28
1 Gabede mu mwaka wa kulinga wa kwangata kwa Zedekia; mukota wa Yuda, mu mwaka w'inazi, mwezi w'itano, Hanania, mwana wa Azuri, mulengania wa ku Gibeoni, atendile na nne mu numba za Yehowa, lwabusio lwa basankoga nu bantu bansania bunee: 2 “Bubuno u bwatenda Yehowa, Mwiya Mayombo, Kalaga wa Israeli bunee: ‘Nabungula kisanga kya mukota wa Babeli. 3 Mu myaka ibili, nasubye ku kiziki kikino bintu binsania bya numba za Yehowa, byatolile Nebukadneza, mukota wa Babeli mu kiziki kikino, kubyeka ku Babeli. 4 Nu nne nasubye Yekonia mu kiziki kikino, mwana wa Yoyakimu, mukota wa Yuda gamozi na bakandwa bansania ba Yuda, bendile ku Babeli,’ u bwatenda Yehowa; ‘kubuno nabungule kisanga kya mukota wa Babeli.’” 5 Kusila Yeremia mulengania, abwide Hanania mulengania, lwabusio lwa basankoga, nu lwabusio lwa bantu bansania babezaga bemana mu numba za Yehowa, 6 atendile bunee: “Amina, Yehowa akite bubo; Yehowa azindilizie bitondo byobe biwalenganizie, kusubya ku kiziki kikino, bintu bya numba za Yehowa nu bakobe bansania kutuka ku Babeli. 7 Tondo ungwilila, kano kaluma, iyuki linkutenda ku matuzi mobe, nu ku matuzi ma bantu bansania. 8 Balengania babo babezaga lwabusio lwane nu lwabusio lwobe wakalazi, balenganizie ku bisi byingi, nu ku makota manene, bita, munganda, nu nsambo nkali. 9 Tondo mulengania ukulengania misagu za bubobelelo, nti amoneke buno eli mulengania wa lebelebe wasingilwe na Yehowa, ndi bulengania bwage bwazindilila.”
10 Ububo mulengania Hanania atolile kisanga kyabezaga mu ikosi lya Yeremia, nu akibungwide. 11 Nu Hanania atendile lwabusio lwa bantu bansania bunee: “Bubuno u bwatenda Yehowa bunee: ‘Bubo u bunabungule, myaka ibili tazikuka, bisanga bya Nebukadneza, mukota wa Babeli, kutuka ku ikosi lya bilongo binsania.’” Nu mulengania Yeremia endile.
12 Nkungu nkeke tugu kumbusa kwa Hanania kubungula kisanga kyabezaga mu ikosi lya mulengania Yeremia, iyuki lya Yehowa lyabaside Yeremia kutenda bunee: 13 “Enda utende Hanania bunee: ‘Bubuno u bwatenda Yehowa bunee: “Wabungula bisanga bya muti; tondo wakite mu kiziki kyabyo bisanga bya byuma. 14 Kubuno Yehowa, Mwiya Mayombo, Kalaga wa Israeli, atenda bunee: ‘Nabika kisanga kya kyuma mu ikosi lya bantu bansania ba kikino kilongo buno bakitile Nebukadneza, mukota wa Babeli; nu bamukitile; nu lingo namukasa nyama za kisi.’”’”
15 Kusila mulengania Yeremia abwide mulengania Hanania bunee: “Ungwilila, kano kaluma, ee Hanania; Yehowa ntakusingile; tondo walenganizie ku bantu babano bitondo bya buza. 16 Ububo Yehowa atenda bunee: ‘Lola, nkukutikya mu kisi; mwaka wono ukukua, kubuno wigisizie bitondo bya kuguna Yehowa.’”
17 Nu mulengania Hanania akule mu mwaka wozo ku mwezi wa mutubakamo.