14
1 Iyuki lya Yehowa lyabaside Yeremia, ku kabamba ka kilimo. 2 Yuda akulila nu miino zage zasambuka; beikala gansi bavwala makunino, nu idilo kutuka ku Yerusalema lyabakama kwigulu. 3 Nu bangati babo basinga bakiti babo kulonda mazi ku tunuabalongo, tondo tabamona mazi; basubya ku kutaga mazi na bituma tabili mu kena, bamona nsoni nu kuzangazanga, beikukila ku matoe mabo. 4 Nsi zatika, kubuno takuli mbula mu kisi, balimi bamona nsoni nu kwikukila matoe mabo. 5 Aba mubale mu lubanda wabutile nu kusiga kyana kyage kubuno takwabezaga nsamba nto. 6 Nu mpunda za lubanda zemana gantata miduko, zikwiza na mpusia anga mboa za lubanda; meiso mazo tamakumona busoga kubuno takuli nsamba mbisi. 7 Aba bwagi bweitu bukutulongekela, ee Yehowa, tondo kita ku kabamba k'izina lyobe. Kubuno kusubya kweitu kumbusa kwitila; twakukitide bwagi. 8 Uwe u kilemanizio kya baIsraeli, uli Mukuluzi wage nkungu za tubebe, kubuni useli anga mugeni mu kisi, anga mugeni wa kindi kimozi tugu? 9 Kubuni useli anga muntu wasalima, anga mwiya magala utakuvwama konia? Twonie, ee Yehowa, uli munkatini mweitu nu iswe tukumanwa ku izina lyobe; ntutusige!
10 Bubuno u bwatenda Yehowa ku kabamba ka bantu babano bunee: “Batundile nunse kutingatinga; tabalangile magulu mabo, u bubo Yehowa ntabeitabizie; kano kaluma akukengela bwagi bwabo nu kubasungia ku kabamba ka bwagi bwabo.”
Yeremia ntasegele bantu lingo
11 Nu Yehowa ambwide bunee: “Ntusegele bantu babano buno babogeboge. 12 Nkungu zibakukanda kulia idia nsyungwilile ku idilo lyabo; nu nkungu za kukasana tuyulo twa kugisia nu tuyulo twa bunga, nsyatwitabizie; tondo nabazikye na mwene wa nganda, nu munganda, nu nsambo nkali.”
13 Tondo natendile bunee: “Ee, Yehowa, Mwiya Bwangato Bunsania! Lola, balengania bakubula bunee: ‘Tamwamone ku mwene wa nganda, aba tamwakue na nzala; tondo namukase bubobelelo bwa bulili mu kiziki kikino.’”
14 Yehowa ambwide bunee: “Balengania bakulengania bya buza ku izina lyane, nsyabasingile aba nsyabakakizizie, aba nsyatendile nabo; bakukulenganizia ndozi za buza, nu bakubuka bitondo biteli na bwisulilwa, nu bwengelezi bwa bulengania bwa mitima zabo bobenyene. 15 Bubuno u bunatenda, nne Yehowa, ku kabamba ka balengania balenganizie ku izina lyane, aba nne nsyabasingile, tondo batenda mwene wa nganda nu nzala tabingile mu kisi kikino; tondo ku mwene wa nganda nu nzala balengania babano beitwe. 16 Nu ku bantu babo babalenganizizie bulengania bwabo, beiswe kumbuga mu nzila nnene za Yerusalema ku kabamba ka mwene wa nganda nu nzala; tababe na muntu wa kubayika, bo nu bakikulu babo, bana babo nu bakinga babo; kubuno nababalanganizie bwagi bwabo gantata gabo.
17 Nu nti wababula kitondo kikino bunee: ‘Meiso mane magele bisozi musi nu kindi nu tamakame; kubuno kikumi, mukinga wa bantu bane, abeleka bubele bunene nu kukua kyulu kinene. 18 Gankwingila mu kisi, lola, nkumona ku babo beitilwe ku mwene wa nganda! Nu gankwingila mu mwino, lola, kuli basambi ba nzala! Kubuno mulengania nu sankoga, bansania babili bakwenda kuno nu kuko mu kisi kibateizi.’”
19 Ndi wasombile Yuda nunse? Ndi mutima wobe wasombile Sayuni? Kubuni watulibula, tatube na muti wa kutonia? Twalemaninne bubobelelo, tondo takwavule busoga bunsania; twalangile nkungu za kona, nu lola, kuzangazanga tugu!
20 Ee Yehowa, twitabizia bwagi bweitu, nu bubi bwa batateiswe; kubuno twakukitide bwagi. 21 Ntutusombe, ku kabamba k'izina lyobe, ntumonesie kisumbi kya lutanuno lwobe nsoni: kengela, nu ntwite idagano liwakitile n'iswe.
22 Ndi kuli mu nkisi za bilongo zinavwama kulokya mbula? Aba ndi igulu u likukasana mbula? Ndi ta uwe, ee Yehowa, Kalaga weitu? Ku bubuno tukukulemanina ku kuba uwe u wakitile bintu bibino binsania.