tabikaba lingo. 17 Watolile bintu byobe bisoga bya olo zane nu feza zane zinakukasile nu kwikitila nkisi za bamulume nu kukita bitondo bya butazi nazo. 18 Watolile nsulu zobe za mulimo wa malebo nu kubika mwambo wane nu bulago bwane lwabusio lwabo. 19 Nakukasile kampampa kane nu nakulisizie bugali busoga, makiti nu buuki. Wabibikile lwabusio lwabo kuba nsunu nsoga za kutananizia nu bwabezaga bubo, u bukutenda Yehowa, Mwiya Bwangato Bunsania.
20 Lingo watolile bana bobe bamulume nu bamukazi bawambutide nu wabakasenne kuba kisansa. Butazi bwobe bwabezaga kintu kikeke. 21 Witile bana bane nu kubakasana ku kubatingia mu keiya. a 22 Nu mu lusombo lwobe lunsania, nu mu butazi bwobe bunsania ntwakengede bindi bya bukinga bwobe nkungu ziwabezaga mundulu, wibulubutizie mu mikila zobe.
23 Nu wabezaga kumbusa kwa mibi zobe insania, u bwatenda Yehowa, Mwiya Bwangato Bunsania. 24 Wiyobakide kiziki kinene nu kwikitila kiziki kyasakama ga makano ma nzila insania. 25 Wobakile kiziki kyobe kyasakama nunse lwabusio lwa nzila insania. Wiyitide busoga bwobe mu kwisanana ku muntu unsania ukutinga nu kutalikila bitondo byobe bya butazi. 26 Wakitile butazi na Misri, banyobe bakota ku mubili, nu kutalikila bitondo byobe bya butazi ku kunongia. 27 Nalambizie kuboko kwane kuguli nu kukokola nkaso zobe nu kukukasana ku bakukusomba, bakinga ba baFilistini bakukitile bubakutunda kubuno bakumona nsoni ku bitondo bya butazi bwobe. 28 Wakitile bitondo bya butazi na baAsuria kubuno ntwikutile. Ububo wakitile butazi nabo nu ntwikutile. 29 Witalikide bitondo byobe bya butazi mu kisi kya Kanana aba Kaldea nu bubo ntwikutile nabo.
30 Kasi mutima wobe guli musosu nunse, u bukutenda Yehowa, Mwiya Bwangato Bunsania, ndi ukukita bitondo bibino binsania, mulimo wa mukikulu kitazi kitakukua lingo nsoni. 31 Wabezaga ukobaka biziki byobe binene, nu na nzila na ziwakitile kiziki kyobe kya gantata. Ntwabede anga kitazi kubuno wabengile kukata lukalilo. 32 Mukikulu wakukita butazi! Ukusambizia bageni mu kiziki ky'iba wobe. 33 Bitazi binsania bikukaswa migelo, tondo uwe ukukasa batundwa bobe bansania mugelo wa kubagonga, buno bavwe kuguli ndenge insania ku butazi bwobe. 34 Bitondo byobe bili bwebwe na bakikulu bageni mu butazi bwobe, kubuno takuli muntu ukukuyanga ku butazi, nu kubuno ukugonga nu ntukukaswa lukalilo, ku bubo kasi uli lungo lukita.
35 Ku kabamba kakano, ee kitazi, ungwilila iyuki lya Yehowa. 36 Bubuno u bwatenda Yehowa, Mwiya Bwangato Bunsania, kubuno nsese zobe zakubuka, nu mundulu walolesibwa ku nzila za butazi bwobe, gamozi na batundwa bobe, ku kabamba ka nkisi za basombi bobe nu mikila za bana bobe bawabakasile. 37 Lola; nakundamanie batundwa bobe bansania bawabogilebogile nabo nu bansania bawatundile gamozi na bansania bawasombile; nabakundamanie kuguli ndenge insania nu kubalolesia mundulu wobe, bamone mundulu wobe unsania. 38 Nu nakusungie anga bakikulu bitazi bakukubula mikila bubakusungibwa, nu Nne nalusie kuguli mikila za lusungio nu lugi. 39 Nu nakubike mu kuboko kwabo nubo bagusie kiziki kinene nu kwita kiziki kyobe kya gantata nunse nu bakutikye nsulu zobe nu kutola bikulo byobe bya kutananizia, nu bakusige mundulu. 40 Bakuvwile n'iyombo lya kukwitania nu bakulibule makozi nu kukusesa byindi byindi na myene zabo za nganda. 41 Nu bazikye numba zobe na keiya nu nakusungie lwabusio lwa bakikulu beingi. Nu nne nakutikye ku butazi bwa kukumbamina tungo tulaga aba ntwakate lingo lukalilo kuto.
42 Bubo nikutie lusungio lwane kuguli nu lugi lwane lwakutukile nunse; nabobelele aba nne nsyongoe lingo. 43 Kubuno ntwakengede busi bwa bukinga bwobe, tondo wanongezie na bitondo bibino binsania, lola, nalusie misako zobe gantata itoe lyobe, u bukutenda Yehowa, Mwiya Bwangato Bunsania. Ububo ntwakite bitondo bibi lingo nu bwagi bwobe bunsania. 44 Lola, muntu ukutunda nsumo, kuguli atende bunee: “Anga buli nina, u bubo buli mukinga wage” 45 Lebelebe uli mukinga wa nyoko, mukikulu wagilile iba wage nu bana bage. Uli lingo bubo mubuto wa basolonzi, bagilile beiba babo nu bana babo. Nyoko abezaga muHiti nu so muAmori.
46 Solonzi ukwikalaga ku lulenge lwa kwikazi, u Samaria na bakinga bage, nu muto wobe ukwikalaga ku lulenge lwa kwidume eli Sodoma gamozi na bakinga bage. 47 Tondo ntwendile mu lukita lwabo tugu; aba anga buli bubi bwobe bwabezaga bukeke nunse, tondo mwendezi wobe watingile wabo nunsania. 48 Anga bunkulumbila nne Yehowa, Mwiya Bwangato Bunsania, Sodoma muto wobe nu bakinga bage, ntakitile anga buwakitile na bakinga bobe. 49 Ububo bwagi bwa Sodoma nu bakinga bage bwabezaga lwikotio nu buliagundu, kwisakika nu lolo. Nu ntakasizie bazambi nu beiyanizi. 50 Beikotizie, bakitile bitondo bya nsese lwabusio lwane, ku kabamba kakano nabatikizye anga bumwamonine.
51 Aba Samaria ntakitile kyindi kya bubi bwobe tondo witalikide bingo byingi bya bubi nu bibi bya nsese kutinga byabo. Makitilo ma mibuto zobe bamukazi maganzwe buno masililila. 52 Uwe eka nsoni zobe uwenyene kubuno lusungio lwa bwagi bwobe lukulolesia kusililila kwa mibuto zobe bamukazi. Ku kabamba ka makitilo mobe mabi, mibuto zobe bamukazi beli beisanana kukutinga. Ububo uzangezange nu kweka nsoni zobe, kubuno bwagi bwobe bukulolesia buno mibuto zobe bamukazi basililila.
53 Nu natikye ba Sodoma nu bakinga babo ku bukobe bwabo, nu ba Samaria nu bakinga babo, nu kumbusa beinyuwe gamozi nabo. 54 Umone kweka nsoni zobe uwenyene nu kukasibwa ku kabamba ka bitondo biwakitile, ndi wababibya. 55 Nu mibuto zobe bamukazi, Sodoma nu Samaria nu bakinga babo nabasubye ku lukita lwabo lwa wakalazi. Beinyuwe nu bakinga babo mwasubye anga bumwabezaga lingo wakalazi. 56 Kubuno muto wobe, Sodoma ntatekwidwe mu kanua kobe ku busi bwa lwikotio lwobe. 57 Lwabusio lwa kulolesibwa kwa bubi bwobe, ku nkungu za kulinga, aba kanokaluma bakinga ba Aramu nu babo bansania babatimba, bakinga ba baFilistini, bakukubenga ndenge insania. 58 Yehowa akutenda bunee: “Kano kaluma eka butazi bwobe nu lusombo lwobe.”
59 Kubuno Yehowa, Mwiya Bwangato Bunsania, atenda bunee: “Nakukitile anga bubo buwasila kukita, wabengile kilumbilo, witile idagano. 60 Tondo nakengele idagano lyane nobe mu bindi bya bukinga bwobe, nu nne nabike idagano inene nobe. 61 Ububo wakengele nzila zobe, nu kumona nsoni, nkungu ziwasekele mibuto zobe bamukazi, basolonzi nu bato bobe. Nu nakukase babano babe bakinga bobe, tondo ta ku kabamba k'idagano lyobe na nne. 62 Nu nne nabike idagano lyane inene gamozi nobe nu uwe wamenye buno nne nili Yehowa. 63 Yehowa, Mwiya Bwangato Bunsania, atenda ku kabamba ka nsoni zobe. Nkungu zinkakusigilila binsania biwakitile, wikale kibibi nu kwikatila ku busundo na nsoni nu kukengela mibi zobe.”’”