Lwimbo lwa mbogimbogi.
26
1 Mu busi bubo lwimbo luluno lukeimbwa mu kisi kya baYuda bunee: “Tuli na mwino wa magala; Kalaga akitile lonio lube mikolo nu bitutu byago. 2 Igulazi nibi zago buno kilongo kya bulili nu kisanana kingile. 3 Walange mu bubobelelo bwasililila wozo ukukulemanina mu mutima wage kubuno akukukatizia. 4 Katiziazi Yehowa bindi binsania kubuno Kalaga Yehowa, eli Lwanda lwa milyalya. 5 Kubuno akusigulizia gansi mu mukungu bakwikalaga gantata ga mwino; nu wozo ukwisakikaga akugugusia gansi mu mukungu. 6 Magulu makunyanta gansi na magulu ma babo beli bazambi nu masomoneno ma babo bakwiyanina. 7 Nzila za beisanana zisa; uwe Kalaga wisanana, ukubotya nzila za beisanana. 8 Ee! Yehowa, tukwenda mu nzila za milembe zobe, nu tukukulindila; mpusia za kalamo keitu zili ku izina lyobe nu kukukengela. 9 Mu kindi nkukutundaga mu mutima wane, nu nindunindu kalenganio kane kakukulondaga, ee Kalaga. Mu nkungu muli nsungio zobe mu kisi, bantu bakwiyigisia kwisanana kwobe. 10 Muntu mubi aba anakitwa mponga, nti ntakwiyigisia bwisanana; aba mu kisi kisoga, nti akukita kabenga nu ntamone ku lutanuno lwa Yehowa. 11 Ee Yehowa, kuboko kobe kwasakikwa tondo tabakumona; bamone ku iyilili lyobe ku bantu bobe, nubo babe na nsoni nu bazangezange, kubuno keiya kalangwa ku beiti bobe nu kabagisie.
12 Yehowa watusengezizie bubobelelo, kubuno wakitile misako zeitu insania. 13 Yehowa, Kalaga weitu bango bakota beteli uwe batwangatile, tondo mu magala mobe tugu tukwanzaga izina lyobe. 14 Beli bakuzi, nu tabalame lingo; balekenne, tabayuke, kubuno wabasungizie nu kubazikya nu tabakengelwe lingo. 15 Watalikide ku kilongo; Yehowa, watalikide ku kilongo; waganwinwe, nu wababalanganizie aaba nu kuzinda kwa kisi.
16 Yehowa, mu kabebe kabo bavule kuguli; basegile masego mu kakungu mu nkungu ziwabasuswide. 17 Anga bubo buli mwimisu kayikayika nkungu zage za kubuta eli na lubaba nu kulila mu nkungu za mbabazio zage, ububo butwabezaga lwabusio lwobe, ee Yehowa. 18 Twabezaga n'iyimi, twabezaga na lubaba, twabutile lumpumpu tugu. Tatwakitile lonio lunsania mu kisi; aba tatwabikile gansi babo bakwikalaga ga kisi. 19 Bakuzi bobe balame, ee Kalaga, bitumba byabo byayuke. Inyuwe beikalaga mu mukungu, yukazi mwimbe kubuno mame mobe, ee Kalaga, meli anga mame ma nindunindu, nu kisi kyayukye babo bakule.”
20 Bantu bane, vwazi, ingilazi mu numba zeinyu; mwigale nibi, mwibise nkungu nkeke aaba nu lusungio luluno lwa Yehowa lwatinga. 21 Lolazi, Yehowa akuvwa kutuka mu kiziki kyage, buno asungie bakwikalaga mu kisi ku kabamba ka bwagi bwabo, nu kisi kyalolesie mikila zakyo nu takyakukile lingo bantu beitilwe mu kyo.