YEREMIA 27

Yeremia akulengania ku kukandwa kwenda ku Babeli.

1 Mu kulinga kwa kwangata kwa Yoyakimu, mwana wa Yosia, mwangati wa Yuda, kitondo kikino kyabaside ku Yeremia kutuka ku Yehowa, kutenda bunee: 2 “Yehowa atenda bunee: ‘Ikitile bikando nu kisanga nu bika byo mu ikosi lyobe. 3 Kusila singa musagu ku mukota wa Edomu, ku mukota wa Moabu, ku mukota wa bana ba Amori, ku mukota wa Tiro, nu ku mukota wa Sidoni, na migenzi zabasile ku Yerusalema kwa Zedekia, mwangati wa Yuda. 4 Nu bakakizie bende ku bakota babo, batende buno bubuno u bwatenda Yehowa, Mwiya Mayombo, Kalaga wa Israeli bunee: “Bubo u bumutenda bakota beinyu: 5 Nne u wabumbile kisi kikino, bantu nu nyama beli gantata ga kisi, ku magala mane manene, nu ku kuboko kwane kwalambibwa; nu nkukikasana ku bantu anga bwantananina. 6 Nu kano kaluma nakasana kisi kikino kinsania mu kuboko kwa Nebukadneza, mukota wa Babeli, mukiti wane; namukasa nu nyama za mu lubanda kumukitila. 7 Nu bilongo binsania byamukitile, we, nu mwana wage, nu muyukulu wage, aaba nu gakuke nkungu za kisi kyage wenyene, nu bilongo byingi nu bakota banene bamukite kuba mukiti wabo. 8 Nu kwabe buno, kilongo kikyo aba bukota butatunde kukitila Nebukadneza, mukota wa Babeli, nu wozo utabikage ikosi mu kisanga kya mukota wa Babeli, nasungie kikyo kilongo na mwene wa nganda, na munganda, nu na nsambo nkali, u bwatenda Yehowa, aaba nu ganakizikya ku kuboko kwage.

9 Tondo, kumuli, tamungwilile balengania beinyu, balaguzi beinyu, ndozi zeinyu, bagila beinyu, aba baganga beinyu, bakumubula buno tamwakitile mukota wa Babeli; 10 kubuno bakumulenganizia buza, buno bamutikye bulazi na kisi kyeinyu, nimupumbie, nu muzike. 11 Tondo kilongo kikyo kyabike makosi mabo mu kisanga kya mukota wa Babeli, nu kumukitila, kilongo kikino nakisige kikale mu kisi kyabo bobenyene, u bwatenda Yehowa, nubo balime, nu kwikala munda mwakyo.”’”

12 Kusila natendile bitondo anga bibino binsania ku Zedekia, mwangati wa Yuda, bunee: “Bikazi makosi meinyu mu kisanga kya mukota wa Babeli, mumukitile we nu bantu bage, nu mulame. 13 Kubuni ku ukukua, uwe nu bantu bobe ku mwene wa nganda, ku munganda, nu ku nsambo nkali, anga bwatendile Yehowa ku kilongo kikyo kitatunde kukitila mukota wa Babeli? 14 Aba tamungwilile bitondo bya balengania bakumusambalila buno tamwakitile mukota wa Babeli, kubuno bakumulenganizia buza. 15 ‘Kubuno nne nsyabasingile,’ u bwatenda Yehowa, ‘tondo bakulengania buza ku izina lyane; buno nimubasie kumbuga nu muzike, inyuwe nu balengania babano bakumulenganizia.’”

16 Lingo natendile ku basankoga nu bantu bansania bunee: “Yehowa atenda buno tamungwilile bitondo bya balengania beinyu bakumulenganizia bunee: ‘Lola, bintu bya numba za Yehowa byalusibwe lingo kumbusa kwa nkungu nkeke kutuka ku Babeli;’ kubuno bakumulenganizia buza. 17 Tamubongwilile; mukitile mukota wa Babeli nu mulame; kubuni mwino wono ube bukindu? 18 Tondo ndi beli balengania, nu ndi iyuki lya Yehowa lili mubeli, sigazi basege Yehowa, Mwiya Mayombo, buno bintu byasigede mu numba za Yehowa nu mu numba za mukota wa Yuda nu mu Yerusalema tabyende ku Babeli.

19 Kubuno Yehowa, Mwiya Mayombo atenda bunee: ‘Ku kabamba ka mango, ku kabamba ka kibungulu kya nsubi, ku kabamba ka bikalilo nu ku kabamba ka byasigala ku bintu mu mwino wozo, 20 bitatolile Nebukadneza, mukota wa Babeli, nkungu zekile Yekonia, mwana wa Yoyakimu, mukota wa Yuda ku bukobe, kutuka ku Yerusalema aaba nu Babeli, gamozi na mitonge insania za Yuda, nu Yerusalema, 21 lebelebe Yehowa, Mwiya Mayombo, Kalaga wa Israeli, atenda bunee: “Ku kitondo kya bintu byasigala mu numba za Yehowa, nu mu numba za mukota wa Yuda, nu mu Yerusalema; 22 byekwe ku Babeli, nu byabe kuko aaba nu ku busi bunavwe kubilonda,” u bwatenda Yehowa, “kusila nabilusie nu kubisubania lingo ku kino kiziki.”’”