Yoyakimu agisia mukanda wa Yeremia
36
1 Mu mwaka w'inazi wa mukota Yoyakimu mwana wa Yosia, mwangati wa Yuda, iyuki lilino lyabaside Yeremia kutuka ku Yehowa kutenda bunee: 2 “Tola kigondi kya mukanda, sanza mukyo binsania binakutendile ku kabamba ka Israeli nu ka Yuda nu ka bingo bilongo binsania kutukila busi bubo bunatendile nobe, kutukila bindi bya Yosia aaba nu lelo. 3 Embe baYuda bongwe ku mibi insania zinakengede kubakitila; buno na muntu na muntu asubye nu kusiga nzila zage mbi; bubo nabasigilile bwagi bwabo nu mibi zabo.” 4 Kusila Yeremia amanine Baruku, mwana wa Neri; nu Baruku asanzile mu kigondi kya mukanda bitondo binsania bya Yehowa byatukile mu kanua ka Yeremia, anga bwatendile Yehowa kweli. 5 Yeremia akakizizie Baruku bunee: “Nakandwa buno nsingile mu numba za Yehowa. 6 Kasi enda usome kigondi kya mukanda, anga buwasanzile mukyo bitondo bya Yehowa, byatukile mu kanua kane, ubisome ku matuzi ma bantu mu numba za Yehowa busi bwa kukanda kulia, nu soma mu matuzi ma bantu bansania bakutuka ku miino zabo. 7 Embe masego mabo mabase lwabusio lwa Yehowa nu muntu na muntu asubye kutuka ku nzila zage mbi; kubuno bongoa nu lusungio lwatendile Yehowa ku bantu babano luli lunene.” 8 Nu Baruku mwana wa Neria akitile binsania byamukakizizie Yeremia mulengania; asomine moki ma Yehowa mu numba za Yehowa. 9 Mu mwezi wa mubula mu mwaka w'itano wa Yoyakimu, mwana wa Yosia mwangati wa Yuda mwabezaga bindi bya kukanda idia lwabusio lwa Kalaga; kwakakizizibwe ku bantu bansania ba Yerusalema nu bantu bansania batukile ku miino zabo kuvwa ku Yerusalema. 10 Nu mu nkungu zezo Baruku asomine moki ma Yeremia mu numba za Yehowa mu busio bwa Gemaria mwana wa Safanu musanzi, mu mulungu wa kuntata ga kwingila ga lwibi Luto lwa numba za Yehowa; Baruku asomine kigondi kya mukanda ku matuzi ma bantu bansania.
11 Gongule Mikaya mwana wa Gemaria, mwana wa Safanu ku moki mansania ma Yehowa mabezaga mu wozo mukanda, 12 agelile ku numba za mwangati nu eingide mu busio bwa musanzi mwabezaga mwikala bangati bansania; Elisama musanzi, nu Delaya, mwana wa Semaya, nu Elnatani, mwana wa Akibori, nu Gemaria, mwana wa Safanu, nu Zedekia, mwana wa Hanania, gamozi n'ingo mitonge. 13 Nu Mikaya asambede bitondo binsania byongule kubyo gasomaga Baruku mukanda ku matuzi ma bantu. 14 Nu bangati bansania basingile Yehudi mwana wa Netania mwana wa Selemia, nu mwana wa Kushi ku Baruku kumusambalila bunee: “Kata kigondi kya mukanda u wasomine ku matuzi ma bantu mu maboko mobe, nu vwa nako.” Ububo Baruku, mwana wa Neria, akatile wozo mukanda mu maboko mage nu endile kuli bangati. 15 Nubo bamubwide bunee: “Ikala kano kaluma, tukukusega, usome ku matuzi meitu.” Nu Baruku agusomine ku matuzi mabo.
16 Gabongule ku bitondo bibyo binsania, balolenne na boba, nu babwide Baruku bunee: “Lebelebe twatunganana kusambala ku mwangati bitondo bibino binsania.” 17 Nu babuzizie lingo Baruku bunee: “Tutende buni buwavwamine kusanza bitondo bibino? Ndi Yeremia abitendile na kanua kage?”
18 Baruku abakwide bunee: “Ee, Yeremia antendile bitondo bibino binsania na kanua kage nu nabisanzile na bwino mu kigondi kya mukanda.”
19 Nu bangati bansania bamutendile bunee: “Enda wibise, uwe nu Yeremia. Muntu unsania ntamenye gamuli!” 20 Kumbusa kwa kubika kigondi kya mukanda mu busio bwa Elisama musanzi, bendile kuli mwangati ga mulungu; basambede bitondo bibino ku matuzi mage.
Mwangati Yoyakimu agisia mukanda
21 Nu mwangati asingile Yehudi ende kutola kikyo kigondi kya mukanda; nu we akitolile mu busio bwa Elisama musanzi; avule nakyo nu akisomine ku matuzi ma mwangati, nu ku matuzi ma bansania bemenne lwabusio lwage. 22 Mwangati abezaga eikala mu numba zage mu bindi bya mpego, mu mwezi wa mubula, nu gago gabezaga mutula wa keiya lwabusio lwage. 23 Nu gabede Yehudi es'asoma nsamba isatu aba inazi, mwangati awatile na mwene wa musanzi nu awisile ga keiya aba nu kigondi kinsania kyasilile kugia. 24 Mwangati nu bakiti bage bansania, babo bongule ku bibyo bitondo binsania, tabakule boba aba kakeke, aba tabatile nsulu zabo. 25 Aba Elnatani, nu Delaya, nu Gemaria basegile mwangati buno ntagisie wozo mukanda, tondo ntazigile kubongwilila.
26 Mwangati akakizizie Yerameli, mwana wa mukota, nu Semaya, mwana wa Azirieli, nu Selemia, mwana wa Abudieli, bakate Baruku, musanzi, nu Yeremia, sankoga; tondo Yehowa ababisile.
Yeramia asanza mukanda lingo
27 Gasilile mukota kugisia kigondi kya mukanda wa bitondo binsania byasanzile Baruku ku kanua ka Yeremia, iyuki lya Yehowa lyabaside Yeremia, kutenda bunee: 28 “Tola kingo kigondi kya mukanda usanze mukyo bitondo binsania bitangi, u bibyo byasanzwa mu mukanda mutangi, byagisizie Yoyakimu mwangati wa Yuda. 29 Lingo watenda Yoyakimu, mwangati wa Yuda buno, bubuno u bwatenda Yehowa bunee: ‘Wagisizie wono mukanda, nu kutenda bunee: “Kubuni wasanzile mugo buno mukota wa Babeli avwe lebelebe kugisia mwino wono nu kuzikya bantu nu nyama mugo?” 30 Ububo, Yehowa atenda bubuno ku kabamba ka Yoyakimu, mwangati wa Yuda bunee: “Ntabe na muntu wa kwikala mu kisumbi kya bukota bwa Davidi, nu kitumba kyage kiswe kumbuga, ku muzuzo mukali wa busi, nu ku mpego nkali za kindi. 31 Namusungie nu bana bage nu bakiti bage ku kabamba ka mibi zabo; nu nabalusizie, bo nu bakwikalaga mu Yerusalema nu bantu ba Yuda, nsungio insania zinatendile kubeli, kubuno tabannungwilide.”’”
32 Nu Yeremia atolile kingo kigondi kya mukanda, nu akikasile ku Baruku, mwana wa Neria, musanzi, nu we asanzile bitondo binsania byatukile ku kanua ka Yeremia, byagisizibwe mu keiya na Yoyakimu, mwangati wa Yuda. Nu bingo bitondo byingi byatalikidwe mugo.