Lwimbo lwa kuganuna Kalaga.
25
1 Ee Yehowa, uli Kalaga wane; nakusime nu kuganuna izina lyobe, kubuno wakitile miganogano, kubuno nango zobe za wakalazi zili bulili nu zisanana. 2 Kubuno wakitile mwino kuba bukindu, nu wagusizie mwino wabezaga na mukolo; numba za mukota wa bageni tazili mwino lingo, tagunobakwa lingo. 3 Ububo bantu beli na magala bakuganune, nu miino za babo beli bakali bakukue boba. 4 Kubuno wabezaga magala ma ku bazambi, ee Yehowa, kubuno wakasile magala ku mwiyanizi mu kabebe kage, wabezaga itinino mu kisoa nu mpololo mu musi mukali, kubuno moki ma bakali meli anga kisoa kikali ku kitutu, 5 anga bwange bukali ga kiziki kyakama. Ububo wazimizie mulubu wa baBilongo, nu anga bukuzima bwange bukali mu kilimelime kya kimpa, u lwimbo lwa beiya lwikotio lwabibibwe.
6 Ku mwiduko wono, Yehowa, Mwiya Mayombo, akakitila bantu kisagulo kya nyama zanona nu makwa mazo meiyala na mungongo, nu mazi ma biguma bisoga masongololwa busoga. 7 Mu mwiduko wozo abigie kyuki kyabikilwe gantata bantu ba bilongo binsania, nu ku kitambala kyanzilwe gantata bantu ba bilongo binsania. 8 Akakinda lukuo nunsania; Yehowa, Mwiya Bwangato Bunsania, akanyonyona bisozi binsania nu kutikya kabenga ku bantu bage bansania mu kisi; u bwatendile Yehowa.