Yeremia akulila
12
1 Uwe uli wisanana nunsania, ee Yehowa, nkungu zinasambale nobe, lebelebe natende nobe misagu za kwisanana: kubuni nzila za babi zikumona mutali? Kubuni bansania bakukita bwengelezi bakwikala na mbogimbogi? 2 Wabayikile, nu basile mizi, bakwasa, kuzinda bakukolama biguma; mu tunua twabo uwe uli bwigi tondo mu mitima zabo uli bulazi. 3 Tondo uwe, Yehowa, unizi; ukummonako, wageleka lukita lwa mutima wane kuguli; babulute anga mikoko zikwenda kuseswa, nu babike kayikayika ku busi bwa kuseswa. 4 Kisi kyalile bindi binga, nu nsamba za kisi kinsania kuoma? Ku kabamba ka mibi za bakwikalaga mukyo nyama zazika nu tuzoni tunsania; kubuno batendile bunee: “Ntamone ku kuzinda kweitu.”
Iyakulo lya Yehowa ku Yeremia
5 Yehowa anakwide bunee: “Ndi ukukutwa na kantangoa na bantu, buni buunavwama kwenda kantangoa na farasi? Nu ndi wagoa mu kisi kiteli na makitano, buni buwakite na magunda ma mutili wa Yordani? 6 Kubuno aba mibuto zobe nu numba za so bakukitide bitondo bya bwengelezi; anga bubalalukile bubibu kumbusa kwobe; ntubakatizie aba bakukubula bitondo bisoga.
7 Nasiga numba zane, nisa bwiyani bwane; nabika mutundwa wane mu maboko ma beiti bage. 8 Bwiyani bwane buli kundi anga kimbwe mu lubanda; bwanzugila u bubo nabusomba. 9 Bwiyani bwane buseli kundi anga kazoni keli na matondoki, tuzoni tukali twamutimba ndenge insania; endazi, kundamaniazi nyama insania za mu lubanda, zilusiazi buno zilie.
10 Balangi beingi babigia isoa lyane lya mizigi za biguma, banyanta isoa lyane isoga na magulu, bakita isoa lyane kuba kalula. 11 Balikita kuba kalula, nu kukuba lili kalula likundilila; kisi kinsania kyakitwa kuba bukindu, kubuno takuli muntu wabikile bitondo mu mutima wage. 12 Beiya kubigia kisi babakama gantata ga miduko mu kalula; kubuno mwene wa nganda wa Yehowa walie kutuka ku lulenge lumozi lwa kisi aaba nu ku lungo lulenge; takuli mubili ukaba na bubobelelo. 13 Bayikile ngano, tondo batubule mikele; bakutizie mitima tondo tabakaba na mutali; nu mwamone nsoni ku matubulo meinyu ku kabamba ka bongoa bukali bwa Yehowa.”
Mugenzi ku banyage ba Israeli
14 Yehowa atenda bunee: “Ku bilongo binsania bili na mibi; bikwitubya ku bwiyani bwane bunabikide bantu bane baIsraeli bunee: ‘Lola, nabitikye mu kisi kyabo, nu natikye numba za Yuda tazibe munkatini mwabo. 15 Lingo kumbusa kwa kubitikya, nabisubye nu kubikwila kyombo; nu nne nabilusie lingo; muntu na muntu eingile mu bwiyani bwage, nu na muntu na wingile mu kisi kyage. 16 Kumbusa ndi beiyigisia na komanizia nzila za bantu bane nu kulumbila mu izina lyane bunee: “Mukota eli mulami,” anga bubeigisizie bantu bane kulumbila ku Bali, bubo babe na biziki munkatini mwa bantu bane. 17 Tondo ndi tabaziga kungwa, nti natikye kikyo kilongo, kutikya nu kukizikya nunse, nne Yehowa nabutenda.’”