Lonio lwa baIsraeli.
27
1 Mu busi bubo, na mwene wage mukali nu mulazi nu wa magala, Yehowa eite Leviatani, zezo nzoka zikutimbagatimbaga nu kwengelela, nu eite nzoka zezo za mu kitatenge. 2 Mu busi bubo, eimbile isoa lya mizabibu lwimbo lulo: 3 Nne Yehowa nkulilanga, nalisanzide mazi kazanga na kazanga buno muntu anavwa kulibigia; musi nu kindi nalilange. 4 Nsili na bongoa bukali munda mwane. Anga buninabede na mingilingili nu mikele lwabusio lwane, ninalongekile bita nazo nu kuzigisia. 5 Tondo ndi ta bubo nti bavwe kundi anga itinino, akite bubobelelo na nne; ee, akite bubobelelo na nne.
6 Mu bindi bikuvwa, numba za Yakobo zasie mizi. Israeli asanune maluba nu kukolama. Nu beizazie kisi kinsania na biguma. 7 Ndi Yehowa amulibwide anga bwalibwide babo bamulibwide? Ndi Yehowa amwitile anga bwitile babo bamwitaga? 8 Kalaga abasungizie na bongoa bukali, nu kubapumbia anga bukupupa lumpumpu ku lulenge lwa kuntata kwa kisi. 9 Umpanga bwagi bwa Yakobo bwatikibwe mu nzila zeno, nu mulimo unsania wa kutikya mibi zage guli buno Yehowa akite makozi mansania ma tuyulo twabo kuba anga makese magogwa nu kubigia nkisi za tulaga twabo. 10 Kubuno mwino guli na mukolo wabe makindu nu anga kalula; kyana kya ngombe kyalie bisugu byago nu kwiyombeka mugo, nu kulia nsamba zago.
11 Ntabi zage zakama zikaketuka byindi byindi; bakikulu bakazikongia keiya, kubuno babano beli bantu beteli na menge; ku kabamba kako wozo wababumbile ntabakwile kyombo; We wabakitile ntabalolesie mponga. 12 Mu busi bubo, Yehowa akatengietengie miti za biguma kutukila Luuzi Furati aaba nu ku kaazi ka Misri, nu inyuwe baIsraeli mukakatwa umozi umozi. 13 Mu busi bubo, monze munene ukidwa; bansania batinine mu kisi kya baAsuria bakasubya, nu bansania babalanganizibwe mu kisi kya Misri, bakakumbamina Yehowa, ku mwiduko wasililila ku Yerusalema.