15
1 Yehowa ambwide bunee: “Aba Musa nu Samweli banemenne lwabusio lwane mutima wane tagunatundile bantu babano: Batikye ku meiso mane nu basige bende. 2 Kumbusa ndi bakubuzia bunee: ‘Twende kuni?’ Nti wababula buno bubuno u bukutenda Yehowa bunee: ‘Basanzidwe kukua, ku lukuo, basanzidwe mwene wa nganda, ku mwene wa nganda, basanzidwe nzala, ku nzala, basanzidwe kikando, ku kikando.’” 3 Yehowa atenda bunee: “Nu nne nabasingile nkita inazi za muziko, mwene wa nganda ku kwita, nu mboa za kwata, tuzoni twa kwigulu nu nyama nkali za kisi kubalia nu kubazikya.
4 Nu nne nabakite kuba kilongo kibi munkatini mwa makota ma kisi, ku kabamba ka Manase, mwana wa Hezekia, mukota wa Yuda, ku bitondo byakitile mu Yerusalema.
5 Kubuno nazi wakukwile kyombo, ee Yerusalema? Aba nazi wakulilile? Aba nazi wakugalukile buno akubuzie misagu zobe?” 6 Yehowa atenda bunee: “Wansigile! Wasubizie kumbusa, ububo nalambye kuboko kwane kuguli nu kukuzikya, nakutwa na kukukwila kyombo. 7 Nu nne nabapepile na lumpumpu ga nibi za kisi, natikizye bana babo, nazikizye bantu bane; tondo tabagalukile nu kusiga nzila zabo.
8 Misigala zabo zatalikenne kundi kutinga misege za kitatenge; nalusizie beiti ku nina wa basikila mu nkungu za makuluka, namwisile kitangalabesi lubaba nu boba. 9 Mukikulu wabutile bana mutubakamo alenguka; muuza wasila; musi wage wagoba mu makuluka; amona nsoni nu kwangama; nu basigala kubeli nabakasane ku mwene wa nganda lwabusio lwa beiti babo,” u bwatenda Yehowa.
10 Kabebe kundi, mmane, buwambutile muntu wa kusaka, nu muntu wa kwenda myango na kisi kinsania! Nsyambizie aba kwambibwa tondo na muntu na muntu kubeli na wanswilide.
11 Yehowa atendile bunee: “Lebelebe nakukase magala umone mponga; lebelebe nasindike beiti bobe kulila gamozi nobe mu nkungu za lukuo nu nkungu za kabebe. 12 Ndi muntu anavwama kubungula kyuma, kyuma kikutuka ku lulenge lwa kwikazi lwa kisi, aba nsubi? 13 Bikulo byobe nu isuku lyobe nabikasane bulia geteli bukunza ku kabamba ka bwagi bwobe bunsania nu myaga zobe insania. 14 Nu nne nakubike kukitila beiti bobe mu kisi kyuteizi; kubuno keiya kabangibwa mu bongoa bwane kakamuzikya.”
15 Uwe wizi, ee Yehowa nkengele, ndange, nu nsube ku beiti bane; ntuntikye ku kwikalila kwobe; menya buno ku kabamba kobe ukunkuswililwa. 16 Bitondo byobe byamonekile, nu nabilide, nu bitondo byobe byabezaga mbogimbogi kundi, nu kyelele kya mutima wane; kubuno namaninwe ku izina lyobe, ee Yehowa, Kalaga Mwiya Mayombo. 17 Nsyikalile mu misanganano za babo bakwibogiabogia. Aba nsyabogilebogile; tondo nikalile nnenyene ku kabamba ka kuboko kwobe, kubuno wanizazizie lusungio. 18 Kubuni mbabazio zane zili ku bindi binsania; nu kyulu kyane takili na muti, kikusomba kona? Ndi wabe kundi anga kaazi kengelezi kakusasia kukama mazi?
19 Ku bubo Yehowa atenda bunee: “Ndi wibezia, nti nakusubye buno wemane lwabusio lwane; nu ndi watenda buli busoga nu kusiga buli bubi, nti wabe ntenzi zane; nubo bakusubizie, tondo ntugaluke kubeli. 20 Nu nne nakubike kuba anga kitutu kya mukolo wa nsubi gantata ga bantu babano; nubo beitane nobe; tondo tabakukinde; kubuno nne nili gamozi nobe buno nikwonie, nu kukukulula, nne Yehowa u wabutenda. 21 Nu nne nakwonie mu kuboko kwa bantu babi, nu nakwonie mu kuboko kwa babo bakukwitia boba.”