YEREMIA 47

Musagu wa baFilistina

1 Iyuki lya Yehowa lyabaside Yeremia, mulengania, ku kabamba ka baFilistina, lwabusio Farao ntekata Gaza.

2 Bubuno u bwatenda Yehowa bunee: “Lola mazi matuka ku lulenge lwa kwikazi kwa kisi, numo mabe anga luuzi lwiyala, numo makukile kisi nu binsania bili mukyo, miino nu bansania bakwikala muzo. Bantu baame magu; bansania beli mu kisi kikyo balilage, 3 ku kabamba ka nkindo za farasi zage zili na magala, ku mubilo wa tuyanga twa beiti bage nu muzumio wa ngondangonda za tuyanga twage. Beisi ba bana tabakukebetuka ku bana babo, kubuno maboko mabo matamba nunse.

4 Kubuno bindi bya kuzikya baFilistina bansania byavwa, nu bya kwita unsania unakasia Tiro nu Sidoni. Kubuno Yehowa es'azikya baFilistina, babo basigede ku kisanga kya Kafutori. 5 Mu Gaza bakwiyalula mumpugu ku kabamba ka kulila; Askeloni eseli bukindu. Ee inyuwe basigede mu mpinga zabo, aaba nu ku nkungu nkizi zimwasige kwisaka?

6 Ee mwene wa nganda wa Yehowa, gani gokumuninwa? Subya mu musagi wobe; umunwa nu kwikala kibibi. 7 Tondo buni bugunavwama kwikala kibibi kungwa Yehowa u wagukakizia? Kwitana na Askeloni nu beli mu mutili wa kitatenge, u bwakakizizie bitondo bibino.”