Ntondi za kutakumbamina tulaga
44
1 Iyuki lyavule ku Yeremia ku kabamba ka baYuda bansania balamaga ku Misri, mu bibe bya Migidoli nu Tapanesi nu Nofi, nu ku kibe kya kisi kya Patro; lyatendile bunee: 2 “Bubuno u bwatenda Yehowa, Mwiya Mayombo, Kalaga wa Israeli bunee: ‘Mwamonine nsungio insania zinalusizie ku Yerusalema nu ku miino insania za baYuda. Lelo zili makindu nu takuli muntu ukwikala muzo, 3 ku kabamba ka mibi zabo zibakitile za kunongia mu kugisia aliga nu kukitila tungo tulaga tubateizi, bo aba beinyuwe aba nu basoinyuwe. 4 Lingo namusingide busi na busi bakiti bane bansania balengania, bamutendile bunee: “Tamukitilile bubi bubuno bunkusomba.” 5 Tondo tabongule aba tabategekede buno bagaluke nu kusiga bubi bwabo, aba kutagisia aliga ku tungo tulaga. 6 Ku kabamba kakano, lusungio lwane nu bongoa bwane bwakubukile, nubo bwabangile ku miino za Yuda, nu nzila nnene za Yerusalema, nu miino zeno zasigilwe makindu nu kubiga anga buzili lelo.’
7 Kano kaluma, bubuno u bwatenda Yehowa, Mwiya Mayombo, Kalaga wa Israeli bunee: ‘Kubuni kumukwidusizia mubenyene bubi bubuno bunene, bwa kutikya ku Yuda bamulume nu bakikulu, nu bana bakeke, nu babo bakumoma, nu kwikala geteli basigala? 8 Kubuni kumukunsuna buno nongoe na makitilo meinyu ma kugisia aliga ku tungo tulaga mu kisi kya Misri, kimwavule kwikalamo? Mwizikya nu mwikita mubenyene kuba kiswililo nu kubengwa munkatini mwa bilongo binsania bya kisi! 9 Ndi mwibilide bubi bwakitile basoinyuwe, nu bakota ba Yuda, nu bakikulu babo, nu bubi bunsania bweinyu nu bwa bakikulu beinyu bumwakitile mu kisi kya Yuda nu mu nzila nnene za Yerusalema? 10 Aaba nu lelo tamwibotezie, aba tamwakule boba, aba tamwayangile milembe zane aba makakizio mane manabikile lwabusio lweinyu nu lwa basoinyuwe.’
11 Ku kabamba kakano Yehowa, Mwiya Mayombo, Kalaga wa Israeli, atenda bunee: ‘Nasombwede kulusia bubi kumuli nu kuzikya baYuda bansania. 12 Natikye babo basigede ku baYuda basombwede kwenda ku Misri buno beikale kuko. Babo bansania bazike mu Misri; beitwe ma mwene wa nganda, aba kukua na munganda. Kutukila mukeke aaba nu ku munene, bakue na mwene wa nganda aba na nzala. Babe bantu ba kuswililwa nu kukubwa masisi, nu ba kwililikwa nu ba kubengwa. 13 Nasungie babo bakwikala mu Misri na mwene wa nganda nu munganda nu nsambo nkali, anga bunasungizie Yerusalema. 14 Takuli wampa wa babo basigede ku baYuda bendile ku Misri kwikala kuko, wone aba kusigala, buno asubye ku kisi kya Yuda, kibakutunda kusubya nu kwikala kukyo; takuli wasubye, tugu bamozi ku batinine.’”
15 Nu bamulume bansania babo bamenyine buno bakikulu babo bagisagia aliga ku tungo tulaga, gamozi na bakikulu babezaga ko, anga musanganano munene, nu bantu bansania beikalaga mu Patro, mu kisi kya Misri, bakwide Yeremia bunee: 16 “Tatwitabizia aba kakeke kungwilila ku kitondo kiwatusambalide ku izina lya Yehowa! 17 Lebelebe twakite iyuki lyatukile ku tunua tweitu; twagisie aliga ku mukota mukikulu wa kwigulu, nu kumukubulila kayulo ka maku, anga bwakitaga batateiswe, nu bakota beitu nu bangati beitu, mu miino za Yuda nu mu nzila nnene za Yerusalema. Mu nkungu zezo, twabezaga na malia meingi, nu twalimaga busoga nu tatwabezaga na tubebe. 18 Tondo kutukila busi butwasigile kugisia aliga ku mukota mukikulu wa kwigulu, nu kumukubulila tuyulo twa maku, tatuli na kena, nu tukuzika na mwene wa nganda nu na munganda.”
19 Nu bakikulu batalikide lingo kutenda bunee: “Gatwagisizie aliga ku mukota mukikulu wa kwigulu nu kumukubulila tuyulo twa maku, ndi beiba beitu tabamenyine buno twakitile tumpampa mu kisusania kyage nu kumukubulila tuyulo twa maku?”
20 Ububo Yeremia asambalide bantu bansania, bamulume nu bakikulu gamozi, nu babo bamwakulaga, ababuzizie bunee: 21 “Ndi Yehowa eibilide nu kutakengela ku aliga zimwagisagia mu miino za Yuda nu mu nzila nnene za Yerusalema, inyuwe nu basoinyuwe nu bakota nu bangati beinyu nu bantu ba kisi? 22 Tabubo, kubuno Yehowa ntanavwama kusigilila lingo mibi za makitilo meinyu nu bitondo bya kusombwa bimwakitaga; ukinsa kisi kyeinyu kyabede bukindu nu kya kwangamia nu kya kiswililo geteli bakwikalaga mukyo, anga bukili lelo. 23 Kubuno mwagisizie aliga nu mwagide Yehowa nu tamwanzile iyuki lyage, aba tamwayangile milembe zage aba makakizio mage, aba nango zage; zeno nsungio zili kumuli anga buzili lelo.”
24 Lingo Yeremia atendile bantu bansania gamozi na bakikulu bansania bunee: “Beinyuwe baYuda bansania beikile mu kisi kya Misri, ungwililazi iyuki lya Yehowa. 25 Bubuno u bukutenda Yehowa, Mwiya Mayombo, Kalaga wa Israeli bunee: ‘Inyuwe nu bakikulu beinyu mwalolesizie na makitilo meinyu buni bumwalagile na tunua tweinyu gamwatendile bunee: “Lebelebe twazindilizie malagano meitu matwalagile buno twagisie aliga ku mukota mukikulu wa kwigulu, nu kumukubulila kayulo ka maku?” Kasi kitazi malagano meinyu nu kumazindilizia.’
26 Tondo, inyuwe baYuda bansania bakwikala mu Misri, ungwililazi iyuki lya Yehowa kutenda bunee: ‘Nne nalumbide mu izina lyane nnenyene,’ u bukutenda Yehowa, ‘buno izina lyane talyatekulwe lingo mu kanua ka muntu wampa wa Yuda uli mu kisi kya Misri, ta umozi wa kumuli watekule izina lyane aba kulumbila bunee: “Anga bukulama Yehowa, Mwiya Bwangato Bunsania.” 27 Kubuno nkubalanga ku bubi, ta ku busoga; baYuda bansania beikala mu Misri bakue na mwene wa nganda, nu na munganda aaba nu gabazike nunsania.
28 Babo bone na mwene wa nganda nu kutuka mu kisi kya Misri kusubya ku kisi kya Yuda, babe bakeke tugu, ta beingi. Nu basigede bansania mu baYuda, babo bavule kwikala mu Misri bamenye kitondo kya nazi kyemana, kyane aba kyabo. 29 Nu kakano keli kakengelezio kumuli,’ u bukutenda Yehowa, ‘namusungie ga kiziki kikino, mumenye buno bitondo bibi binamutondile kubyo byazindilile lebelebe.’ 30 Yehowa atenda bunee: ‘Nabike Farao Ofura, u mukota wa Misri, mu maboko ma beiti bage, nu mu maboko ma bakulonda kumwita anga bunabikile Zedekia, mukota wa Yuda, mu maboko ma Nebukadneza, mukota wa Babeli, mwiti walondaga kumwita.’”