YEREMIA 29

Mikanda za Yeremia ku bakandwa ku Babeli

1 Kano kaluma bibino u bitondo bya mukanda wasingile Yeremia mulengania kutuka ku Yerusalema, ku basigede mu bakulu ba bakobe nu ku basankoga, nu ku balengania, nu ku bantu bansania, bekilwe na Nebukadneza ku bukobe kutuka ku Yerusalema nu kwenda ku Babeli. 2 Bubuno bwabede kumbusa kwa Yekonia mwangati, nu nina wa mwangati, nu mintembele, nu bakota ba Yuda nu ba Yerusalema, nu bakiti, nu batumbi ba byuma kutuka ku Yerusalema. 3 Mukanda wasingilwe mu kuboko kwa Elasa, mwana wa Safamu, nu Gemaria, mwana wa Hilkia, (Zedekia mwangati wa Yuda amusingile aaba nu ku Babeli, kwa Nebukadneza, mukota wa Babeli,) kutenda bunee: 4 “Bubuno u bwatenda Yehowa, Mwiya Mayombo, Kalaga wa Israeli, ku bantu bansania bekilwe ku bukobe, babo banasingile ku bukobe kutuka ku Yerusalema aaba nu ku Babeli bunee: 5 ‘Obakazi numba ningi, mwikale muzo; yikazi masoa, mulie matubulo mamo; 6 songazi bakikulu, mubute bana bamulume nu bamukazi; songelazi bana beinyu bakikulu, nu kusongia bakinga beinyu, buno babute bana bamulume nu bana bamukazi; mutalikilane kuko, tamukokoke. 7 Londazi bubobelelo ku mwino u namwigizie kugo ku bukobe, mugusegele ku Yehowa ku bubobelelo bwago, kubuno mu bubo bubobelelo mwamone bubobelelo nu inyuwe.’

8 Kubuno Yehowa, Mwiya Mayombo, Kalaga wa Israeli, atenda bunee: ‘Tamusige balengania beli munkatini mweinyu nu balaguzi kumwengelela, aba tamungwilile ndozi zimukukesia. 9 Kubuno bakumulenganizia bitondo bya buza ku izina lyane; nne nsyabasingile,’ u bwatenda Yehowa. 10 ‘Nkungu zikakukia Babeli myaka makumi mutubakamo, nti navwe kumulola nu kumwizazia n'idagano lyane lya mponga, kumusubya lingo ku kiziki kikino. 11 Kubuno nizi makengelo manakengede kumuli,’ u bwatenda Yehowa, ‘meli makengelo ma bubobelelo, nu ta ma bubi, kumukasa kilemanizio mu bindi byeinu bya lwabusio. 12 Ububo mwammane nu mwabase nu mwasege kundi, nu nne namungwilile. 13 Nu mwandonde, nu kummona, gamwandonde na mutima weinyu unsania. 14 Nu nne namoneke n'inyu,’ u bwatenda Yehowa, ‘nu namukandulile ku bukobe bweinyu, nu namukundamanie kutuka ku bilongo binsania nu ku biziki binsania binamupumbizie kubyo, nu namulusie lingo ku kiziki kikino kinamutikizye kukyo kwenda ku bukobe.’”

15 Kubuno mukutenda bunee: “Yehowa atuzanzulila balengania mu Babeli. 16 Bubuno u bwatenda Yehowa ku kabamba ka mwangati ukwikalaga mu kisumbi kya Davidi, ku kabamba ka bantu bansania bakwikalaga mu mwino wono; mibuto zeinyu zitendile gamozi n'inyu ku bukobe; 17 Yehowa, Mwiya Mayombo atenda bunee: ‘Lola nasinge mwene wa nganda kubeli, munganda, nu nsambo nkali, nu nabakite kuba anga kiguma kibi, kitanavwama kulibwa ku kabamba ka bubi bwakyo. 18 Nu nabayange na mwene wa nganda, na munganda, nu na nsambo nkali, nu nabasombie na makota mansania ma kisi, babe kintu kya kuswililwa, kya kukubwa masisi, kya kukugilwa, nu kya kubengwa, mu bilongo binsania binabapumbizie mubyo. 19 Kubuno tabongwilide bitondo byane, binabasingide mambizi mansania na bakiti bane balengania; tondo tabatundile kungwilila,’” u bwatenda Yehowa.

20 Ububo ungwililazi iyuki lya Yehowa, inyuwe bakobe bansania banekile kutuka ku Yerusalema aaba nu ku Babeli. 21 Bubuno u bwatenda Yehowa, Mwiya Mayombo, Kalaga wa Israeli, ku kabamba ka Ahabu, mwana wa Kolaya, nu ku kabamba ka Zedekia, mwana wa Maseya, bakumulenganizia bitondo bya buza ku izina lyane, bunee: “Lola, nabakasane mu maboko ma Nebukadneza, mukota wa Babeli, nu we abeite lwabusio lwa meiso meinyu. 22 Nu ku kitondo kyabo, kiswililo kyakitwe na bakandwa bansania ba Yuda beli ku Babeli, kutenda bunee: ‘Yehowa akukitile anga Zedekia, nu anga Ahabu, bazikizibwe na mukota wa Babeli mu keiya.’ 23 Kubuno bakitile bukongolo mu Israeli, bakitile butazi na bakikulu ba banyabo, batendile bitondo bya buza mu izina lyane, bintabakakizizie; nu nne nili wozo ukumenya, nu nili mulongeki,” u bwatenda Yehowa.

24 Nu ku Semaya, muNehelamu, tenda bunee: 25 “Bubuno u bwatenda Yehowa, Mwiya Mayombo, Kalaga wa Israeli bunee: ‘Kubuno wasingile mikanda ku izina lyobe uwenyene ku bantu bansania beli ku Yerusalema, nu ku Zefania, mwana wa Maseya sankoga, nu ku basankoga bansania, kutenda bunee: 26 “Yehowa akukitile kuba sankoga mu kiziki kya Yehoyada sankoga, buno ube mukiti mu numba za Yehowa, ku muntu na muntu uli muluba wibikile kuba mulengania, umwise mu kikando nu kukandwa na byuma. 27 Kano kaluma kubuni ntwazugide Yeremia wa Anatoti, wikitile kuba mulengania kumuli. 28 Kubuno atusingile ku Babeli kutenda bunee: ‘Bukobe bwabe bindi byingi; obakazi numba, mwikale muzo; yikazi masoa; mulie matubulo mamo?’”’”

29 Nu Zefania sankoga asomine mukanda wono mu matuzi ma Yeremia mulengania. 30 Iyuki lya Yehowa lyabaside Yeremia kutenda bunee: 31 “Singa musagu ku bakobe bansania kutenda buno bubuno u bwatenda Yehowa ku kitondo kya Semaya, muNehelamu bunee: ‘Kubuno Semaya amulenganizizie, tondo nsyamusingile, nu amukokomezizie kulemanina kitondo kya buza; 32 lebelebe nkusungia Semaya, muNehelamu, nu ibuta lyage; ntabe na muntu wikale mu bantu babano, aba ntamone ku busoga bunakitile bantu bane,’ u bwatenda Yehowa: ‘kubuno eigisizie bitondo bya kwagila Yehowa.’”