Iyuki lya Yehowa ku baAmoni
49
1 Ku kabamba ka baAmoni, bubuno u bwatenda Yehowa bunee: “Ndi Israeli nteli na bana? Ndi nteli na mupieni? Kubuni Moleki angata Gadi? Kubuni bantu bage beli mu miino zage? 2 Ububo lola, bindi byavwa,” u bwatenda Yehowa, “binungusie kazege ka bita ku Raba mwino munene wa baAmoni, nugo wabe bukindu, nu miino zage zazikibwe na keiya. Nkungu zezo baIsraeli bapumbie babo babapumbizie,” u bwatenda Yehowa. 3 “Ee Hesiboni, lalukazi n'idilo, kubuno Ai azikibwa; inyuwe bakinga ba Raba, lilazi; ikukilazi makunino, kubuno Moleki akwenda ku bukobe na basankoga bage nu bakota bage gamozi. 4 Ukwikotia ku kabamba ka mpinga zobe zanaga, tondo zazikibwe. Ee mukinga uteisanana, ukulemanina isuku lyobe; ukutenda bunee: ‘Nazi unavwama kubasa kundi?’ 5 Lola, nalusie boba kumuli kutuka ndenge insania zamutimba,” u bukutenda Yehowa, Mwiya Mayombo. “Inyuwe bansania mwimbibwe bulazi, nu takwabe muntu wakukundamania babo batinine. 6 Tondo kumbusa kwa bitondo bibino nasubye baAmoni kutuka ku bukobe,” u bukutenda Yehowa.
Iyuki lya Yehowa ku baEdomu
7 Ku kabamba ka baEdomu, Yehowa, Mwiya Mayombo akubuzia bunee: “Ndi takuli menge lingo mu Temani? Ndi nango zazimina ku beiya menge? Ndi menge mabo masila? 8 Inyuwe bantu ba Dedani, galukazi, tinazi nu ibisazi mu tulimba, kubuno nkwita Esau nunse mu nkungu zinkumusungia. 9 Songo batubuzi ba mizabibu bavule kwobe, ndi tabanasigile kukungika mizabibu imozi? Aba beiti gabanavule kwobe mu kindi, ndi tabanatwagile aaba nu bamona byakuka? 10 Tondo nasigile Esau geteli kena, nabiswide kiziki kyage kya kubisama, aba ntanavwama kwibisa; kibuti kyage kyazikibwa, mibuto zage nu bilemba byage, nu we wenyene nteli lingo. 11 Siga nkubi zobe, nu nne nabalange, nu misigala zobe bandemanine.”
12 Kubuno bubuno u bwatenda Yehowa bunee: “Lola, ndi babo tabatunganana kunua ku kituma bakinue lebelebe, ndi walekelwe kusungibwa nunse? Ntwalekelelwe tondo wasungibwe nu lebelebe wakinue. 13 Kubuno nalumbide ku izina lyane buno Bosira abe bukindu nu kiziki kya nsoni, nu geteli kena, kya kukubwa masisi, nu kiswililo nu kya kubengwa; nu miino zage insania zabe makindu bindi binsania!” u bukutenda Yehowa.
14 Nungule ku musagu kutuka ku Yehowa nu mugenzi asingilwe ku bilongo kutenda bunee: “Kundamanazi ku bita; vwazi kulwana nage.”
15 Bubuno u bukutenda Yehowa bunee: “Nakubikile kuba mukeke munkatini mwa bilongo, nu kwililikwa munkatini mwa bantu. 16 Kukubwa boba kwobe nu lwikotio lwa mutima wobe byakwengelede, ee uwe ukwikala mu tulimba tuli mu miduko, aba ukobaka kizumba kyobe kwasakama nunse anga ndiu, nakugezie kutuka kuko,” u bukutenda Yehowa.
17 “Edomu abe masisi nunse; nu na watingage bwigi nage angame nu kukugila ku kabamba ka nsungio insania. 18 Anga bwabede mu nkungu za kusungibwa kwa Sodoma nu Gomora nu miino zabezaga bwigi nazo,” u bukutenda Yehowa, “takuli wampa ukeikala kuko. Aba takuli muntu ukeikala ko anga mugeni. 19 Lola, nabe anga kimbwe kikutuka mu magunda ku mutili wa Yordani nu kwiyisa ga kikalo kyagugumana, ububo nabapumbie kitangalabesi nu kwangatwa na unsania u nasombwede. Kubuno nazi uli anga nne, nu lingo unavwama kunkalila lwango? Lingo mulangi mukizi unemana lwabusio lwane?”
20 Ububo, ungwililazi lusungu lwa Yehowa lwasungwide ku kabamba ka Edomu, nu makengelo mage maakengede kukita ku babo bakwikala mu Temani; lebelebe mu kibombo byana byabulutwe bulazi nu biziki byabo bya kulisizia bituganwa byasigale bwasi ku kabamba kabo bobenyene. 21 Kisi kyatengetenge ku muzumio wa kugwa kwabo; idilo lyabo lyungubwe mu Kitatenge Kyakisimana. 22 Lola, abakame nu kulenga anga ndiu, nu kulambya byupi byage gantata Bosira, nu mu busi bubo mitima za mapuka ma Edomu zabe anga mutima wa mukikulu mu lubaba lwa kubuta.
Kusungibwa kwa bantu ba ku Damasiki
23 Ku kabamba ka Damasiki, bubuno u bukutenda Yehowa bunee: “Hamati nu Arpadi bakule na nsoni, kubuno bongule ku musagu mubi. Batambile nunse, anga bukukulunguka kitatenge, tabakumunwa nunse. 24 Damasiki atamba nunse, agalukile nu kutina, nu agiliminne na boba; kabebe nu lubaba byamubaside anga mukikulu mu nkungu za kubuta. 25 Kubuni mwino wozo wa kuganunwa tawasigilidwe, mwino wa mbogimbogi zane? 26 Lebelebe mitoka zage zazikibwe mu nzila nnene; bakoloboyo bage bansania bazikibwe mu bubo busi,” u bwatenda Yehowa. 27 “Nu nabangie keiya mu mikolo za Damasiki, nuko kazikye numba nnene za Beni-Hadadi.”
Kusungibwa kwa bantu ba ku Kedari
28 Ku kabamba ka Kedari nu ka makota ma Hazori mazikizibwe na Nebukadneza a mukota wa Babeli, bubuno u bwatenda Yehowa bunee: “Zanzukazi, bakamazi ku Kedari nu kuzikya bantu ba ku lulenge lwa kuntata kwa kisi. 29 Numba zabo za hema nu bibombo byabo bya bituganwa byakatwe; nusu za hema zanyagwe gamozi na bintu byabo binsania nu ngamia zabo nu balaluke bunee: ‘Boba buli ku ndenge insania.’ 30 Tinazi lubilo! Ibisazi mu tulimba, ee bantu ba Hazori,” u bwatenda Yehowa. “Kubuno Nebukadneza mukota wa Babeli amukalila kakungu nu lwango lwa kumuzikya.
31 Zanzukazi, endazi kwitana na kilongo kili mu bubobelelo, kikulama geteli kuzangazanga,” u bwatenda Yehowa. “Takuli nibi aba mikolo. Bakulama bobenyene 32 Ngamia zabo nu bibombo byabo binene bya bituganwa byanyagwe ku bita. Nabalanganie na lumpumpu babo bakubega ntungo za nzelu zabo, nu nalusie lusungio kubeli lukutuka ku ndenge insania,” u bukutenda Yehowa. 33 “Nu Hazori kyabe kiziki kya mboa za mu lubanda, nu bukindu ku milyalya; takuli muntu wikale ko; ee, takuli muntu ukwikala kuko anga mugeni.”
Kusungibwa kwa baElamu
34 Mu kulinga kwa kwangata kwa Zedekia, mukota wa Yuda, iyuki lya Yehowa lyabaside Yeremia mulengania, ku kabamba ka Elamu kutenda bunee: 35 “Bubuno u bwatenda Yehowa, Mwiya Mayombo, bunee: ‘Lola nabele bunkanda bwa Elamu, u bunene bwa magala mabo. 36 Nu ku kabamba ka Elamu nalusie mpumpu inazi kutuka mu ndenge inazi za meigulu; nu nabalanganie na zezo mpumpu insania, aba takuli kilongo kitakabasilwa na babo beimbizibwe mu Elamu, 37 nu nazangiezangie baElamu lwabusio lwa beiti babo nu lwabusio lwa babo bakulonda kubeita. Nabalusizie nsungio, aaba nu bongoa bwane bukali,’ u bwatenda Yehowa, ‘nu nasinge kumbusa kwabo mwene wa nganda aaba nu ganabazikye nunsania. 38 Ububo nabike kisumbi kyane kya bukota ku Elamu, nu kuzikya mukota wage nu bangati bage,’ u bukutenda Yehowa. 39 ‘Tondo kwabe mu bindi bizinda nasubye bakandwa ba Elamu ku busoga,’ u bukutenda Yehowa.”