17
1 Kalolesio ku baDamasiki. Lolazi, Damasiki ntabe lingo mwino; asigale tugu kibombo kya misakati. 2 Miino za baAroeri zasigala makindu, nu mikoko zasigala bibombo bibombo zeiyombeka mumo, nu takuli ukazitia boba. 3 Bitutu bya Efuraimu tabyabe na magala aba bukota bwa Damasiki, nu basigede ba bukota bwa Aramu babe anga lutanuno lwa baIsraeli. Yehowa, Mwiya Mayombo atenda bubo.
4 Yehowa u Kalaga wa Israeli atenda bunee: “Mu busi bubo lutanuno lwa Yakobo lukakokoka, nu mubili wage ukonda. 5 Nu baIsraeli babe anga matubulo ma ngano meli mu maboko ma batubuzi, nu akole anga matubulo makukunzwa gansi mu mpinga za Refaimu. 6 Kwasigala biguma bikeke kumbusa kwa kutubula mizeituni, biguma bibili aba bisatu byamoneke ku ntonga kwa ntabi za muti, binazi aba bitano ku ntabi za biguma byingi.”
7 Mu busi bubo muntu akalola ku Mubumbi wage, nu meiso mage makalola ku Wasililila wa Israeli. 8 Ntakalola lingo ku tuyulo twakitilwe na maboko mage aba nkisi za Ashera.
9 Mu busi bubo miino zabo zili na mikolo mibibu zikasigala nu bakatuka muzo anga bubatukile mu miino zabo mu busi bwingide baIsraeli mu kisi kyabo, nu binsania bikaba makindu. 10 Kubuno wibilide Kalaga wa lonio lwobe, u Lwanda lwa magala mobe. Ububo, aba ukayika miti za kukutananizia nu kuyika mbuto za miti migeni, 11 nu ukazinagya buno zase mu bubo busi, nu mu nindunindu zezo ukasia zezo miti maluba, tondo matubulo mobe makaba makeke nu makaba na kabebe nu kulila nunse.
12 Ee! Kazege ka bantu ba bilongo byingi! Bakukita kazege anga bimpumi bya kitatenge mu kisoa. Ee! Kazege ka bantu bakukita kazege anga kela ka mazi meingi. 13 Aba bantu bakukita kazege anga ka bimpumi bya mazi meingi, gabazugile Kalaga batine bulazi, babe anga mpepa zatikibwa na lumpumpu nu anga mukungu watikibwa na lumpumpu lukutimbatimba. 14 Lola, mwigolo kuli tubebe twa kitangalabesi! Mu nindunindu bantu nti tabeli ko! Bubo u mutali wa babo bakutubigia nu lusungio lwa babo bakutunyaga bikagi byeitu.