17
1 Bwagi bwa Yuda bwasanzilwe na kiliyo kya kyuma, nu na ntonga z'isangabwe, ku mbavu za mitima zabo, nu ku tupindapinda twa tusenga twa tuyulo twabo. 2 Anga bubakukengela bana babo u bubakukengela tusenga twa tuyulo twabo nu nkisi zabo bwigi na miti zitakuomaga nsamba gantata ga miduko milazi. 3 Ee mwiduko wane guli mu kisi, nakasane bikulo byobe nu masuku mobe mansania ku banyagi, nu kiziki kyobe kya gantata, ku kabamba ka bwagi, mu myaga zobe insania. 4 Uwe nu mutima wobe, walekanuke na bwiyani bwobe bunakukasile, nu nne nakusindikile kukitila beiti bobe mu kisi kyuteizi: kubuno wabangia keiya mu bongoa bwane, kakabanga ku milyalya. 5 Yehowa atenda bunee: “Aswililwa muntu wozo wakatizia ungo nu kulemanina muntu, nu kutikya mutima wage ku Yehowa. 6 Kubuno abe anga muti wa mu kalula uteli na nsamba ntamone mbogimbogi aba kakeke, nkungu zavwe busoga, tondo eikale kiziki kyakama mu kalula, mu kisi kya munkange kiteli mu bantu.
7 Akaswe mponga muntu wozo ukulemanina Yehowa; ku Yehowa u kwabika kilemanizio kyage. 8 Kubuno abe anga muti wayikwa mu ntungo mwa mazi, wikya mizi zage bwigi na luuzi; tawabe na boba nkungu za musi mukali ndi wavwa, tondo nsamba zago zabe mbisi; aba tawazangezange nkungu za mbula nkeke, aba tawalekele kukolama biguma.
9 Mutima guli mwengelezi kutinga binsania, guli na bubi nunsania, nazi unavwama kumenya tukungu twago? 10 nne Yehowa nkulindika mutima, nkulindika makengelo buno na muntu na muntu akaswe anga buli makitilo mage.”
11 Anga nkwale zikwikalila mongu meteli mage, u buli muntu wamona iguma mu nzila ziteisanana. Mu kalamo kage abisige, nu kuzinda abe kikongolo.
12 Kisumbi kya lutanuno lwa bukota kyabikilwe kwigulu kutukila mu kulinga, kili kiziki kyasililila kyeitu. 13 Ee Yehowa, kilemanizio kya baIsraeli, bansania bakwidekanukia nobe bakue na nsoni. Babo bakukwibilila basanzwe gansi mu mukungu, kubuno basiga Yehowa, kanuabalongo ka mazi meli kalamo.
14 Nnonie, ee Yehowa, nu nne nonibwe, nkulule, nu nne none; kubuno uwe u guli luganuno lwane. 15 Lola, bantu bakumbula bunee: “Kuni kuli iyuki lya Yehowa? Lizindilile.”
16 Tondo kundi, nsyasigile kuba mulangi kumbusa kwobe, nsyatundile bindi bya mbabazio, wizi bunatendile ganabezaga lwabusio lwa meiso mobe. 17 Ntunitie boba, uwe uli itinino lyane mu bindi bya tubebe. 18 Beiti bane bakue na nsoni tondo nne nsikue na nsoni, bagilimine tondo nne nsigilimine, lusia bindi bya tubebe kubeli; bazikye na muziko mambizi mabili.
19 Yehowa ambwide bunee: “Enda wemane ga lwibi lwa bantu, gakwingilaga nu kubasila bakota ba Yuda, nu ku miingilo za Yerusalema. 20 Nu babule bunee: ‘Ungwililazi iyuki lya Yehowa, inyuwe bakota ba Yuda, nu bantu bansania ba Yuda insania, nu inyuwe bansania bakwikalaga mu Yerusalema, nu inyuwe bakwingila mu nibi zeno; 21 Yehowa atenda bunee: “Langazi mitima zeinyu, tamweke muzigo unsania busi bwa Sabato, aba tamugutingie mu nibi za Yerusalema; 22 aba tamutole muzigo mu numba zeinyu busi bwa Sabato, aba tamukite mulimo unsania; tondo engiazi busi bwa Sabato, anga bunakakizizie basoinyuwe; 23 tondo tabongwilide, aba tabategekelede, tondo bakitile makosi mabo mabibu, tabongwilide aba kwitabizia lusungu.
24 Tondo nne Yehowa nkutenda buno ndi mwannungwilila na komanizia, nu tamwingizia muzigo unsania ga nibi za mwino wono mu busi bwa Sabato, tondo mwengia busi bwa Sabato geteli kukita mulimo mubo; 25 nti bakota bakwikalaga ga kisumbi kya bukota kya Davidi beingile ga nibi za mwino wono. Beingile na tuyanga nu farasi, nu basondelezia ba bibombo nu bantu ba Yuda, nu bakwikalaga mu Yerusalema, nu mwino wono wikalwe mugo milyalya. 26 Nubo batuke ku miino za Yuda, nu ku ndenge za Yerusalema, ku kisi kya Benjamina, nu ku kisi kya mpinga, ku kisi kya lulenge lwa kisi kukwendaga kisongo kya busi, balusie kayulo ka kugisia nu kisansa, nu kayulo ka bunga, nu kasuku, balusie kayulo ka kuganuna ku numba za Yehowa.
27 Tondo ndi tamwaziga kunnungwilila, kwengia busi bwa Sabato, mu kuteeka mizigo nu kwingila ga nibi za Yerusalema mu busi bwa Sabato; nti nabangie keiya ku lwibi lwage, nuko kazikye numba za bakota ba Yerusalema aba takazime.”’”