11
1 Kibenga kikatuka mu kilindi kya kikanga kya Yese, nu lutabi lwatuke ku mizi zage lwakolame biguma. 2 Nu Muuza wa Yehowa eikale gantata gage, u Muuza wa menge nu bumenyinino, nu Muuza wa lwango nu magala, nu Muuza wa bumenyinino nu kukua Yehowa boba. 3 Mbogimbogi zage zikaba ku kabamba ka kukua Yehowa boba. Nu we ntakasungia ku bubo bwakumonako na meiso mage, aba ntakazugila ku kabamba ka bwakungwa na matuzi mage. 4 Tondo ku bwisanana akasungia bazambi nu ane bakwisigulizia ba mu kisi ku kwisanana, nu akalibula ba mu kisi na kasusu kakutuka mu kanua kage, na moki ma milomo zage akeita babi. 5 Nu bwisanana bukaba mukoma wage mu kibunda kyage, nu bukatizio mukoma mu kibunda kyage. 6 Mboa za lubanda zikale gamozi na kyana kya mukoko, nu ngozi ziyombeke gamozi na kyana kya mpene, nu kyana kya ngombe, nu kyana kya kimbwe, nu kyana kya ngombe kyanona bikeikala gamozi, nu mwana mukeke akabisondelezia. 7 Ngombe nu dubu balie gamozi; byana byabo bikeiyombeka gamozi, kimbwe kikalia nsamba anga ngombe. 8 Mwana mukeke akayanina bwigi n'itengu lya nzoka nu akabika kuboko kwage g'itengu lya nzoka zili na lutabo lukali. 9 Mbabazio za kubiga tazikaba ku mwiduko wane wasililila, kubuno kisi kinsania kikeiyala na bumenyinino bwa Yehowa, anga bukwizazia mazi kitatenge.
10 Mu busi bubo kisina kya kikanga kya Yese kyemane anga ibendela ku bikanga bya bantu, kweli baBilongo bakakundamana nu kiziki kyage kya kumunwa kikaba na lutanuno. 11 Mu busi bubo Yehowa akalambya kuboko kwage limbizi lya mabili, kumana lingo bantu bage, u babo basigede ku Asuria nu ku Misri, nu ku Patirosi, nu ku Kushi, nu ku Elamu, nu ku Sinari, nu ku Hamati nu ku bisanga bya kitatenge.
12 Nu We akabika baBilongo anga ibendela nu akakulumania baIsraeli bapumbizibwe bulazi nage nu akakundamania baYuda babalanganizibwe kutukila ndenge inazi za kisi. 13 Lugi lwa baEfuraimu lwasile nu babo bakusuna baYuda bakasungibwa; baEfuraimu tabakaba na lugi ku baYuda aba baYuda tabasune baEfuraimu. 14 Nu bo bakalenga nu kugela nu bakakumba ku miduko za kisi kya baFilistini kili kunsi; bakakinda babo ba kuntata kwa kisi nu bakalambya maboko mabo ku baEdomu nu baMoabu; nu baAmoni bakabanza.
15 Nu Yehowa akakamia kitatenge kya Misri na lumpumpu lwage lukuzuza nu kuboko kwage kukaba gantata ga Luuzi Furati nu We akalukamia nu kulubegania mu tuuzi mutubakamo, nu akasokia bantu bage na magulu kwakama. 16 Kukaba nzila nnene ku bantu bage basigede ku baAsuria anga bwabezaga ku baIsraeli mu bindi bibatukaga ku kisi kya Misri.