Bakota bakutunda kwita Yeremia.
26
1 Kulinga kwa kwangata kwa Yoyakimu, mwana wa Yosia, mwangati wa Yuda, kitondo kikino kyatukile ku Yehowa, kutenda bunee: 2 “Bubuno u bwatenda Yehowa bunee: ‘Emana ga kibanza kya numba za Yehowa nu tenda ku miino insania za Yuda, bakuvwa buno bakumbamine mu numba za Yehowa; tenda nabo bitondo binsania binakukakizizie kubatenda, ntusige kitondo kimozi: 3 embe bongwe, nu kugaluka na muntu kusiga nzila zage mbi; buno nimone kugalukya mutima ku mibi zinakengede kubakitila ku kabamba ka bubi bwa misako zabo.’ 4 Nu wababule buno bubuno u bwatenda Yehowa bunee: ‘Ndi tamukutunda kunnungwa, kutabanga mu milembe zane zinababikide lwabusio lweinyu, 5 kungwilila bitondo bya bakiti bane balengania, banasingile kumuli mambizi mansania tamwabongwilide; 6 nakite numba zeno kuba anga Silo, nu mwino wono nagukite kuba kiswililo ku bilongo binsania bya kisi.’”
7 Basankoga, nu balengania, nu bantu bansania bongule Yeremia gaatendaga bitondo bibino mu numba za Yehowa. 8 Nu gabede Yeremia asila kutenda bitondo binsania byamubwide Yehowa kusambala ku bantu bansania, basankoga nu balengania nu bantu bansania bamukatile, batendile bunee: “Watunganana kukua! 9 Kubuni ukulengania ku izina lya Yehowa, kutenda bunee: ‘Numba zeno zabe anga Silo, nu mwino wono wabe bukindu, geteli muntu kwikala mugo?’” Bantu bansania bakundamanine Yeremia mu numba za Yehowa.
10 Nu nkungu zongule bakota ba Yuda ku misagu za bitondo bibino, batukile mu numba za mukota, babakamine aaba nu ku numba za Yehowa; beikede mu kiziki kya kwingila ku lwibi luto lwa numba za Yehowa. 11 Ububo basankoga, nu balengania babwide bakota nu bantu bansania, batendile bunee: “Muntu wono atananina kukua, kubuno akulengania mu mwino wono, anga bumungwa ku matuzi meinyu.”
12 Kusila Yeremia abwide bakota bansania nu bantu bansania bunee: “Yehowa ansingile kulengania ku bubi ku numba zeno, nu ku mwino wono, bitondo bibino binsania bimukungwa kubyo. 13 Kano kaluma, longekazi nzila zeinyu, nu makitilo meinyu, ungwililazi iyuki lya Yehowa, Kalaga weinyu, nu We Yehowa eisungule kutakita bubi bwatendile kumuli. 14 Tondo kundi, lolazi, nili mu maboko meinyu; nkitilazi kinsania kimukumona kili kisoga nu kisanana. 15 Tondo, menyazi tugu buno, ndi mwanita, nti mwidusizia mubenyene mikila ziteli na katati, kumuli nu ku mwino wono, nu ku bakwikala mugo; kubuno lebelebe Yehowa ansingile kumuli, kumusambalila bitondo bibino binsania bimukungwa kubyo.”
16 Ububo bakota nu bantu bansania babwide basankoga, nu balengania, batendile bunee: “Muntu wono ntatananina kukua; kubuno akutenda n'iswe mu izina lya Yehowa, Kalaga weitu.”
17 Bamozi ku bakulu ba kisi bazanzukile nu kutenda ku musanganano unsania wa bantu bunee: 18 “Mika, muMoreseti alenganizie mu bindi bya Hezekia, mwangati wa Yuda, nu atendile ku bantu bansania ba Yuda, buno bubuno u bwatenda Yehowa, Mwiya Mayombo bunee: ‘Sayuni alimwe anga isoa, nu Yerusalema abe bukindu, nu mwiduko wa numba za Yehowa wabe anga kiziki kyasakama kwigulu mu lubanda.’ 19 Ndi Hezekia, mwangati wa Yuda, nu bantu bansania ba Yuda, beitile Mika? Ndi ntakule Yehowa boba, nu kusega Yehowa, nu We Yehowa kwisungula buno, ntakite bubi bubo bwatendile kubeli? Tondo iswe tuneikitide bwagi bunene tubenyene.”
20 Lingo, kwabezaga ungo muntu walenganizie mu izina lya Yehowa, Uria, mwana wa Semaya, wa Kiriati-Yearimu; we alenganizie ku bubi ku mwino wono, nu ku kisi kikino, bumozi na bitondo binsania bya Yeremia. 21 Gongule mwangati Yoyakimu, nu bantu bage bansania ba bita, nu bakota bage bansania, ku bitondo byage, mukota alondile kumwita; tondo gongule Uria ku musagu wongo, akule boba, atinine nu endile ku Misri. 22 Nu mwangati Yoyakimu asingile bantu ku Misri, Elnatani, mwana wa Akibori, nu bango bantu gamozi nage kwenda ku Misri. 23 Batolile Uria ku Misri nu kuvwa nage ku mwangati Yoyakimu. Amwitile na mwene wa nganda nu kwisa kitumba kyage mu nsinda za bantu beteli na lwanzo.
24 Tondo kuboko kwa Ahikamu, mwana wa Safamu, kwabezaga gamozi na Yeremia, bubo tabamubikile mu maboko ma bantu buno bamwite.