22
1 Kalolesio ku kabamba ka mpinga za tulolesio. Kikizi kyakubasila buno ubakame gantata numba zeinyu? 2 Uwe wiyala na kazege mwino wa kalubikania nu wa mbogimbogi gamozi, bantu bobe beitilwe tabakule na myene za nganda aba tabakule ku bita. 3 Bakota beinyu batinine bansania gamozi nu bakandwa geteli misungu; bakandilwe gamozi na bantu ba miino zabo nkungu zibatinaga bulazi. 4 Ku kabamba kakano natenda bunee: “Ntundole, nsige nilile na kabebe. Ntumbibye, kubuno bantu bane beitilwe.”
5 Mukota, Yehowa, Mwiya Mayombo, alusia busi bwa kuzangiazangia, nu bwa boba bukali mu mpinga za tulolesio nu busi bwa kugusia mikolo za miino, nu bwa kulila ku miduko. 6 Elamu ekile kakunda ka misungu nu bakuvwa na bantu beli gantata ga farasi. Kiri agide ngabo zabo. 7 Mpinga zabo ziyale na tuyanga twa bita nu babo beiya bita beli gantata farasi bakwidongeka ku bita, aaba nu ku miingilo za miino. 8 Bibyo bya kwidanga bya baYuda byatikizibwe nu mwalondaga ngabo zeinyu mu numba za mu lubanda. 9 Nu inyuwe mwamonine mwino wa Davidi wabezaga na matengu mengi mu mukolo wage, nu inyuwe mwakundamanizie mazi mu kiziba kyabezaga kunsi. 10 Nu inyuwe mwaganzile numba zili mu Yerusalema, nu mwagusizie numba zimozi buno mwobake mukolo wa mwino buno ulinde. 11 Nu inyuwe mwakitile kiziba kya mazi gasamba bitutu bibili na mazi ma kiziba kya wakalazi, tondo tamwalolile ku Kalaga wakitile kyo aba kulemanina wakilongekile wakalazi.
12 Mu busi bubo, Mukota, Yehowa, Mwiya Mayombo, amumanine mulile nu kwikilizia nu kubegwa mumpugu nu kuvwala nsulu za makunino. 13 Nu namonine mbogimbogi nu kyelele, nu kusesa ngombe nu mikoko mulie misuna zazo. Na kanua mukutenda tulie nu tunue, kubuno lubi twakue. 14 Yehowa, Mwiya Mayombo, antendile bubuno mu matuzi mane bunee: “Lebelebe bwagi bubuno tabunasigililwa kumuli, aaba nu kukua kweinyu tondo mwatunganana kukua ku kabamba ka bwagi bweinyu.” Yehowa, Mwiya Mayombo, atendile bubo.
15 Mukota, Yehowa, Mwiya Mayombo, ambwide bunee: “Enda ku Sebuna, wozo uli mulangi wa bikulo nu wa numba za mukota, nu mubule bunee: 16 ‘Buni buukukita gano? Nu nazi wakukasile bwangato bwa kumba nsinda gano? Ee, ukwiyumbila nsinda zobe kuntata mu kiziki kya makozi. 17 Lola, uwe mwiya bwangato, Yehowa akukate nu akwise bulazi nunse nu kukukukila. 18 Lebelebe akugonde nu kukwisa anga lwenze aaba nu ku kisi kili bulazi. Kuko nti wakue, nu tuyanga twobe twa lutanuno lwobe twasigala, uwe uli nsoni ku numba za mukota wobe.
19 Nu nne nakutikye ku kiziki kyobe nu ku milimo zobe. 20 Mu busi bubo, nkamana mukiti wane Eliakimu, mwana wa Hilkia. 21 Nkamuvwalikya na nsulu zobe nu nkamukasa magala ma mukoma wobe, nu bwangato mu kiziki kyobe; akamanwa isi wa bansania beli mu Yerusalema nu ku numba za baYuda. 22 Nkamukasa mutandulwa wa Davidi nu nkagubika ga kituli kyage; ndi we akanda takuli unakandula, nu ndi akandula takuli unakanda. 23 Nu nne nkamukokomezia anga kyanikilo mu kiziki kili kibibu, nu we abe ga kisumbi kya bukota kya lutanuno lw'isi. 24 Nu we akaba lutanuno lwa numba z'isi nu lutanuno lwa babuti bage nu bana bage nu bituma bya mu numba.’
25 Yehowa, Mwiya Mayombo, atenda bunee: ‘Mu busi bubo kyanikilo kyabikilwe mu kiziki kibibu kyaketuke nu kyakoloke gansi, nu mizigo insania zabezaga zanikwa kukyo zakoloke. U bwatenda Yehowa.’”