14
1 Yehowa akakwila numba za Yakobo kyombo, akasombola numba za Israeli; nu We ababike mu kisi kyabo nu bageni bakasambikwa nabo nu balandane na numba za Yakobo. 2 Nu baBilongo babakumune mu biziki byabo nu numba za Israeli babatole mu kisi kya Yehowa. Nu baIsraeli babike baBilongo kuba bakiti babo bamulume nu bakikulu, nu bakakanda babo babakandaga, nubo bakangata bantu babo babangataga. 3 Mu busi bubo Yehowa akakumuzia mu kabebe nu mbabazio zobe nu bukambi bubibu bubakukambizie. 4 Watende musumo wono ku kabamba ka mukota wa Babeli bunee: “Buni bwakubilwa mwiya kabenga nu mwino wage wa olo. 5 Yehowa akabela mikulu za babi nu misumbo za bangati. 6 Wozo walibulaga baBilongo na bongoa bukali butanakusila, nu we angatile baBilongo na bongoa, nu kubasungia geteli kyombo. 7 Kisi kinsania kyumunwa nu kubobelela nu kwimba bubibu. 8 Misunobari nu mierezi u miti za ku Lebanoni tazasindwe nu kisi kyabogeboge. Zatende bunee: ‘Kutukila kukindwa kobe takuli musindi wa miti wabasile kutusinda.’
9 Hadeze zatengetenge ku kabamba kobe kukulumana nobe mu kuvwa kwobe, nu kuyukya bakuzi kukusekela; banene bansania ba kisi basakika bakota bansania baBilongo, bakuzanzuka ku bisumbi byabo bya bukota. 10 Bansania bakamwakula bunee: ‘Uwe wabede musosu anga iswe, uwe wabede anga butuli. 11 Lutanuno lwobe lwagezibwe ku nsinda nu bindanda byobe; wagelegetwe na mikuso nu bizimu byakukukile.’
12 Ee Lusifero, buni buwagezizibwe kwigulu! Ee lukenikeni lwa nindunindu, uwe mwana wa lukesikesi, wagezizibwe ku kisi, uwe wozo wakindile baBilongo! 13 Nu uwe watendile mu mutima wobe bunee: ‘Nabakame kwigulu, nabike kisumbi kyane kya bukota kutinga nkeninkeni za Kalaga, nikale gantata ga mwiduko wa musanganano, ku kuzinda kwa kuntata kwa kisi. 14 Nabakame gantata kutinga bulazi bwa bimpa. Nasusanie Wozo Wasakama Nunse.’ 15 Tondo uwe wagezizibwe ku kiziki kya bakuzi Hadese, ku ndenge za kuzinda kwa muzinga. 16 Babo bakakumona bakakwangama nunsania, nu bakatenda bunee: ‘Ndi uwe u wono watengezietengezie kisi, nu makota; 17 u wozo wabikile kisi kibe kalula nu kuzikya miino zakyo; wozo utakandwide bakandwa bage bende kwabo?’
18 Bakota bansania ba baBilongo bayikilwe mu nsinda na lutanuno nawe nawe mu numba zage. 19 Tondo uwe wisilwe bulazi kutuka nsinda zobe, anga lutabi lwasombwa nunse. Wakukidwe na bitumba bya babo beitilwe na mwene wa nganda nu kukukilwa mu mizinga za makozi, anga kitumba kyanyantwa na magulu. 20 Ntukakundamanibwa gamozi nabo mu nsinda, kubuno wabigizie kisi kyobe, wazikizye bantu bobe. Bibuti bya beiya bwagi tabikatekulwa aba nu milyalya. 21 Itazi bana babo ku kabamba ka bwagi bwa beisibo nu tabatekulwe nu kupiena kisi, aba tabeiyazie kisi lingo na miino.”
22 Yehowa, Mwiya Mayombo akutenda bunee: “Nabe na bongoa kubeli, nu izina lya baBabeli talyatekulwe, aba bana aba bayukulu. Bubo u bwatenda Yehowa. 23 Wozo mwino wabe kiziki kya biko nu biziba bya mazi, nu nkaguyagila na kikuko kyakuguzikya. Yehowa, Mwiya Mayombo akutenda bubo.”
24 Yehowa, Mwiya Mayombo alumbide bunee: “Bubo bunalumbide u bukaba nu bubo bunakengede nti u bwabe. 25 Nazikye baAsuria mu kisi kyane nu nabanyantenyante gantata ga miduko zane, ububo kisanga nu mizigo byatuke ga bituli bya bantu bane. 26 Bubo u bulongeki bunalongekile mu kisi kinsania nu nalambizie kuboko ku baBilongo bansania. 27 Kubuno Yehowa, Mwiya Mayombo alongekile, nazi ukaligalukya? Alambizie kuboko kwage, nazi unakusubania?”
28 Mu mwaka wakule mwangati Ahazi bulongeki bubo bwabede:
29 BaFilistia, tamubogeboge buno kasusu kakulibwide kakalikile byindi byindi; kubuno mu kikanga kya nzoka u mukatuka nzoka nkali zikusasia. 30 Muzambi amone bwa kuba, nu mwiyanizi eiyombeke bulonge bukata, tondo nkazikya kikanga kyobe nu nkubi zobe na nzala.
31 Inyuwe nibi za mwino, uwe mwino, ama magu; baFilistia mwazike nunsania; kubuno muuki watuka ku lulenge lwa kwikazi lwa kisi, nu takuli wasigwe wenyene munkatini mwa kibombo kyabo. 32 Basingwa ba kilongo kikino bakulwe n'iyuki likizi? Yehowa u wabikile kalingilo ka Sayuni nu munda mwago mwabe itinino lya bantu bage beli bazambi.