38
1 Sefania, mwana wa Matani, nu Gedalia, mwana wa Pashuri, nu Yukali, mwana wa Selemia, nu Pashuri, mwana wa Malkiya bongule ku bitondo binsania byatendile Yeremia lwabusio lwa bantu bansania kutenda bunee: 2 “Bubuno u bwatenda Yehowa bunee: ‘Wozo wikala mu mwino akue na mwene wa nganda, na munganda, nu na nsambo nkali, tondo wozo watuka nu kwenda ku baKaldea alame; eiyonie na kalamo kage nu alame.’ 3 Lingo Yehowa atenda bunee: ‘Lebelebe mwino wono wakaswe mu maboko m'iyombo lya mukota wa Babeli, lyagukinde.’” 4 Nu bangati batendile ku mukota bunee: “Tukukusega buno muntu wono akue, kubuno akutambia bakoloboyo bakwikala mu mwino nu bantu bansania na bitondo byakutenda, wono muntu ntakulonda busoga ku bantu babano, umpanga bubi.”
5 Nu mukota Zedekia akwide bunee: “Lola, eli mu maboko meinyu, kubuno mukota nteli na bwangato bwa kumubigana.”
6 Ububo batolile Yeremia, nu bamwisile mu muzinga wa Malkiya, mwana wa mukota, wabezaga mu mulungu wa balangi; bamugezizie na mbubi. Nu mu muzinga tamwabezaga mazi, tugu bitota; nu we Yeremia akokile mu bitota.
7 Tondo Ebedimeleki, muEtiopia muntembele wabezaga wikala ga mwingilo wa Benjamina, 8 wozo Ebedimeleki atukile mu numba za mukota, nu atendile mukota bunee: 9 “Ee mukota wane, bantu babano bakitile bubi ku binsania bibakitide Yeremia, mulengania; bamwisile mu muzinga, nu we akukua mo na nzala, kubuno mu mwino tamuli lingo tumpampa.”
10 Ububo mukota akakizizie Ebedimeleki, muEtiopia bunee: “Tola bantu makumi masatu gamozi nobe, mutikye Yeremia, mulengania, mu muzinga lwabusio ntekua.”
11 Ububo Ebedimeleki endile gamozi ba bantu babano, eingide mu numba za mukota, mu busio bwa kunsi kw'isuku, nu atolile mikungio nu bibe bya nsulu, nu abigezizizie Yeremia mu muzinga na mizigi. 12 Nu Ebedimeleki muEtiopia atendile Yeremia bunee: “Bika mikungio zeno mu maga mobe, nu agata mizigi.” Nu Yeremia akitile bubo. 13 Ububo babulutile Yeremia na zezo mizigi, nu bamutikizye mu muzinga. Nu Yeremia osede ga mulungu wa balangi.
14 Kumbusa mukota Zedekia asingile bantu kumana Yeremia, mulengania, nu bavule nage kweli ga mwingilo w'isatu wa numba za Yehowa. Nu mukota abwide Yeremia bunee: “Nkutunda kukubuzia kitondo, nu uwe ntumbise kyampa.”
15 Ububo Yeremia akwide Zedekia bunee: “Ndi nakusambalila kitondo kikino, ndi ntwanite? Aba ndi nakwana ntwanungwe.”
16 Tondo mukota Zedekia alumbilide Yeremia mu kakungu bunee: “Anga bukulama Yehowa, wozo watukasile kalamo, nsyakwite aba nsyakubike mu maboko ma babo bakulonda kukwita.”
17 Yeremia akwide Zedekia bunee: “ Bubuno u bukutenda Kalaga Yehowa, Mwiya Mayombo, Kalaga wa Israeli bunee: ‘Ndi wenda ku bangati ba mukota wa Babeli, nti walame nu mwino wono tawazikibwe; walame, uwe gamozi na kikanga kyobe. 18 Tondo ndi wanana kwenda ku bangati ba mukota wa Babeli, mwino wono wabikwe ku maboko ma baKaldea, nubo baguzikye na keiya, aba uwe ntwone mu maboko mabo.’”
19 Mukota Zedekia abwide Yeremia bunee: “Nkukua baYuda batingile ku lulenge lwa baKaldea boba, banavwama kumbika mu maboko mabo nu bankitile bubi.”
20 Tondo Yeremia akwide mukota Zedekia bunee: “Ta bubo, tabakukasane kubeli. Nkukusega anza iyuki lya Yehowa mu bitondo bibino binkukubula; bubo u buwamone busoga nu walame. 21 Tondo ndi ntwaziga kutuka, kikino kili kitondo kyandolesizie Yehowa: 22 Lola, bakikulu bansania basigilwe mu numba za mukota wa Yuda bakatwe nu kwekwa ku bangati ba mukota wa Babeli. Bakikulu babano batende kuguli bunee: ‘Bilemba byobe biwalemaninne bakwengelede nu bakukindile; magulu mobe mese meingila mu bisogo; nu bilemba byobe byakusigile.’ 23 Bakikulu nu bana bobe bansania batukibwe ku Babeli; nu uwe ntwatine ku maboko mabo, tondo wakatwe na maboko ma mukota wa Babeli, nu ku kabamba kobe mwino wono wazikibwe.”
24 Zedekia atendile Yeremia bunee: “Muntu unsania ntongwe ku bitondo bibino, unakivwa kukua. 25 Tondo ndi bangati bongwa buno natendenne nobe, nubo ndi bavwa kuguli kukubuzia bunee: ‘Tusambalile buwasambalila mukota, ntutubise, nu iswe tatwakwite!’ 26 nti wababula bunee: ‘Nasegile mukota buno ntansubye lingo mu numba za Yonatani, aba ninakivwa kukua ko.’”