Iyano ku bakota ba Yuda
22
1 Yehowa atenda bunee: “Gela ku numba za mwangati wa Yuda, utende kitondo kikino kuko. 2 Tenda bunee: ‘Ungwilila iyuki lya Yehowa, ee mwangati wa Yuda; uwe wikede ga kisumbi kya bukota bwa Davidi, uwe nu bakiti bobe, nu bantu bobe bakwingila ku lwibi luluno; 3 Yehowa atenda bunee: “Kitazi na bulili nu kwisanana, oniazi wozo wasila kunyagwa mu kuboko kwa wozo ukumusungia. Lingo, tamukite mibi ku mugeni, aba nkubi aba musigala, aba tamubakitile kabenga, aba tamubasie mikila za muntu uteli na kabamba mu kiziki kikino. 4 Kubuno ndi mwakita bitondo bibino lebelebe, bakota beingile ku lwibi lwa numba zeno, zikwikalaga mu bakota ku kisumbi kya bukota bwa Davidi, babakama ga tuyanga nu farasi, we nu bakiti bage nu bantu bage. 5 Tondo ndi tamwaziga kwanza ku bitondo bibino, nne nalumbila ku mutima wane,” u bwatenda Yehowa; “buno numba zeno zikuba bukindu.”’” 6 Ku bubo Yehowa atenda bubuno, ku kabamba ka numba za mukota wa Yuda bunee: “Uli anga Gileadi kundi, nu anga itoe lya Lebanoni; lebelebe nakukite kuba anga kalula, nu anga miino ziteli na bantu. 7 Nu nne nakulongekele kayikayika bantu kukuzikya, muntu na muntu na ngabo zage; nubo basese mierezi zobe zasombwedwe nu kuzisa ga keiya. 8 Nu bilongo byingi byatinge bwigi na mwino wono, nubo batendane na muntu na muntu ku munyage bunee: ‘Kubuni kwakita Yehowa mwino wono munene bubuno?’ 9 Nubo bakule bunee: ‘Kubuno basigile idagano lya Yehowa, Kalaga wabo, nu bakukumbamina tungo tulaga, nu kutukitila.’”
10 Tamulilile wozo wakua aba kukengela kuzimina nage; tondo mulilile wozo wekwa ku bukobe kubuno ntakusubya lingo aba ntakamona lingo ku kisi kyage kya kubutwa. 11 Kubuno Yehowa atenda bubuno ku kabamba ka Salumu, mwana wa Yosia, mukota wa Yuda; wiyanine mu kiziki kya Yosia, isi, we watukile ku kiziki kikino bunee: “Ntasubye kuko lingo; 12 tondo mu kiziki kikyo kibamwekile mukobe u gago gaakwile, nu ntamone ku kino kisi lingo.”
13 Yehowa akutenda bunee: “Kabebe ku wozo ukobaka numba zage ku bwagi! Nu masio mage ku bwengelezi! Wozo ukukitia munyage mulimo geteli kumuliga, nu ntakumuliga lukalilo lwage. 14 Wozo ukutenda bunee: ‘Nobake numba nnene zili na masio masambasamba kiziki, nu we amakite na madilisa; makukilwa na mbavu za mierezi, nu kubongibwa idangi lyakisimana.’
15 Ndi wangate kubuno wiyobakide numba za mierezi? Ndi so ntaliaga nu kunua, nu kukita bulili nu kwisanana? Gago eikalile busoga.” 16 Yehowa atenda bunee: “Asungizie bitondo bya bazambi nu mwiyanizi; gago u gaamonine busoga; ndi kukuno ta kummenya? 17 Tondo meiso mobe nu mutima wobe ukutunda tugu kukubula mikila ziteli na katati, kusungia nu kunyaga.”
18 Ububo Yehowa atenda ku kabamba ka Yoyakimu, mwana wa Yosia, mukota wa Yuda bunee: “Tabamulilile bunee: ‘Ee! Mubuto wane;’ aba ‘Ee! Mubitu wane;’ aba tabamulilile bunee: ‘Ee! Mukota wane;’ aba, ‘Ee! Lutanuno lwage.’ 19 Ayikwe anga bukuyikwa mpunda, abulutwe nu kwiswa kumbuga kwa lwibi lwa Yerusalema. 20 Bakama ku Lebanoni nu lila; laluka n'iyuki lyobe mu Basani, lila kutuka ku Abariamu; kubuno batundwa bobe bansania bazika.
21 Natendile nobe mu nkungu za bubobelelo bwobe; tondo watendile bunee: ‘Nsikutunda kungwa.’ Luluno u lukita lwobe kutukila busikila bwobe, kutanza iyuki lyane. 22 Lumpumpu lwise balangi bobe bansania bulazi, nu batundwa bobe bende ku bukobe; lebelebe nkungu zezo wamone nsoni nu kuzangazanga ku kabamba ka bubi bwobe bunsania. 23 Uwe ukwikala mu Lebanoni, ukukita numba za mbavu za mierezi, manga mawatonge gakubasile mbabazio; mbabazio zili anga za mukikulu ukubuta.
24 ‘Anga bunkulama,’ u bwatenda Yehowa, ‘aba Konia, mwana wa Yoyakimu, mukota wa Yuda, abezaga anga kakomu ka kakengelezio mu kuboko kwane kwa seidume, ninamutikizye muko. 25 Nu nakukasane mu maboko ma babo bantu bakulonda kalamo kobe, nu mu maboko ma babo bokukua boba, aba mu maboko ma Nebukadneza, mukota wa Babeli, nu mu maboko ma baKaldea. 26 Nakwise, uwe nu nyoko wakubutile, ku kingo kisi kyutabutilwe mukyo, nu inyuwe mwakue kuko. 27 Tondo mu kisi kikyo kibakutunda kusubya mukyo tabasubye nunse mukyo.
28 Ndi wono Konia eli kintu kikubengwa nu kubunguka? Ndi eli kintu kitakutananizia? Kubuni kubeiswa, we nu ibuta lyage mu kisi kibateizi? 29 Ee kisi, kisi, kisi, ungwa iyuki lya Yehowa. 30 Yehowa atenda bunee: “Sanzazi misagu za muntu wono buno nteli na bana, muntu utabobelela mu bindi byage binsania; kubuno takuli muntu mu ibuta lyage ukabobelela, kwikala mu kisumbi kya bukota bwa Davidi, aba kwangata lingo mu Yuda.”’”