YEREMIA 21

1 Kitondo kikino kyabaside Yeremia, kutuka ku Yehowa, nkungu zezo mwangati Zedekia asingile Pashuri mwana wa Malkiya, nu Zefania mwana wa Maseya, sankoga kutenda bunee: 2 “Buzia Yehowa ku kabamba keitu, tukukusega; kubuno Nebukadneza, mukota wa Babeli, alusia bita kutuli; embe Yehowa atukitile kimozi kya miganogano, buno mwiti atubembuke.”

3 Nu Yeremia ababwide bunee: “Tendazi Zedekia kitondo kikino, 4 Yehowa, Kalaga wa Israeli atenda bunee: ‘Lolazi, nasubye ngabo zili mu maboko meinyu kumbusa, zimukusakya na mukota wa Babeli, nu baKaldea, bamutimba kumbuga kwa bitutu byeinyu, nu nne nazikundamanie gamozi munkatini mwa mwino wono. 5 Nu nnenyene nasake n'inyu ku kuboko kwalambibwa nu ku kuboko kwa magala, aba ku bongoa, nu bukali, nu ku nsungio ningi. 6 Nu nne nalibule babo bakwikala mu mwino wono; bantu nu nyama bansania bakue na lusambo lubi. 7 Nu kumbusa kwa bitondo bibino,’ u bwatenda Yehowa, ‘nakasane Zedekia, mukota wa Yuda, nu bakiti bage, nu bantu bage bansania basigede mu mwino wono, kumbusa kwa lusambo lulo lubi, nu mwene wa nganda, nu munganda, mu maboko ma Nebukadneza, mukota wa Babeli, nu mu maboko ma beiti babo, nu mu maboko ma bantu babo bakulonda tulamo twabo; nu we abeite na bukali bwa mwene wa nganda, ntabasigilile, aba ntabakwile kyombo, aba mponga.’

8 Tenda lingo bantu babano buno bubuno u bukutenda Yehowa bunee: ‘Lola, nabika lwabusio lweinyu nzila za kalamo, nu nzila za lukuo. 9 Unsania wikalage mu mwino wono akue na mwene wa nganda, na nzala, nu na lusambo lubi; tondo unsania watuke, kwenda gamozi na baKaldea bakumutimba ku bita nti alame, nu nti onia kalamo kage. 10 Kubuno nabika meiso mane ku mwino wono ku bubi, aba ta ku busoga,’ u bwatenda Yehowa, ‘ukubikwa mu maboko ma mukota wa Babeli; nu we akuguzikya na keiya.’

11 Ububo inyuwe ba numba za mukota wa Yuda, ungwililazi iyuki lya Yehowa, 12 ee numba za Davidi, bubuno u bwatenda Yehowa bunee: ‘Kita na bulili na busi na busi; onia muntu wasila kunyagwa mu kuboko kwa wozo ukumusungia. Ndi tabubo nti bongoa bwane bwabange anga keiya ku bubi bwasila kukitwa nu takwabe muntu wavwame kukazimia, ku kabamba ka bubi bwa misako zeinyu. 13 Lola, nne nili gantata gobe, ee bakwikalaga mu mpinga, nu kiziki kya nanda za kwigulu,’ u bwatenda Yehowa; ‘inyuwe bakutenda bunee: “Eli nazi wagele kusaka n'iswe? Aba nazi wingile mu kiziki kyeitu?” 14 Tondo namusungie kuyangana na makitilo meinyu,’ u bwatenda Yehowa: ‘nu nne nabangie keiya mu lubanda lweinyu, nuko kagisie binsania byamutimba.’”