18
1 Kabebe ku kisi kili mu mpololo anga mpololo za byupi, u kisi kya myaga ku nuuzi za Etiopia. 2 Bantu ba kisi kikyo bakasinga migenzi zabo mu nzila za kitatenge mu lukita lwa maato mabo. Migenzi zikusasia, endazi ku kilongo kyabalanganizibwe, ku bantu balazi, nu beli na kikoba kyakonda, bantu babezaga bakali kutukila kulinga kwabo aaba nu kano kaluma, kilongo kya magala, bakunyantaga bantu nu kisi kyaketuka na nuuzi. 3 Inyuwe bantu bansania beli ga kisi, nkungu zinabike kalolesio kane ga mwiduko, nti mukakamona; nkungu zinkida monze wane, ungwililazi. 4 Kubuno bubuno u bukumbula Yehowa bunee: “Nne nomunwe, nu nalole mu kiziki kyane anga kyengi kya musi mukali, nu anga kimpa kya muzuzo mu nkungu za matubulo.”
5 Kubuno lwabusio lwa matubulo, maluba makukolokaga nu maluba nti meseli mizabibu nu kulinga kwela, lingo Yehowa asese kibenga kitangi na mwene, nu kumbusa asese nu kutikya bibenga bikulu. 6 Binsania byasigwe ku tuzoni twa mu miduko nu nyama za mu lubanda, nu tuzoni tukali twikale gantata gabyo mu nkungu za musi mukali, nu nyama insania za mu lubanda zikale gantata gabyo mu nkungu za mpego.
7 Mu nkungu zezo nkaso zakaswe ku Yehowa, Mwiya Mayombo, zakaswe na bantu balazi nu beli na kikoba kyakonda, beli masisi, bantu babezaga bakali kutukila kulinga kwabo aaba nu kano kaluma, nu kilongo kya magala, nu kili na mutendezi mugeni, bakunyantaga bantu nu kisi kyaketulwa na nuuzi, bavwe na nkaso zabo ku Mwiduko Sayuni, u kiziki ky'izina lya Yehowa, Mwiya Mayombo.