Isimaeli eita Gedalia
41
1 Mu mwezi wa mutubakamo, a Isimaeli, mwana wa Netania, mwana wa Elisama, wa kibuti kya bukota wabezaga umozi ku bangati ba mukota, avule na bantu ikumi ku Gedalia, mwana wa Ahikamu ku Misipa. Nkungu zibaliaga gamozi ku Misipa, 2 Isimaeli, mwana wa Netania, nu bamulume ikumi babezaga gamozi nage bazanzukile nu balibwide Gedalia, mwana wa Ahikamu, mwana wa Safanu, na mwene wa nganda; beitile wozo wabikilwe mukota wa Babeli kuba mwangati wa kisi. 3 Lingo, Isimaeli eitile baYuda bansania babezaga gamozi na Gedalia ku Misipa, nu bakoloboyo ba baKaldea babezaga gamozi nabo. 4 Kumbusa kwa busi bwa kwitwa kwa Gedalia, lwabusio bantu tabebumenya, 5 bantu makumi kinana babegwa nzelu zabo nu kwata nsulu zabo, nu beikokakoka, bavule na tuyulo nu aliga mu maboko mabo kutuka ku Sekemu, ku Silo nu ku Samaria, buno babyeke ku numba za Yehowa. 6 Nu Isimaeli, mwana wa Netania, atukile ku Misipa, kwenda kukulumana nabo; akwenda alila. Gaakulumanine nabo ababwide bunee: “Vwazi kuli Gedalia, mwana wa Ahikamu.”
7 Gabeingide mu mwino, Isimaeli, mwana wa Netania, gamozi na bantu babezaga nage babeitile nu kwisa bitumba byabo mu muzinga. 8 Tondo bantu ikumi babezaga munkatini mwabo basegile Isimaeli bunee: “Ntutwite, kubuno tuli na ngano, nu shayiri, nu makiti nu buuki bitwabisile mu isoa.” Ububo abasigile, nu ntabeitile gamozi na mibuto zabo. 9 Muzinga wisile Isimaeli mu bitumba bya babo bansania beitile ku kabamba ka Gedalia, wabezaga muzinga wombile mukota Asa ku kwidanga na Basa, mukota wa Israeli. Isimaeli eizazizie muzinga wozo na bitumba bibyo byitile.
10 Kumbusa Isimaeli akandile bansania basigede ku Misipa ku bukobe, aba bakinga ba mukota nu bantu bansania basigede ku Misipa babo bakasile Nebuzaradani mwangati w'iyombo ku Gedalia mwana wa Ahikamu. Isimaeli, mwana wa Netania, abekile ku bukobe nu kubatingia ku baAmoni.
11 Tondo gongule Yohanani, mwana wa Karea, nu bangati bansania ba mayombo babezaga gamozi nage, ku mibi insania zakitile Isimaeli, mwana wa Netania, 12 batolile bantu bansania nu bendile kwitana na Isimaeli mwana wa Netania; bamusangile bwigi n'iziba inene lya Gibeoni. 13 Nu gamonine bantu bansania babezaga na Isimaeli ku Yohanani, mwana wa Karea, nu bangati ba mayombo babezaga gamozi nage, babogilebogile. 14 Ububo bantu bansania bakandilwe na Isimaeli ku Misipa bagalukile nu bendile kuli Yohanani, mwana wa Karea. 15 Tondo Isimaeli mwana wa Netania, nu bantu kinana bonine nu batinine ku baAmoni.
16 Ububo Yohanani, mwana wa Karea, nu bangati bansania ba mayombo babezaga gamozi nage batolile ku maboko ma Isimaeli, mwana wa Netania, babo bansania basigede ku Misipa kumbusa kwa kwitwa kwa Gedalia, mwana wa Ahikamu, bamulume ba bita, nu bakikulu, nu bana, nu mintembele, basubizie kutuka ku Gibeoni. 17 Bendile, nu beikede ku Geruti-Kimuhamu, guli bwigi na Betelehemu, buno batinine ku Misri, kwiyonia ku maboko ma baKaldea. 18 Babakule boba, kubuno Isimaeli, mwana wa Netania, eitile Gedalia, mwana wa Ahikamu, wabikilwe na mukota wa Babeli kuba mwangati wa kisi.