Kukandulwa kwa Yeremia
40
1 Lilino u iyuki lyabaside Yeremia kutuka ku Yehowa, kumbusa kwa Nebuzaradani, mwangati wa bakoloboyo, kukandula Yeremia ku Rama. Amonine Yeremia akandwa miyololo munkatini mwa bakandwa bansania ku Yerusalema nu ku Yuda, kwenda ku bukobe ku Babeli. 2 Nu mwangati wa bakoloboyo atolile Yeremia, nu amubwide bunee: “Yehowa, Kalaga wobe, alagile bibino bitondo bibi ku kino kiziki. 3 Nu abilusizie nu kukita anga bwatendile, kubuno mwagide Yehowa nu tamwanzile iyuki lyage, u kinsa bitondo bibino byamubasila. 4 Kano kaluma nakukandula lelo bikando ku maboko mobe. Ndi wamona buli busoga kwenda gamozi na nne ku Babeli? Nti twenda nu nakulange; tondo ndi wamona buno buli bubi kwenda gamozi na nne ku Babeli, nti wasigala gano; lola, kisi kinsania kili lwabusio lwobe, enda kunsania kwa kuswagila.” 5 Tondo lwabusio lwa kugaluka kwa Yeremia buno ende, Nebuzaradani atendile lingo bunee: “Subya kuli Gedalia, mwana wa Ahikamu, mwana wa Safanu, wozo wimikilwe na mukota wa Babeli ku mwino wa Yuda, nu wikale nage munkatini mwa bantu, aba enda ku kiziki kinsania kyakutananizia.”
Nkungu zezo mwangati wa bakoloboyo amukasile idia nu nkaso, nu bamusigile eiyendele. 6 Ububo Yeremia endile kuli Gedalia mwana wa Ahikamu, kuko ku Misipa, nu eikede gamozi nage munkatini mwa bantu basigede mu kisi.
7 Bangati bansania ba bakoloboyo gamozi na bantu babo basigede mu lubanda, gabongule buno mukota wa Babeli abika Gedalia, mwana wa Ahikamu, mwangati mu kisi nu kumukasa bamulume, nu bakikulu, nu bana, nu bazambi ba mu kisi batekilwe ku bukobe ku Babeli. 8 Bavule kuli Gedalia ku Misipa, Isimaeli, mwana wa Netania, nu Yohanani nu Yonatani, bana ba Karea, Seraya mwana wa Tanumeti, bana ba Efai, muNetofati, nu Yazania, mwana wa muMakati, babo bansania nu bantu babo.
9 Nu Gedalia, mwana wa Ahikamu, mwana wa Safanu, alumbilide bansania kutenda bunee: “Tamukue boba kukitila baKaldea, ikalazi mu kisi nu kitilazi mukota wa Babeli buno mumone busoga mu kisi. 10 Nnenyene nasigale mu Misipa, buno nimulongekele lwabusio lwa baKaldea bavwe kutuli, tondo inyuwe, tubulazi matubulo ma mizabibu, nu biguma bya nkungu za kilimo, nu makiti; mubike bibino mu masuku meinyu, nu mwikale mu miino zeinyu zimwakatile.”
11 Gongule ba Yuda bansania babezaga mu kisi kya Moabu nu kya Amoni nu kya Edomu nu bingo bisi binsania buno mukota wa Babeli asigile bamozi ku basigede mu Yuda, nu buno mukota wa Babeli abikile Gedalia mwana wa Ahikamu, mwana wa Safanu, abe mwangati wabo, 12 batukile mu bisi bibabalanganizibwe mubyo, nu basubizie ku kisi kya Yuda kuli Gedalia mu Misipa. Nu batubwide matubulo manene ma mizabibu nu biguma bya nkungu za kilimo.
13 Lingo Yohanani, mwana wa Karea, nu bangati bansania ba mayombo babezaga mu lubanda bendile kuli Gedalia ku Misipa, 14 nu bamutendile bunee: “Ndi wizi buno Balisi, mukota wa baAmoni, asingile Isimaeli, mwana wa Netania, kukwita?” Tondo Gedalia, mwana wa Ahikamu, ntakatizizie kitondo kikino.
15 Ububo Yohanani, mwana wa Karea, atendile Gedalia mu kakungu kuko ku Misipa, bunee: “Kasa bwangato nende kwita Isimaeli, mwana wa Netania, nu takuli muntu wamenye bubo; kubuni kwanakwita nu kubalangania ba Yuda bakundamanine bwigi nobe, aaba nu basigede ku baYuda kuzika?”
16 Tondo Gedalia mwana wa Ahikamu akwide Yohanani, mwana wa Karea bunee: “Ntukite bubo, kubuno ukukandika Isimaeli.”