Bulengania ku Zedekia
34
1 Gabezaga Nebukadneza mukota wa Babeli nu iyombo lyage linsania gamozi na makota mansania ma kisi mabezaga kunsi kwa bwangato bwage nu bilongo byabo bakwitana na Yerusalema nu miino zago insania, iyuki lilino lyabaside Yeremia kutuka ku Yehowa kutenda bunee: 2 “Bubuno u bwatenda Yehowa, Kalaga wa baIsraeli bunee: ‘Enda ku Zedekia mwangati wa Yuda nu mutende bunee: “Yehowa atenda bunee: ‘Lola, nakasane mwino wono ku maboko ma mukota wa Babeli, nu we aguzikye na keiya. 3 Ntwone mu maboko mage, tondo lebelebe wakatwe nu wakaswe ku maboko mage, nu meiso mobe mamone ku mukota wa Babeli, nu watendane nage meiso ku meiso. Nu wende ku Babeli.’” 4 Ungwilila tugu iyuki lya Yehowa. Ee Zedekia, mwangati wa Yuda, bubuno u bukutenda Yehowa ku kabamba kobe, ntwakue na mwene wa nganda; 5 wakue mu bubobelelo. Nu anga bubabongezie baso bulago kubakasa lutanuno, bakota ba wakalazi babezaga lwabusio lwobe, bubo u bubakubongiebo ku lutanuno lwobe nubo bakulilile bunee: “Ee mukota, kabebe!” Kubuno batundile kitondo kikino,’ u bukutenda Yehowa.”
6 Nu Yeremia mulengania abwide Zedekia mwangati wa Yuda, bitondo bibino binsania mu Yerusalema, 7 gabezaga iyombo lya mukota wa Babeli likwitana na Yerusalema nu miino insania za Yuda zasigede, u Lakisi nu Azeka. Miino zezo u zasigede miino za Yuda ku zabezaga na mikolo.
Kukandulwa kwa bakobe
8 Iyuki lilino lyabaside Yeremia kutuka ku Yehowa kumbusa kwa nkungu zakitile Zedekia mwangati wa Yuda idagano na bantu bansania babezaga mu Yerusalema kubasambalila misagu za kukandulwa kwa bakobe, 9 buno muntu na muntu akandule mukobe wage muEbrania mukikulu aba wamulume; muntu unsania ntakitie muYuda kuba mukobe wage, kumukitila mulimo. 10 Nu bakota bansania nu bantu bansania beitabizizie idagano lilino buno bakandule bakobe babo bakikulu nu bamulume, buno tababe lingo bakandwa ku bukobe. Beitabizizie nu babakandwide. 11 Tondo kumbusa bagalukile, nu basubizie babo bakobe babakandwide nu bababikile lingo ku bukobe.
12 Nkungu zezo iyuki lya Yehowa lyabaside Yeremia lyatendile bunee: 13 “Yehowa, u Kalaga wa baIsraeli, atenda bunee: ‘Nakitile idagano na basoinyuwe busi bubo bunabatikizye mu kisi kya Misri mu numba za bukobe. Natendile bunee: 14 “Na kuzinda kwa myaka mutubakamo, muntu na muntu akandule muEbrania unsania wakunzisibwe kweli, kumbusa kwa kukukitila myaka mutuba, nti wamukandula; tondo basoinyuwe tabannungwilide aba tabategekede. 15 Tagetinga bindi byingi na gamugalukila kukita bwisanana lwabusio lwa meiso mane; nawe kumuli na wasambede musagu wa kukandulwa kwa mibuto zeinyu. Nu mwakitile idagano lwabusio lwane mu numba zeno zikumanwa mu izina lyane. 16 Tondo kano kaluma mwagaluka lingo nu kubenga nunse izina lyane; na muntu na muntu na wasubya mukobe wage wamulume nu mukikulu waakandwide kwenda anga bwatunda. Mwababika lingo kuba bakobe beinyu.”’”
17 Ububo Yehowa atenda bunee: “Tamwananzile; tamwasambede kukandulwa kwa mibuto zeinyu. Lola, kano kaluma nkusambala kukandulwa kumuli. Nne Yehowa natenda buno mwakandulwa kukua na mwene wa nganda, nu na nsambo nkali nu na munganda. Namubengie na makota mansania ma kisi. 18 Bantu batanzile idagano lyane nu batazindilizizie bitondo by'idagano libakitile lwabusio lwane, nabakite anga bukukitwa kyana kya ngombe kyatwa bibe bibe nu bantu kutabanga munkatini mwa bibe bibyo. 19 Bangati ba Yuda nu ba ku Yerusalema nu mitonge nu basankoga nu bantu bansania ba kisi babo batingile gasamba bibe bibili bya kyana kya ngombe, 20 nabakasana mu maboko ma beiti babo; mu maboko ma babo bakulonda kubeita. Bitumba byabo byabe idia lya tuzoni twa mpelela nu lya nyama za mu kisi. 21 Nu nakasane Zedekia mwangati wa Yuda nu mitonge zage ku beiti babo bakulonda kubeita, nu ku iyombo lya mukota wa Babeli lyendile bulazi n'inyu.” 22 Yehowa atenda bunee: “Namukakizie mulembe wane, nu basubye ku mwino wono, nubo beitane nago nu kugukata nu kugugisia na keiya. Nu nakite miino za Yuda kuba makindu geteli muntu kwikala muzo.”