Iyuki ku kabamba ka Babeli
50
1 Iyuki lya Yehowa lyabaside Yeremia mulengania, ku kabamba ka Babeli nu ka kisi kya baKaldea bunee: 2 “Yehowa atenda bunee: ‘Sambala nu tenda munkatini mwa baBilongo; sakika ibendela; ntubise kena, tondo tenda bunee: “Babeli akindwa nu Beli akua na nsoni. Merodaki aganagana; nkisi zage zakua na nsoni, nu tulaga twage tukukua na boba. 3 Kilongo kyatuka ku lulenge lwa kwikazi kitana nage nu kubigia kisi kyage. Takwabe muntu umozi wikale mukyo; bantu nu nyama batina, beiyendela.”’” Kilemanizio ku Israeli nu Yuda
4 Yehowa atenda bunee: “Mu bibyo bindi nu mu zezo nkungu, baIsraeli nu baYuda gamozi bende balila mu nzila zabo, nu balonde Yehowa, Kalaga wabo. 5 Babuzie nzila za kubasa ku Sayuni, nu bagalukye malanga mabo kuko nu kutenda bunee: ‘Vwazi mwikulumanie na Yehowa n'idagano lya milyalya litanavwama kwibililwa.’
6 Bantu bane babezaga mikoko zazimina; balangi babo babeitizie kiti, nu babazangiziezangizie kuno nu kuko mu miduko nu mu nkangamo. Beibilide kiziki kyabo kya kumunwa. 7 Bantu bansania babamonineko babeitile; nu beiti babo batendile bunee: ‘Iswe tatuli na katati, kubuno babano bakitile bwagi lwabusio lwa Yehowa, kiziki kya bwisanana, Yehowa, kilemanizio kya beisibo.’
8 Tinazi kutuka mu Babeli; mutuke mu kisi kya baKaldea; mube anga kilimba kya mpene kikusondelezia kibombo. 9 Kubuno nayukye nu kulusia ku Babeli musanganano wa bilongo byingi kutuka ku lulenge lwa kwikazi, nubo bamukobele nu akatwe ku lulenge lwa kwikazi. Misungu zabo zabe anga mapuka ma bita, matakusubya maboko bwasi. 10 Kisi kya Kaldea kyanyagwe; bansania bakinyage beikute,” u bukutenda Yehowa.
Kugwa kwa Babeli
11 “Ee, bogazibogazi nu tumazitumazi inyuwe bakata ntiko zane. Ee, mutumetume anga ngombe mu kililo, nu lalukazi anga balume ba farasi. 12 Nyokoinyuwe akue na nsoni nunse. Wozo wamubutile anyegwe nunse. Abe kilongo kili kumbusa kwa bilongo binsania, kalula, kisi kyakama nunse nu kiteli na munago. 13 Ku kabamba ka bongoa bwa Yehowa, takikalwe na muntu, tondo kyabe bukindu nunse; na muntu unsania watinge bwigi na Babeli angame, nu kukugila ku kabamba ka nsungio zage insania.
14 Inyuwe bansania bakumba bunkanda, timbazi Babeli na bita mu ntungo insania, mwise misungu; tamusige musungu wampa, kubuno agide Yehowa. 15 Kitazi kazege mu ntungo insania; eikasana kumuli, mikolo zage zagwede, bitutu byage byagusibwe. Kubuno bubo buli musubo wa Yehowa, isubazi kweli; mumukitile anga bwakitide bango. 16 Zikyazi nunse bayiki ba mbuto ku Babeli, nu wozo ukutubula na mwene wage mu nkungu za matubulo. Ku kabamba ka mwene wa nganda wa wozo ukusungagia, na muntu na muntu asubye ku bantu bage. Nubo batine nawe nawe ku kisi kyage.
Kilemanizio kya bantu ba Kalaga
17 Israeli eli kibombo kya mikoko kyabalanganizibwe, kyapumbizibwe na kimbwe; walingile kumulia eli mukota wa Asuria, wazindile kubungula makwa mage eli Nebukadneza a mukota wa Babeli.” 18 Bubuno u bwatenda Yehowa, Kalaga wa Israeli bunee: “Nasungie mukota wa Babeli nu kisi kyage anga bunasungizie mukota wa Asuria. 19 Tondo nasubye Israeli ku kiziki kyage nu alie mu masoa ma Karmeli nu ma Basani, nu embuke ga nkangamo za Efuraimu nu Gileadi. 20 Mu bindi bibyo nu nkungu zezo,” u bwatenda Yehowa, “mibi za Israeli zalondwe nu tazamonekeko, nu bwagi bwa baYuda bwalondwe, tondo tabwamonekeko, kubuno nasigilile bwagi bwa babo banasubye.”
Lusungio lwa Kalaga ku Babeli
21 Yehowa akutenda bunee: “Endazi kwitania kisi kya Merataimu, nu bansania bakwikala mu Pekodi; bayangazi, beitazi nu kubazikya nunsania. Kitazi binsania binamukakizia. 22 Mu kisi muli kazege ka bita; kazege ka muziko munene. 23 Buni bwabungukile nu kukalika nondo za kisi kinsania! Buni buli Babeli bukindu munkatini mwa bilongo! 24 Nakutegede itega, ee Babeli, nu wakatilwe galyo geteli kubumenya; wasangilwe wakatwa kubuno wasakile na Yehowa.
25 Yehowa akandwide masuku mage ma bya bita, nu atikizye mu ngabo zage, kubuno Yehowa, Mwiya Bwangato Bunsania, Mwiya Mayombo eli na mulimo waakite mu kisi kya baKaldea. 26 Vwazi kweli, vwazi kweli na bita kutuka bulazi, kandulazi bigenge byage, bikundamanyazi gamozi mu bibombo nu kubizikya nunse; tamusige kampa. 27 Sesazi byana byabo binsania bya ngombe. Bigeziazi ku kiziki kya kuseswa! Kabebe kubeli kubuno kindi kyabo kyakuka, u nkungu zabo za kusungibwa. 28 Ungwililazi! Batini nu bakona kutuka ku Babeli bavwa na musagu ku Sayuni bunee: ‘Yehowa, Kalaga weitu akusuba, akusuba numba zage za kukumbamina.’
29 Manazi beiya misungu kwitana na Babeli, babo bansania bakumbaga bunkanda. Longekazi ido kutimba ntungo insania, nuko, takone umozi wa kubeli. Muligazi anga buli mulimo wage; mumukitile anga buli makitilo mage, kubuno ananine Yehowa, u Wasililila wa Israeli. 30 Ku kabamba kakano bana bage bamulume bagoe mu nzila nnene, nu bakoloboyo bage bansania bazikibwe mu bubo busi, u bwatenda Yehowa.”
31 Mukota, Yehowa, Mwiya Mayombo, atenda bunee: “Lola, nili gantata gobe, ee uwe mwiya kabenga, kubuno kindi kyobe kyakuka, u nkungu zobe za kusungibwa. 32 Nu mwiya kabenga eikuke nu kugwa; aba takuli muntu wamuzanzule, nabangie keiya mu miino zage, nuko kazikye bansania bamutimba mu ndenge insania.”
33 Bubuno u bwatenda Yehowa Mwiya Mayombo bunee: “BaIsraeli nu baYuda bakubengwa gamozi, nu bansania babekile bakandwa babalindika nunse, nu tabakuziga kubasiga. 34 Mukuluzi wabo eli ipuka; Yehowa, Mwiya Mayombo, u izina lyage; abalongekede na komanizia, buno abobelezie kisi, nu kuzangiazangia babo beli ku Babeli.”
35 Yehowa akutenda bunee: “Mwene wa nganda guli ku baKaldea, nu ku babo bakwikala mu Babeli, nu ku bangati bage, nu ku bantu bage beli na menge. 36 Mwene wa nganda guli ku balengania ba buza, nubo babe bikongolo; mwene wa nganda guli ku mapuka mage, nubo bazangezange. 37 Mwene wa nganda guli ku farasi zage, nu ku tuyanga twa bita, nu ku bageni bansania beli mu mayombo mage, nubo babe anga bakikulu! Mwene wa nganda guli ku masuku mage, numo matukulwe. 38 Mwido wa mazi guli ku kabamba ka kutaloka kwa mbula, numo makama, kubuno kili kisi kya nkisi, nubo bakatwa na bugazanga ku kabamba ka nkisi.
39 Ububo nyama za kalula nu mboa za mu lubanda zikale ko, gamozi na sulukutu, tamwikale lingo bantu ku bibuti na bibuti.” 40 Yehowa akutenda bunee: “Anga bwazikizye Kalaga Sodoma nu Gomora, ububo tamukeikala lingo muntu, aba mwana wa muntu ntabike ido mo.
41 Lola, iyombo likutuka ku kibe kya kwikazi; kilongo kinene, nu bakota beingi bakuzanzukibwa kutukila kuzinda kwa kisi. 42 Bite mankanda nu masumo mu maboko mabo, beli bakali geteli kyombo. Iyuki lyabo lyasusania kubila kwa kitatenge nu bakuvwa gantata farasi anga iyombo na ngabo zabo kukwitana bita nobe, ee mukinga wa Babeli. 43 Mukota wa Babeli ungule musagu wabo nu maboko mage matamba; akatwa na boba nu lubaba anga lwa mukikulu ukubuta.
44 Abakame anga kimbwe kikutuka mu igunda ku Yordani nu kubasa ku mwino wa beya magala.Tondo nabapumbie yiliyili kweli. Nazi musombolwa u nabika mwangati wage? Nazi uli anga nne? Nu nazi unankalila lwango? Nazi mulangi unemana kundi?”