Kukatwa kwa Yerusalema
39
1 Bubuno u bwakatilwe Yerusalema: mu mwezi w'ikumi wa mwaka wa mubula a wa Zedekia, mukota wa Yuda, Nebukadneza mukota wa Babeli avule ku Yerusalema n'iyombo lyage linsania, nu agutimbile. 2 Nu busi bwa mubula bwa mwezi w'ikumi nu umozi b wa Zedekia biziki bimozi bya mukolo wa mwino byagusizibwe. 3 Nu bangati bansania ba mukota wa Babeli beingide nu beikede ga Lwibi lwa Munkatini. Nergali-Sarezeri nu Samgari-Nebo nu Sarsekimu musondelezia wa bakoloboyo nu Nergali-Sarezeri mutonge nu bango bangati bansania ba mukota wa Babeli. 4 Gababamonineko, Zedekia mukota wa Yuda nu bakoloboyo bansania batinine, batukile mu mwino mu kindi ku nzila z'isoa lya mukota ga mwingilo wabezaga gasamba mikolo ibili; batukile nu bendile mu nzila zenda ku kibitabita kya Yordani. 5 Tondo iyombo lya baKaldea lyabayangile, nu lyakatile Zedekia mu kisasa kya Yeriko. Bamukatile nu bavule nage kuli Nebukadneza mukota wa Babeli ku Ribla ku kisi kya Hamati, amusungizie gago. 6 Ububo kuko ku Ribla, mukota wa Babeli eitile bana ba Zedekia lwabusio lwa meiso mage gamozi na bangati bansania ba Yuda. 7 Kumbusa abugizie meiso ma Zedekia, nu amukandile na bikando buno amweke aaba nu ku Babeli.
8 Nu baKaldea bazikizye numba za mukota nu numba za bantu na keiya, nu bagusizie mikolo za Yerusalema. 9 Ububo Nebuzaradani, mwangati wa bakoloboyo, ekile basigede mu mwino nu babo bagalukile kweli nu bango bantu bansania ku bukobe ku Babeli. 10 Tondo Nebuzaradani, mwangati wa bakoloboyo, asigile bazambi batabezaga na kena mu kisi kya Yuda, abakasile masoa ma mizabibu nu mango masoa bubo busi.
11 Ububo Nebukadneza, mukota wa Babeli, akakizizie Nebuzaradani, mwangati wa bakoloboyo, ku kabamba ka Yeremia kutenda bunee: 12 “Mutole, nu mulange busoga, aba ntumukite bwampa, tondo mukitile anga bwakutenda.” 13 Ububo Nebuzaradani, mwangati wa bakoloboyo, nu Nebusazibani nu Nergali-Sarezeri, nu bangati bansania ba bakoloboyo ba mukota wa Babeli 14 basingile bantu nu batikizye Yeremia ga mulungu wa balangi, nu bamubikile mu maboko ma Gedalia, mwana wa Ahikamu, mwana wa Safanu, buno amweke ku numba zage; ububo eikede gamozi na bantu bage.
15 Iyuki lya Yehowa lyabaside Yeremia, gaabezaga akandwa ga mulungu wa balangi, kutenda bunee: 16 “Enda utende na Ebedimeleki muEtiopia bunee: ‘Yehowa, Mwiya Mayombo, Kalaga wa Israeli atenda bunee: “Lola, nazindilizia bitondo binatendile ku mwino wono na bubi, aba ta na busoga, nubyo byazindilile lwabusio lwobe ku busi bubo. 17 Tondo uwe, nakwonie mu busi bubo,” u bukutenda Yehowa, “aba ntwabikwe mu maboko ma babo bantu bokukua boba. 18 Kubuno lebelebe nakonie, aba ntwakue na mwene wa nganda, tondo nalange kalamo kobe, kubuno wankatizizie,” u bukutenda Yehowa.’”