Lonio lwa baIsraeli.
30
1 Iyuki lilino lyabaside Yeremia kutuka ku Yehowa kutenda bunee: 2 “Bubuno u bwatenda Yehowa, Kalaga wa Israeli bunee: ‘Sanza bitondo binsania binakubwide mu mukanda. 3 Kubuno, lola ku bindi bikuvwa, nakandule bantu bane ba Israeli nu ba Yuda kutuka ku bukobe,’ u bwatenda Yehowa; ‘nu nabasubye ku kisi kinakasile beisibo, buno bakyangate.’” 4 Kano kaluma bibino u bitondo byatendile Yehowa ku kabamba ka baIsraeli, nu ku kabamba ka Yuda. 5 Kubuno bubuno u bwatenda Yehowa bunee: “Iyuki lya boba likungubwako; lya boba nu ta lya bubobelelo. 6 Buzaniazi kano kaluma, nu mumone ndi wamulume anungwa lubaba lwa kubuta; kubuni kunkumona na wamulume na wabika maboko mage mu kibunda anga mukikulu uli na lubaba lwa kubuta; nu kubuni bilungi byeinyu byagaluka? 7 Kabebe! Kubuno bindi bibyo bili binene aba takuli kyasusanania nabyo; kubuno zili nkungu za tubebe twa Yakobo; tondo onibwe kutuka muto.
8 Yehowa, Mwiya Mayombo, atenda bunnee: ‘Mu bubo busi, nabungule kisanga kyabo kutuka ku makosi mabo, nu nakandule bikando byabo; aba tababe lingo bakobe ba bageni; 9 tondo bakitile Yehowa, Kalaga wabo, nu Davidi, mwangati wabo, u nazanzule ku kabamba kabo.’
10 Yehowa atenda bunee: ‘Nu ntukue boba, ee Yakobo, mukiti wane, aba ntuzangezange, ee Israeli; kubuno, lola, nakonie kutuka bulazi, nu ibuta lyobe kutuka ku kisi kya bukobe bwabo; nu Yakobo asubye, nu we abobelele nu kumunwa, aba takuli muntu wamwitie boba. 11 Kubuno nili gamozi nobe,’ u bwatenda Yehowa, ‘kukwonia; kubuno nazikye nunse bilongo binsania kunsania kunakubalanganizie, tugu nsyakuzikye nunse; tondo nakusungie mu bulili, aba nsyakusige geteli lusungio.’
12 Ku bubo Yehowa atenda bunee: ‘Mbabazio zobe tazinavwama kona, nu kyulu kyobe kili kinene. 13 Takuli muntu wa kukutendela; takuli muti wa kyulu kyobe aba wa kukwonia. 14 Bansania bakutundaga bakwibilila; tabakukutunda lingo; kubuno nakulibwide anga bunkulibula mwiti, ku lusungio lwa muntu mukali, ku kabamba ka bunene bwa bubi bobe, kubuno mibi zobe zabezaga zitila. 15 Kubuni kuukulila na mbabazio zobe? Mbabazio zobe tazone; ku kabamba ka bunene bwa bubi bwobe; kubuno bwagi bwobe bwitila, u bunakukitide bitondo bibino.
16 Nu bantu bansania bakulile, balibwe; nu beiti bobe bansania bende ku bukobe, nu babo bakunyagile banyagwe; nu babo bansania bakwitanizie, beitanibwe nubo. 17 Kubuno nakusubizie idunda, nu nonie byulu byobe,’ u bwatenda Yehowa; ‘kubuno bakumanine anga wisilwe bunee: “Eli Sayuni, utakutundwa na muntu.”’”
18 Bubuno u bwatenda Yehowa bunee: “Lola, nasubye lingo iguma lya numba za hema za Yakobo, nu nabe na kyombo ku biziki byage; nu mwino wobakwe lingo gantata bitundukutu byago wenyene, nu numba nnene zikale mu kiziki kyazo anga buzabezaga lingo. 19 Lingo kubeli kungubwe nimbo za kuganuna, nu iyuki lya bakuseka; nu nabitizie, aba tabakokoke, lingo nabakutye nu tabanyegwe. 20 Bana babo babe lwabusio lwane anga wakalazi, nu musanganano wabo wakundamane lwabusio lwane, nu nasungie bansania bakubabenga. 21 Nu musondelezia abe umozi mubeli nu mwangati wabo abe muntu wa kikanga kyabo; nu namulusie bwigi nu ankunde, kubuno nazi unageleka kukasana kalamo kage mu kunkunda?” u bwatenda Yehowa. 22 “Inyuwe mwabe bantu bane, nu nne nabe Kalaga weinyu.”