Kitondo ku kabamba ka Babeli
13
1 Kitondo kyamonine Isaya mwana wa Amozi ku lusungio lwa Babeli. 2 Sakikazi ibendela gantata ga mwiduko uteli na miti gantata, lalukazi n'iyuki inene; mubamane na maboko beingile ku mwingilo wa bangati. 3 Nne Yehowa, nakakizizie bantu bane basililila, namanine bantu bane beli na magala, ku kabamba ka bongoa bwane nu bakubogaboga mu lutanuno lwane.
4 Kazege ka bantu beingi keli ku mwiduko, kazege kanene ka makota ma baBilongo bakundamana gamozi, Yehowa, Mwiya Mayombo akubakundamania ku bita. 5 Bakutuka ku kisi kya bulazi nu ku kuzinda kwa meigulu. Yehowa na ngabo za bongoa bwage akazikya kisi kinsania. 6 Lalukazi kubuno busi bwa Yehowa buse bwigi, bukavwa anga kuzika kutuka ku Mwiya Mayombo. 7 Ku kabamba kako maboko ma muntu na muntu makoloboka, nu na muntu na muntu atamba. 8 Nu bakazangazanga, nu tubebe nu mbabazio bikabakata anga bukubezaga mukikulu mu nkungu za kubuta, nu bakangama nunse nu meiso mabo makaba anga ngulumina za keiya. 9 Lola busi bwa Yehowa bwavwe na bongoa bukali kusungia kisi nu bantu babi tabeikale mukyo. 10 Kubuno nkeninkeni za mwigulu nu bibombo byazo tazikasana kyengi kyazo, nu musi ukaba kapilo nkungu za kukya kwa busi, nu mwezi tagukasania kyengi kyago.
11 Nu nne Yehowa, nkasungia ba mu kisi ku kabamba ka bubi bwabo nu babi ku bwagi bwabo; nkazindilizia lwikotio lwa babo bakwikotia nu nkagusia bantu beli bakali. 12 Nkakita bantu kuba bakeke kutinga olo, aba bantu bakeke kutinga olo za ku Ofiri. 13 Kubuno nkatengiatengia meigulu nu kisi kikatengatenga ku kabamba ka bongoa bukali bwa Yehowa, Mwiya Mayombo, mu busi bwa bongoa bwage bukali.
14 Bantu ba kisi bakatina anga bukulembwa nyama za mu lubanda nazo nazo ku kiziki kyazo, nu anga mikoko ziteli na mulangi; na muntu na muntu ende ku kisi kyage wenyene. 15 Na muntu na muntu wasangwe asumitwe, nu muntu na muntu wakatwe nabo aseswe na mwene wa nganda. 16 Bana babo beitwe lwabusio lwa meiso mabo, nu numba zabo zatukulwe nu bakikulu babo babigibwe. 17 Lola nkamana baMedi batakwitabizia feza aba kutabogaboga na olo. 18 Bakazikya basikila na misungu, nu tabakwile bana bato kyombo aba bana bakeke.
19 Babeli u lutanuno lwa makota nu malebo ma baKaldea makaba anga nkungu zazikagia Kalaga Sodoma nu Gomora. 20 Tamukombulwa lingo aba tamukeikalwa na bantu kutukila kibuti na kibuti. MuArabu ntakabika numba zage mugo, aba balangi tabakalanga bituganwa byabo kuko. 21 Nu nyama za mu lubanda zikasigala mu wozo mwino nu biziki bya numba zabo bikeiyala na sulukutu, nu tuzoni tunene tukeikala mo, nu mibale zikayana kuko. 22 Fizi nu mikala za mu lubanda zikalila mu biziki byalanga byage nu mu bibyo byabezaga numba zabo nsoga nu nnene za bakota, nkungu zage nu bindi byage biseli bwigi na kukuka, nu tabizizie.