18
1 Iyuki lyabaside Yeremia, kutuka ku Yehowa kutenda bunee: 2 “Zanzuka nu kumba ku mwaga wa numba za mubumbi wa malega, nu kuko nakungusie ku bitondo byane.” 3 U bubo nakumbile aaba nu ku numba za mubumbi wa malega, nu namumonine akukita mulimo ku kyabilingana. 4 Nu ndi kintu kikyo kyabumbaga n'ibumba kyabiga mu maboko mage, nti mubumbi akikita lingo kuba kingo kintu anga bwamona busoga. 5 Nu iyuki lya Yehowa lyambaside kutenda bunee: 6 “Ee numba za Israeli, ndi nsinavwama kumukitila anga bwakitile mubumbi wono?” U bwatenda Yehowa bunee: “Lolazi, anga buli ibumba mu maboko ma mubumbi, bubo u bumuli mu maboko mane, ee numba za baIsraeli. 7 Nkungu insania zinkusambala misagu za bilongo, za bukota ku kabamba ka kutikya, nu kwita, nu kuzikya; 8 ndi kilongo kikyo kinatonda kyagaluka nu kusiga bubi bwakyo, nagalukye mutima, nsyakite mibi zezo zinkukengela kubakitila. 9 Aba nkungu insania zinkusambala misagu za kilongo nu za bukota, ku kabamba ka kubobaka nu kubwimika: 10 Kungwa bakita bubi lwabusio lwa meiso mane, nu tabakwanza iyuki lyane, nti nagalukye mutima, nsyakite busoga bubo bunatendile nabakitile.
11 Kano kaluma bula bantu ba Yuda, nu bakwikalaga mu Yerusalema buno Yehowa atenda bunee: ‘Lola, namubikila lusungio kayikayika nu idongekazi. Ububo na muntu na muntu agaluke kutuka mu nzila zage mbi nu kulongeka nzila zeinyu nu misako zeinyu.’”
12 Tondo bakwide bunee: “Ta bubo. Twayange makengelo meitu, nu nawe na wakite anga buli kusombola kwa mibi za mutima wage wenyene.”
13 Nu ku kabamba kakano, Yehowa atenda bunee: “Buziazi kano kaluma mu bilongo, nazi wungule ku kitondo anga kikino; kikumi kya baIsraeli kyakita kitondo kinene kya kwangamia nunse. 14 Ndi lubula lwa Lebanoni lunabomboka ku lwanda lwa mwiduko? Aba mazi ma mpego makutuka bulazi ku mwiduko ndi makame. 15 Kubuno bantu bane banibilila, bakugisia bulago ku bitondo bya bulia; nubyo bikubakikitania mu nzila zabo, nu mu matingilo ma wakalazi; buno batinge mu nzila za lulenge; nzila zitalongekwa; 16 Buno bakite kisi kyabo kuba bukindu, kya kwangamia, nu kya kukugilwa nunse; unsania watingage bwigi nakyo angame nu kutengia itoe lyage. 17 Nababalanganie lwabusio lwa beiti babo, anga lumpumpu lwa kukutukaga kisongo kya busi, nu nne nabalolesie mugongo wane, tondo ta meiso mane, mu busi bwa lusungio lwabo.”
18 Batendile bunee: “Vwazi, tukite lwango ku Yeremia: kubuno mulembe tagunazimina mu kwida sankoga, aba lusungu talunazimina mu kwida mwiya menge, aba kitondo ku mulengania. Twendazi kumusolobokela na ndami zeitu, aba tatulole ku bitondo byage byakutenda.”
19 Nnungwilile, ee Yehowa; ungwilila bukutenda babo bakunkalila lwango. 20 Ndi busoga bukuligwa na bubi? Kubuno bombila kalamo kane muzinga. Kengela lukita lukizi lunemanine lwabusio lwobe, kutenda busoga ku kabamba kabo, buno nigalukye bongoa bwobe tabubakate. 21 Ububo, bana babo bakue na nzala, bakasane ku magala ma mwene wa nganda, nu bakikulu babo babe geteli bana nu babe misigala; beiba babo bakue, nu basikila babo beitwe na mwene wa nganda ku bita. 22 Idilo lyungubweko mu numba zabo, nkungu zibalusia iyombo kubeli kitangalabesi; kubuno banumbila kyundundu kunkata, nubo babisa matega kukata magulu mane.
23 Tondo, ee Yehowa, wizi nango zabo insania kundi za kunita; ntusigilile bubi bwabo, aba ntuzimie bwagi bwabo lwabusio lwa meiso mobe; tondo bakue lwabusio lwobe, ubakitile bubi nkungu za bongoa bwobe.