16
1 Singazi mutulo wa kyana kya mukoko ku wozo mwangati wa kisi, kutukila ku Sela, kutingila mu kalula aaba ku mwiduko wa Sayuni. 2 Anga bukulengaga tuzoni, twimbibwa mu bizumba byato, u bwabe bakinga ba Moabu mu biziki bya kusoka luuzi lwa Arnoni. 3 Kala lwango, sesa mulondo weitu anga bwatunganana, tukukile na kilimelime kyobe anga bukubisamaga bantu mu kindi. Bisa babo bakutina nu ntubabisule. 4 Bisa baMoabu bakutina, beitabizie buno beikale nobe, kubalanga na wozo ukubeita, kubuno babo bakubigia bantu basile nunse, nu bakubigia bantu na magala bazike. 5 Ububo kisumbi kya bukota kya mponga kya Davidi kyemanukile nu mukota wa bulili akangata buno asungie na bulili nu kwisanana. 6 Twizi lwikotio lwa baMoabu, buni bubakwiganuna mu lwikotio, tondo lwikotio lwabo nu bongoa bwabo tabuli kena. 7 Ububo baMoabu balile, balilile Moabu gamozi; mukatonga nu kwima ku kitondo kya bantu ba Kiri-Hareseti. 8 Kubuno mizabibu za masoa ma Hesiboni zabila aba nu mizabibu za Sibuma, bakota ba baBilongo bazikya nu babigia ntabi nsoga zabezaga zalambya ku Yazeri, nu kutingatinga mu kalula.Ntabi zazo zalambya nu kubasa aaba nu ku mutili wa kitatenge. 9 Kubuno nkulilila mizabibu za Sibuma gamozi na ba mwino wa Yazeri, nkubasia bisozi ku meiso mane, ee, Hesiboni nu Eleale, kubuno iyuki lya mbogimbogi ku kitondo kya biguma byeinu byela nu ku kitondo kya matubulo meinyu lyasila.
10 Mbogimbogi nu kyelele byasila mu masoa ma biguma, takuli iyuki lya mbogimbogi aba nimbo mu masoa ma mizabibu, takuli muntu ukunyanta mu bilunga bya kukambutula. Nabibizie iyuki lya mbogimbogi. 11 Ububo mutima wane ukuzumazuma anga kindanda kikulilila baMoabu munda mwane, mukulilila baKiri-Haresi. 12 Nkungu zezo baMoabu bakabakama gantata ga mwiduko ku kiziki kyabo kya kukumbamina, bakakutwa nu masego mabo tamakungubwa.