20
1 Nu Pashuri sankoga, mwana wa Imeri, wabezaga mwemanizi munene mu numba za Yehowa, ongule ku Yeremia gaabezaga akusambala bitondo bibino. 2 Ububo Pashuri alibwide Yeremia mulengania, amwisile mu kikando kyabezaga ku lwibi lwa gantata lwa Benjamina, mu numba za Yehowa. 3 Nu gabede nindunindu, Pashuri atikizye Yeremia mu kikando. Nu Yeremia amubwide bunee: “Yehowa ntakumane lingo Pashuri, tondo Magori-Misabibu. a 4 Kubuno Yehowa atenda bunee: ‘Lola, nkukwitia boba bunene ku mutima wobe, nu ku beida bobe bansania; nubo bagoe ku mwene wa nganda wa beiti babo, nu meiso mobe mamone ku bitondo bibino: nu nne nabike Yuda unsania mu maboko ma mukota wa Babeli, nu we abeeke kukandwa ku Babeli, nu kubeita ku mwene wa nganda. 5 Lingo bikulo binsania bya mwino, nu mutali unsania wago, nu bintu binsania bya bukunza bunene, aba isuku linsania lya bakota ba Yuda, nabibike mu maboko ma beiti babo, babitukule, nu kubikata, nu kubyeka ku Babeli. 6 Nu uwe, Pashuri, nu bantu bansania bakwikalaga mu numba zobe, mukwenda ku bukobe; nu uwe wabase ku Babeli, wakue kuko, nu wayikwe ko, uwe nu bilemba byobe binsania, bawalenganizizie bitondo bya buza.’”
Kulila kwa Yeremia.
7 Ee Yehowa, wanengelede, nu nne nengeledwe, uwe uli na magala kuntinga, ukukinda; nili kintu kya kusekya, musi unsania; na muntu na ukunililika. 8 Kubuno mambizi mansania mankutenda, nkulaluka n'iyuki inene nu kusambala bwiti nu muziko! Kubuno iyuki lya Yehowa lyalingwa mundi, nu kwililikwa bindi binsania. 9 Kubuno ndi natenda bunee: ‘‘Nsyamutekule, aba nsyatende lingo mu izina lyage;” nti iyuki lyage lyabe mu mutima wane anga keiya kakugisia kakandwa mu makwa mane, nu nne nakutwa na kwizugila, aba nsikubuvwama.
10 Kubuno nungwa ku kakumagizia ka bantu beingi; boba ndenge insania. Beida bane bansania, bakutitika kugwa kwane, bakutenda bunee: “Musongelazi, nu iswe twamusongele; embe engelelwe; nu nti twamukinde; nu nti twisuba kweli.”
11 Tondo Yehowa eli gamozi na nne, anga mulwani wa bita akwitia boba; ku bubo babo bakumbabazia bakwikuka, aba tabakinde; bamone nsoni nnene. Kubuno tabakitile ku menge, bamone nsoni za milyalya zitanavwama kwibililwa nunse. 12 Tondo, ee Yehowa, Mwiya Mayombo, uwe ukugeleka beisanana, ukubabata ku mitima nu ku makengelo, nimone musubo wobe kubeli; kubuno nakulolesia kitondo kyane. 13 Imbazi ku Yehowa; ganunazi Yehowa! Kubuno onia mutima wa mwiyanizi mu maboko ma bagi.
14 Buswililwe busi bunabutilwe; tabukaswe mponga busi bubo bwambutile mmane. 15 Aswililwe muntu wozo wavwilide tatane na musagu nu kumubogiabogia mu, kutenda bunee: “Wabutilwa mwana wamulume.” 16 Muntu wono abe anga miino zazimizie Yehowa, kuteli kwibezia ku idilo nindunindu, nu ku tukemi twa bita ku makuluka; 17 kubuno, ntanitile lwabusio lwa kubutwa; ububo mmane anabede nsinda zane, nu iyimi lyage linabede bindi binsania. 18 Natukile munda ku kabamba kakizi, kumona mbabazio nu tubebe aaba nu bindi byane kusila mu nsoni?