13
1 Yehowa antendile bunee: “Enda wikunzile mukoma wa kitani, guvwale mu kibunda aba ntuwise mu mazi.” 2 Nu nakunzile mukoma anga bwankakizizie Yehowa, nu nivwalikizie go mu kibunda. 3 Lingo iyuki lya Yehowa lyambaside limbizi lya mabili kutenda bunee: 4 “Tola mukoma wozo u wakunzile uli mu kibunda kyobe, zanzuka, wende ku Luuzi Furati, nu ugubise kuko mu kalimba ka lwanda.” 5 Ububo nendile nu nagubisile bwigi na Luuzi Furati, anga bwankakizizie Yehowa. 6 Nu kumbusa kwa bindi byingi, Yehowa ambwide bunee: “Zanzuka, wende ku Luuzi Furati, nu tola wozo mukoma u nakukakizizie kubisa kuko.” 7 Nu nendile ku Luuzi Furati, nombile nu natolile wozo mukoma mu kiziki kikyo kinagubikile; tondo lola, mukoma wabezaga wabiga, tawaswagile ku kampa.
8 Ububo iyuki lya Yehowa lyambaside kutenda bunee: 9 “Bubuno u bwatenda Yehowa bunee: ‘Ku lukita luluno nabigie kabenga ka Yuda, nu kabenga kanene ka Yerusalema. 10 Bantu babano bagi nunse bakusomba kungwa bitondo byane, bakwenda mu kunana kwa mitima zabo, nu kuyanga tungo tulaga buno batukitile nu kutukumbamina, babe bumozi na mukoma wono, utaswaga ku kintu kinsania. 11 Kubuno anga bukulandana mukoma na kibunda kya muntu, ububo bunidandanizie na numba insania za baIsraeli, nu numba insania za Yuda,’ u bwatenda Yehowa; ‘buno babe bantu bane, nu izina ku luganuno, nu lutanuno; tondo tabatundile kungwa.’
12 Ububo babule kitondo kikino bunee: ‘Yehowa, Kalaga wa Israeli, atenda bunee: “Na katembe na katembe na keizazibwe na maku;” nubo bakwakule bunee: “Ndi iswe tatwizi buno na katembe na katembe na keizazibwe na maku?”’ 13 Nti wababula bunee: ‘Yehowa atenda bunee: “Lola, nembukie nunse bantu bansania na maku, bakwikalaga mu kisi kikino, nu bakota bakwikalaga mu kisumbi kya Davidi, basankoga, balengania, nu bakwikalaga mu Yerusalema. 14 Nabatulanie, muntu na munyage, isi nu mwana gamozi,” u bwatenda Yehowa: “nsyakue kyombo, aba nsyasigilile, nsyabe na mponga, nabazikye.”’”
Ntondi ku lwikotio
15 Ungwililazi inyuwe, tamube na kabenga; kubuno Yehowa atendile. 16 Ganunazi Yehowa, Kalaga weinyu, lwabusio ntelusia kapilo, nu lwabusio lwa magulu meinyu tameikuka ku miduko zili na kapilo; nu nkungu zimukulindila kyengi, akigalukye kuba kilimelime kya lukuo, nu akigalukye kapilo nunse. 17 Tondo ndi tamukutunda kungwa, nti mutima wane walile mu lumbisombiso, ku kabamba ka kabenga keinyu; nu meiso mane malile nunse nu kubasa bisozi byingi, kubuno kibombo kya Yehowa kyekwe ku bukobe.
18 Bula mukota nu nina wa mukota bunee: “Ibotyazi nu kwikala mu mukungu, kubuno nkumbu zeinyu za lutanuno zagela kutuka ku matoe meinyu.” 19 Nibi za miino za Negevi zakandwa, aba takuli muntu wakuzigula; Yuda ekwa ku bukobe, ekwa nunse ku bukobe.
20 Lambula meiso mobe ulole babano bakuvwa kutuka ku lulenge lwa kwikazi kwa kisi; kuni kuli kibombo kyobe kiwakasilwe, kibombo kya lutanuno lwobe? 21 Watende buni nkungu zabike Yehowa beida bobe kuba itoe gantata gobe, ndi ta uwenyene u wabeigisizie kuba gantata gobe? Ndi kabebe takakukate, anga lubaba lwa mukikulu ukubuta? 22 Nu ndi ntukwibuzia mu mutima wobe bunee: “Kubuni bitondo bibino byambasila?” Buli ku kabamba ka bwingi bwa bubi bwobe u bubwagondolwa mu mipimbo za nsulu zobe, nu binyantilo byobe byabikwa bwasi nu ngologoso zobe kubabalwa. 23 Ndi muEtiopia anavwama kugalukya kikoba kyage, aba ngozi matondoki mage? Bubo nu inyuwe tamunavwama kukita busoga, inyuwe mwagomezie na kukita mibi.
24 “Ku bubuno namubalanganie anga mpepa zikupepwa na lumpumpu lwa kalula. 25 Kukuno u kugwa mbale kwobe, kibombo kyobe kyalindikwa na nne,” u bwatenda Yehowa; “kubuno wanibilila nu kulemanina buza. 26 Ku kabamba ka bitondo bibino nagondole mipimbo za nsulu zobe lwabusio lwa meiso mobe, nu nsoni zobe zamonekeko. 27 Namona ku lusombo lwobe lwa kukumbamina nkisi nu lutundo lwobe lubi nu butazi bwobe, gantata ga miduko mu masoa. Kabebe kuguli, ee Yerusalema! Ntukutunda kwengibwa; bitondo bibino byasile aaba nu nkungu nkizi?”