Lusungio ku baEfaraimu.
28
1 Kabebe ku lwikotio lwa banuzi ba maku baEfuraimu. Busoga nu lutanuno lwabo lwabe anga iduba lyoma lili ku ntonga za mpinga nsoga zanaga; nu bakindwa na maku. 2 Ungwililazi, Mukota eli na umozi uli na magala ma kuzikya kisi, anga mbula za kisoa nu lubula lwa makozi nu za mwiyalo munene, akagusia kisi kinsania gansi na kuboko kwage. 3 Nkumbu za lwikotio lwa bakatwa na maku ba Efuraimu zanyantwe na magulu. 4 Lutanuno lwage lusoga lwabe anga iduba lyoma lili ga ntonga za mpinga za masoa managa; lutanuno lwage lukaba anga kiguma kyela kya matubulo; ndi muntu akimona kitangalabesi, nti akikola na kuboko nu kukilia. 5 Mu busi bubo Yehowa, Mwiya Mayombo, abe nkumbu nsoga, nu abe nkumbu za lutanuno ku babo basigala ba bantu bage. 6 Nu We akaba muuza wa kwisanana ku babo beli ngatu, nu We akaba na magala ku babo bakusindika bita ku lwibi.
7 Tondo babano lingo bakutimbatimba na maku, bazimine ku kabamba ka maku. Balengania nu basankoga bakindilwe na maku; ku kabamba ka maku bakutingatinga nu kuzangazanga, nu mu nkungu za milondo tabakumenya kuzisesa. 8 Kubuno meza mabo meizile na bisazi, takuli kiziki kiteli na bisazi. 9 Eigisie menge ku nazi? Asondelezie nazi bitondo? Nti babo basiga kumoma nu batikibwa ku mabele mabo. 10 Ku bubuno kuli milembe ku milembe, ikakizio ku ikakizio, mulindi ku mulindi, gano kakeke, nu gago kakeke.
11 Aba natenda ku bantu babano na bantu bageni nu na bantu bakutetuma nu na bantu ba ungo mutendezi. 12 Kalaga abatendile bunee: “Kikino kili kyumuno kyeinyu, wozo wakutwa omunwe; kukuno u kumunwa kwa wozo wakutwa;” tondo tabazigile kungwilila. 13 Ku bubuno idagi lya Yehowa lyabezaga kubeli, mulembe ku mulembe, nu mulindi ku mulindi, nu kakeke gano nu kakeke gago, buno bende nu kugusibwa kumbusa, nu kusumitwa byulu, kutegwa nu kukatwa.
14 Inyuwe bantu ba kabenga, inyuwe bangati ba bantu ku Yerusalema, ungwililazi iyuki lya Yehowa. 15 Ku buno mwatendile bunee: “Twakitile idagano na lukuo, twalagenne na nsinda, buno nkungu zakukilwe kisi na lusungio, talwabase kutuli. Kubuno twakitile buza kuba itinino lyeitu, nu twibise mu buza bweitu.” 16 Ku kabamba ka bitondo bibino Yehowa, Mwiya Bwangato Bunsania, akutenda bunee: “Lolazi, nabike mu Sioni ikozi inene lya kapindapinda lyasombwedwe lya bukunza bubibu kuba kibanza kyagugumana. Wozo ukukatizia ntatengetenge nunse.
17 Nabike lusungio luli bulingilingi nu kwisanana kwa bulili; nu mbula za lubula zatikye itinino lyeinyu lya buza nu mwiyalo watumpule itinino lyeinyu. 18 Nu idagano lyeinyu na nsinda lyagalukibwe gakuvwa lusungio, idagano lyeinyu na nsinda talyemane. Lusungio lukali lwabase anga mwiyalo mu kisi; nkungu zezo mwasungibwe nalo. 19 Mu nkungu na nkungu galwabase mwasungibwe nalo. Nindunindu na nindunindu, mu musi nu mu kindi, lwabase.”
Kusongolola musagu wono kukwitia boba. 20 Kubuno mugu uli mwigi muntu ntanavwama kwinanuna gago, nu nsulu za kwikukila zili nkeke muntu ntanavwama kwikukila zo. 21 Ku bubuno Yehowa azanzuke anga bwakitile ku mwiduko wa Perazimu nu ongoe anga bwongilwe ku mpinga za Gibeoni, kubuno akite mwino wage wakuganiagania, nu azindilizie mulimo wage wa kwangamia. 22 Ububo tamukite nguza, bikando byeinu binavwa kukokomena, kubuno nungule ku Mukota, Yehowa, Mwiya Mayombo, musagu wa kuzikya wasombwedwe mu kisi kinsania.
23 Ungwililazi iyuki lyane, nu tegazi matuzi meinyu ku bibyo binkutenda. 24 Mulimi akulima buno ayike mbuto, ndi akulima geteli kuyika? Ndi akutimuna nu kubotya bilongo tugu? 25 Gaasile kulongeka nu kumba nsi nu kuzibotya, nti ntabeganie mbuto za memba nu za nkunde? Ndi ntakuyika ngano nu shayiri nu ngano mbibu mu kiziki kyazo? 26 Kalaga wage ukumwana busoga nu kumwigisia. 27 Nkunde aba memba tazinanyantwa na kayanga. Nkunde zinasusulwa na kati, nu memba na kasusula kakeke. 28 Mbuto zezo zakukita kampampa zatutwa ku kabamba kako, tabakuzituta busi bunsania, nu tabakuzituta na farasi zabo aba ngondangonda za kususula. 29 Kubuno menge mamano makutuka ku Yehowa, Mwiya Mayombo, u mwiya nango insania za kwangamia nu menge masoga nunse.