Bulengania ku kabamba ka Yerusalema.
29
1 Kabebe ku Arieli, Arieli, mwino wikalaga mu Davidi; mwaka na mwaka, bisagulo byago bikitwe. 2 Kubuno nazangiezangie Arieli, nu kwabe kabebe nu kulila, nu wabe kundi anga kiziki kya Arieli. 3 Nu nne nakutimbe ku ndenge insania, nu kusinga beiti bobe ku ndenge insania, nu nazanzule mikolo kukutimba. 4 Nu uwe wasigulizibwe nu watendele gansi, nu moki mobe matukile gansi ku mukungu, nu iyuki lyobe lyabe anga iyuki lya musumbu likutuka munsi, nu iyuki lyobe lyungubwe anga manungunungu mu mukungu. 5 Nu beiti babe beingi, nu babe anga mukungu mukeke, nu babo bakwitia boba babe anga mpepa. Ku bubo bibyo byabase kumuli limbizi limozi kitangalabesi. 6 Nu Yehowa, Mwiya Mayombo, avwe kuguli, nu mukulumino nu kaningini nu kazege kanene nu mbula za kisoa nu ngulumina za keiya kakugisagia. 7 Nu beingi ba bilongo bakusakaga na Arieli, u bansania bakusakaga nage nu bakumutimba bakaba anga muntu uli mu ndozi. 8 Lingo kwabe anga bukukesagia muntu uli na nzala ndozi akulia, tondo gaakuyuka, mutima wage taguli na kena, nu anga muntu mwiya mpusia akukesia ndozi akunua, tondo gaakuyuka, kasi akutwa na mutambo nu mwego wage wakama. Bubo u bwabe beingi ba bilongo bakulusia bita ga mwiduko wa Sayuni.
9 Mwangame nu muzangezange; zibazi meiso nu mube byuku; mukatwe na maku, tondo ta na maku. Mubungebunge nu tamwanune maku. 10 Kubuno Yehowa amukasile mutima wa tulo, nu azibile meiso meinyu, inyuwe balengania, nu akukide matoe meinyu, inyuwe balaguzi. 11 Kulolesibwa kunsania kwabede ku muli anga bitondo bya kigondi kya mukanda wabikilwe kamenyikilo, nu wagukase ku wizi kusoma nu kumutenda bunee: “Soma tanga,” nti atenda bunee: “Nsikuvwama; guli na kamenyikilo.” 12 Ndi bakasa mukanda ku muntu uteizi kusoma, nu kumutenda bunee: “Soma mukanda wono,” nti atenda bunee: “Nsizi kusoma.”
13 Mukota atenda bunee: “Bantu babano bankunda na moki mabo, tondo mitima zabo zili bulazi na nne, nu boba bwabo bubeli nabo kundi buli makakizio ma bantu. 14 Ku kabamba kakano nne nakite lingo mulimo wa miganogano munkatini mwa bantu babano. Mulimo wa kuganiagania nu kwangamia, nu menge ma beiya menge mazimine, nu bumenyinino bwa beiya bumenyinino bwabiswe.
15 Kabebe ku babo bakutenda mu lumbisombiso buno babise Yehowa nango zabo, u babo bakukita milimo zabo mu kapilo nu bo bakutenda bunee: ‘Nazi ukutumonako? Nu nazi ukutumenya?’” 16 Inyuwe mwagalukizye binsania anga bukuganzwa mubumbi buno eli ibumba! Ndi kibumbwa kinatenda ku mubumbi bunee: “Ntwambumbile busoga?” Ndi kibumbwa kinatenda ku wozo wakibumbile bunee: “Ntuli na bumenyinino?”
17 Ku bindi bikeke, Lebanoni ukugalukibwa kuba isoa likukolama biguma nunse nu isoa likugaluka kuba lubanda. 18 Mu busi bubo bimbula matuzi byungwe bitondo bya mukanda, byuku byamone mu mwizi nu kapilo. 19 Babo beisigulizia babogeboge lingo mu Yehowa nu bazambi babogeboge mu Wasililila wa Israeli. 20 Kubuno babo bakwitia boba bazimine, nu beililiki tababe lingo; bansania bakuyanga bubi bapumbibwe bulazi. 21 Bansania bakwagia muntu mu kitondo nu mu mulondo, nu kubika itega ku wozo ukwitendela ku lwibi, nu kugalukya mwiya bulili ku butaswaga.
22 Ububo Yehowa wakulwide Abrahamu akutenda ku ba numba za Yakobo bunee: “Bana ba Yakobo tabakakua na nsoni, aba bilungi byabo tabyagaluke. 23 Gabakamona ku bana babo munkatini mwabo, u mulimo wa maboko mane, balange izina lyane lyasililila, beitabizie buno nne nili Wasililila wa Yakobo, nu bakue Kalaga wa Israeli boba. 24 Babo babezaga na mitima mibibu bakaswe menge nu babo bakitaga manungunungu beigisibwe.”