24
1 Kumbusa kwa Nebukadneza, mukota wa Babeli, kukata Yekonia, a mwana wa Yoyakimu, mukota wa Yuda ku bukobe, nu bakota ba Yuda, gamozi na bakiti basoga nu batumbi ba byuma, kutuka ku Yerusalema nu kubalusia ku Babeli, Yehowa andolesizie buno lola, nzi ibili za tini zabikwa lwabusio lwa kiziki kya Yehowa. 2 Luzi lumozi lwabezaga na tini nsoga nunse, anga tini zalinga kwela; nu lungo luzi lwabezaga na tini mbi, zitanavwama kulibwa, kubuno zili mbi nunse. 3 Yehowa ambwide bunee: “Yeremia, kikizi kiwamonako?”
Natendile bunee: “Namona ku tini; tini nsoga, nsoga nunse; nu tini mbi, zili mbi nunse, zitanavwama kulibwa, kubuno zili mbi nunse.”
4 Kusila iyuki lya Yehowa lyambaside, kutenda bunee: 5 “Bubuno u bwatenda Yehowa, Kalaga wa Israeli bunee: ‘Anga zeno tini nsoga, bubo u bunalole bakobe ba Yuda, banatikizye mu kiziki kikino, bende ku kisi kya baKaldea, bamone busoga. 6 Kubuno nabike meiso mane kubeli ku busoga, nu nabalusie mu kisi kikino lingo; nu nabobake, aba nsyabasambule; nabayike aba nsyabayule. 7 Nu nne nabakase mutima wa kummenya, buno nne nili Yehowa; nubo babe bantu bane, nu nne nabe Kalaga wabo; kubuno basubye kundi na mitima zabo nunse.
8 Tondo anga tini zitanavwama kulibwa, kubuno zili mbi nunse; lebelebe,’ u bwatenda Yehowa: ‘bubo u bunatole Zedekia, mukota wa Yuda, nu bakota bage, nu basigala ku Yerusalema, basigede mu kisi kikino, nu babano bakwikalaga mu kisi kya Misri. 9 Nu nabakite kuba kitondo kya masisi nu babi mu makota mansania ma kisi, babe anga kintu kya kusombwa, nu kya nsumo, kyakwililikwa, nu kya kiswililo, mu biziki binsania binababalanganizie. 10 Nu nne nasinge mwene wa nganda, munganda, nu nsambo nkali munkatini mwabo, aaba nu gabazike mu kisi kinabakasile, bo nu beisibo.’”