21
1 Kalolesio ku kabamba ka kalula ka kitatenge. Anga bukutimbatimba lumpumpu lukutuka ku lulenge lwa kwidume kwa kisi, ububo beiti bakatuka ku lulenge lwa kalula ka kisi kikwitia bantu boba. 2 Nalolesizibwe bulengania bubibu, mwengelezi akwengelela, nu munyagi akunyaga. BaElamu nu baMedi timbazi miino, nu nne natobye tubebe tubakitide baIsraeli. 3 Ku kabamba kakano kibunda kyane kiyala mbabazio, lubaba lwankatile anga lubaba lwa mukikulu mu nkungu zage za kubuta, ku kabamba ka mbabazio zinungule kuzo nkuzangazanga, nu na zo zinamonineko mutima gukuzangazanga. 4 Nili na boba bukali mu mutima, mutima wane gukukutuka na boba. Nu nkungu za kapilo zinatundile kumunwa zangalukile kuba masisi.
5 Banza meza nu babika balangi mu biziki byabo; bakulia nu bakunua. Inyuwe banene, zanzukazi bongiazi ngabo zeinyu makiti.
6 Mukota atendile bunee: “Enda ubike mulangi. Bwamoneko u bwasambale. 7 Nu kubuno ku bantu beli gantata ga tuyanga, nu farasi, nu mpunda, nu ngamia, nti alaluke n'iyuki bubibu buno bakuvwa.”
8 Alalukile n'iyuki anga lya kimbwe bunee: “Mukota wane, nemana gantata ga mukolo wa mwino na busi na busi nu mu kindi nkwikala mu kiziki kyane. 9 Nu lolazi namonine ku muntu gantata ga kayanga kakubulutwa na farasi ibili.” Nu akwide bunee: “Wagoa, wagoa Babeli munene na nkisi zage insania zabazwa za tulaga twage zabungukile.”
10 Bantu bane basuswidwe na kasusula anga bukususulagwa mumpunge ga mulungu, nkumubula bubo bunungule ku Yehowa, Mwiya Mayombo, u Kalaga wa Israeli.
11 Bulengania ku kabamba ka Duma:
Muntu akumana ku Seiri bunee: “Mulangi, misagu mikizi za mu kindi? ee, mulangi, misagu mikizi za mu kindi?”
12 Mulangi akula bunee: “Nindunindu zikuvwa, nu kindi kikuvwa lingo; ndi watunda kumbuzia, mbuzie, nu nti wavwa lingo.”
13 Bulengania bwa ku Arabia:
Mwiyombeke mu lubanda lwa ku Asuria inyuwe bantu ba Dedani. 14 Mubavwile na mazi beli na mpusia; inyuwe bakwikalaga mu kisi kya Tema, vwazi n'idia ku babo bakutina. 15 Bakutina babo beli na myene za nganda nu beli na misungu kubuno bita bili bikali. 16 Ububo Mukota ambwide bunee: “Lutanuno lwa Kedari lwasile kumbusa kwa mwaka umozi anga bukuganza mukiti wa kuligwa. 17 Nu babo bakoloboyo beiya misungu basigede ba Kedari tababede beingi lingo.” Bubo u bwatenda Yehowa, Kalaga wa baIsraeli.