YEREMIA 37

Yeremia akandwa mu kikando

1 Nu Nebukadneza, mukota wa Babeli, abikile Zedekia, mwana wa Yosia, mu kiziki kya Yekonia, mwana wa Yoyakimu, kwangata mu kisi kya Yuda. 2 Tondo we, aba bakiti bage, aba bantu ba kisi, tabongule moki ma Yehowa maatendile mu kanua ka mulengania Yeremia. 3 Mukota Zedekia asingile Yehukali, mwana wa Selemia, nu Zefania, mwana wa Maseya sankoga, ku Yeremia, mulengania, kutenda bunee: “Ndi bwakulungana, tusegele kuli Yehowa, Kalaga weitu.” 4 Nu Yeremia abezaga na bwangato bwa kwingila nu kwenda munkatini mwa bantu kubuno abezaga nteibikwa mu kikando.

5 Iyombo lya Farao lyatukile mu kisi kya Misri; gongule baKaldea, babo babezaga batimba Yerusalema, ku wozo musagu, batukile mo. 6 Kusila iyuki lya Yehowa lyavule ku Yeremia mulengania kutenda bunee: 7 “Bubuno u bwatenda Yehowa wa Israeli bunee: ‘Tenda mukota wa Yuda wakusingile kundi kumbuzia bunee: “Lola, iyombo lya Farao lilyo lyavule kumukasia lyasubye ku Misri ku kisi kyabo. 8 Nu baKaldea bavwe lingo kwitana na mwino wono, nubo bagukinde nu kugugisia na keiya. 9 Bubuno u bwatenda Yehowa bunee: ‘Tamwiyengelele na kukengela buno baKaldea batusige, kubuno tabende. 10 Aba mwakinda iyombo linsania lya baKaldea likwitana n'inyu, nu bantu basumitwa byulu basigala mu numba zabo za hema, nti banatuka mu numba zabo za hema nu kugisia mwino wono.’”’”

11 Nu gabede iyombo lya baKaldea lyatuka ku Yerusalema ku kabamba k'iyombo lya Farao, 12 Yeremia atukile ku Yerusalema buno ende ku kisi kya Benjamina kutola kyage kyindi lwabusio lwa bantu. 13 Nu gaabezaga ga mwingilo wa Benjamina, musondelezia umozi wa balangi abezaga gago, izina lyage Iria, mwana wa Selemia, mwana wa Hanania; akatile Yeremia mulengania, nu abwide bunee: “Ukwenda kugomia na baKaldea!”

14 Tondo Yeremia amwakwide bunee: “Buza bubo! Nsikwenda kugomia na baKaldea.” Tondo ntamukatizizie; ububo Iria akatile Yeremia nu amulusizie ku bangati. 15 Nu bangati bongedwe Yeremia, bamulibwide nu bamubikile mu kikando mu numba za Yonatani musanzi, zibakitile kuba kikando. 16 Nu geingide Yeremia mu numba za muzinga, mu busio bwa munda, Yeremia eikede mumo bindi byingi.

17 Nu Zedekia asingile kumumana, nu amutolile mu numba zage; nu we mukota amubuzizie mu kakungu mu numba zage bunee: “Ndi kuli iyuki lyatukile ku Yehowa?”

Yeremia amwakwide bunee: “Ee kuli. Ukukasanwa mu maboko ma baBabeli.”

18 Lingo, Yeremia abwide mukota Zedekia bunee: “Nakukitide bwagi bukizi, aba ku bakiti bobe, aba ku bantu babano, kumwambika mu kikando? 19 Kuni kuli balengania beinyu bamulenganizizie bunee: ‘Mukota wa Babeli ntavwe kumwitania, aba kwitania kisi kikino?’ 20 Tondo kano kaluma, ee mukota wane, ungwilila masego mane, meitabizibwe lwabusio lwobe: ntunsubye ku numba za Yonatani musanzi, ninavwa kukwila ko.”

21 Ububo mukota Zedekia akakizizie buno babike Yeremia ga mulungu wa balangi. Busi na busi bamukasaga kampampa kamozi katukaga ku kiziki kya kokya tumpampa tunsania twa mu mwino. Nu Yeremia osalaga ga mulungu wa balangi.