Lwanzo lwa baRekabu
35
1 Mu bindi bya Yoyakimu, mwana wa Yosia, mwangati wa Yuda iyuki lya Yehowa lyabaside Yeremia kutenda bunee: 2 “Enda ku kikanga kya baRekabu tenda nabo, nu vwa nabo ku numba za Yehowa mu busio bumozi nu bakase maku, banue.” 3 Ububo, natolile Yazania, mwana wa Yeremia, mwana wa Abazinia, nu mibuto zage nu bana bage bansania nu bansania ba kikanga kya Rekabu. 4 Navule nabo ku numba za Yehowa mu busio bwa bana ba Haruni, mwana wa Igidalia, muntu wa Kalaga, bwabezaga bwigi na busio bwa bakota, nu bwabezaga gantata ga busio bwa Maseya, mwana wa Salumu, mulangi wa lwibi.
5 Ububo nabikile malega meiyala na maku nu bituma, lwabusio lwa kikanga kya baRekabu, nu nabatendile bunee: “Nuazi maku.” 6 Tondo banakwide bunee: “Tatukunua maku, kubuno Yonadabu, mwana wa Rekabu, tateiswe, atukakizizie bunee: ‘Tamunue maku, inyuwe aba bana beinyu ku milyalya, 7 lingo tamobake numba, tamuyike mbuto, aba tamuyike mizabibu; aba tamube nazo. Tondo mwikale mu numba za hema bindi byeinu binsania, buno mulame bindi byingi mu kisi kimukwenda mukyo anga bageni.’ 8 Nu tukwanzaga iyuki lya Yonadabu, mwana wa Rekabu, tateiswe mu binsania byatukakizizie. Tatukunuaga maku mu bindi byeitu binsania, iswe nu bakikulu beitu, nu basikila beitu, nu bakinga beitu; 9 aba tatukobakaga numba za kwikala muzo, tatukubezaga na mizabibu aba masoa aba mbuto. 10 Tukwikalaga mu numba za hema, nu tukwanzaga binsania byatukakizizie tateiswe Yonadabu. 11 Tondo geingide Nebukadneza mukota wa Babeli mu kisi kikino, twatendile bunee: ‘Vwazi! Twendazi ku Yerusalema kutina iyombo lya baKaldea, nu lya baAramu,’ bubo twikede mu Yerusalema.”
12 Nkungu zezo iyuki lya Yehowa lyabaside Yeremia kutenda bunee: 13 “Bubuno u bwatenda Yehowa, Mwiya Mayombo, Kalaga wa Israeli bunee: ‘Enda nu tenda baYuda nu bakwikalaga mu Yerusalema bunee: “Ndi tamukuziga kwitabizia meigisia nu kungwilila ku moki mane?” u bwatenda Yehowa. 14 “Yonadabu, mwana wa Rekabu, akakizizie bana bage buno tabanue maku, banzile ikakizio lilyo, aaba nu lelo tabakunua maku, kubuno banzile milembe z'isibo. Tondo natendile n'inyu mambizi meingi nu tamwannungwilide. 15 Lingo nasingile mambizi meingi, bakiti bane bansania balengania kumuli kutenda bunee: ‘Na muntu kumuli asubye kano kaluma kutuka mu nzila zage mbi nu kulongeka makitilo meinyu; tamuyange tungo tulaga aba kutukitila, buno mwikale mu kisi kikino kinamukasile, nu basoinyuwe.’ Tondo tamwantegekede, aba kunnungwa. 16 Bana ba Yonadabu, mwana wa Rekabu, bazindilizizie ikakizio ly'isibo lyabakakizizie. Tondo bantu babano tabannanzile.”
17 Kalaga Yehowa, Mwiya Mayombo, Kalaga wa Israeli atenda bunee: “Ungwililazi! Nalusie bubi bunsania bunatendile ku Yuda nu ku bansania beli mu Yerusalema, kubuno natendile nabo nu tabongwilide, nabamanine nubo tabanitabizizie.”’”
18 Nu Yeremia abwide bantu ba kikanga kya Rekabu bunee: “Bubuno u bwatenda Yehowa, Mwiya Mayombo, Kalaga wa Israeli bunee: ‘Kubuno mwanzile ikakizio lya Yonadabu soinyuwe, nu kwanza makakizio mage mansania nu kukita binsania byamukakizizie,’ 19 umpanga Yehowa, Mwiya Mayombo, Kalaga wa Israeli atenda bunee: ‘Yonadabu, mwana wa Rekabu, nteide kuba na muntu wa kwemana lwabusio lwane aaba nu ku milyalya.’”