19
1 Yehowa atenda bunee: “Enda ukunze isupa ly'ibumba ku mubumbi wa malega, nu kata bakulu ba bantu, nu bakulu ba basankoga, 2 nu tuka wende nabo ku mpinga za mwana wa Hinomu, zili bwigi na kiziki kya kwingilila ku lwibi lwalolela kukutukaga kisongo kya busi, usambale kuko bitondo binakubule. 3 Tenda bunee: ‘Ungwililazi iyuki lya Yehowa, inyuwe bakota ba Yuda, nu bakwikala mu Yerusalema, Yehowa, Mwiya Mayombo, Kalaga wa Israeli, atenda bunee: “Lola, nalusie bubi ku kiziki kikino bwazuzie matuzi ma muntu na muntu wungwe kubo. 4 Kubuno bansigile, balubikanizie kiziki kikino, bagisizie bulago ku tungo tulaga tubateizi, aba beisibo, aba bakota ba Yuda, nubo beizazizie kiziki kikino na mikila za beteli na mibi. 5 Nubo bobakila Bali kiziki kikino kya gantata, buno bagisie bana babo ku keiya, babe kayulo ka kugisia ku Bali; ikitilo ibi lintakakizizie, aba kulitenda, aba talingide mu mutima wane. 6 Nu lolazi, bindi byavwa, u bwatenda Yehowa, kiziki kikino takyamanwe lingo Tofeti, aba Mpinga za Mwana wa Hinomu, tondo Mpinga za Kuseswa. 7 Nu nakite lwango lwa Yuda nu Yerusalema kuba bulia mu kiziki kikino; nu nne nabagusie na mwene wa nganda lwabusio lwa beiti babo, nu ku kuboko kwa bantu bakulonda tulamo twabo, nu bitumba byabo nabikase kuba idia lya tuzoni twa mpelela, nu nyama za kisi. 8 Nu nne nakite mwino wono kuba bukindu nu kintu kya kwangamia bantu nu kukugilwa; muntu na muntu watingage bwigi nago nti angame, nu kukugila ku kabamba ka lusungio lwago. 9 Nu nabalisie misuna za bana babo, nu misuna za bakinga babo, nubo balie muntu na muntu musuna wa mwida wage, nkungu za kutimba mwino ku bita nu mu tubebe, kubuno beiti babo, bakulonda tulamo twabo kubazangiazangia.”’
10 Nu bugia isupa lwabusio lwa meiso ma bantu babo bakwenda gamozi nobe, 11 nu babule buno Yehowa, Mwiya Mayombo atenda bunee: ‘Bubuno u bunabungule bantu babano nu mwino wono, anga bukubungula muntu isupa ly'ibumba lya mubumbi wa malega, litanavwama kulongekwa lingo nu kuba igimagima, nubo bayike bitumba mu Tofeti aaba nu bede kiziki kya kuyikila bitumba mumo. 12 Bubuno u bunakitile kiziki kikino nu bakwikala mukyo,’ u bwatenda Yehowa, ‘nakite mwino wono kuba anga Tofeti; 13 numba za Yerusalema, nu numba za bakota ba Yuda, zabikwe nsese, zabe anga kiziki kya Tofeti; aaba numba insania nu gantata gazo gabagisizagia bulago ku iyombo linsania lya kwigulu, nu kukubulila tungo tulaga tuyulo twa kunua.’”
14 Kumbusa Yeremia atukile ku Tofeti kwamusingile Yehowa buno alenganie nu emanine ga mulungu wa numba za Yehowa, abwide bantu bansania bunee: 15 “Yehowa, Mwiya Mayombo, Kalaga wa Israeli, atenda bunee: ‘Lola, nkulusia ku mwino wono, nu ku miino insania zili mu ntungo nago, nsungio insania zinatendile kubeli; kubuno bakita makosi mabo mabibu, buno tabongwe ku bitondo byane.’”