10
1 Kabebe ku babo bakubika milembe ziteli zisanana, nu ku basanzi bakusanza bitondo biteli bulili, 2 kugalukya lusungio lwa bulili ku mwiyanizi, nu kunyaga bazambi ba bantu bulili bwabo buno misigala zibe bikulo byabo, nu kwiba bikulo bya nkubi. 3 Nu inyuwe mwakite buni busi bwa kusungibwa nu mu nkungu za muziko zikutuka bulazi nunse? Mwatine ku nazi mumone mukasia? Nu lutanuno lweinyu mwalusige ku nazi? 4 Bakumbame munkatini mwa bakandwa nu bagoe gansi munkatini mwa babo beitwa, aba bubuno bunsania, bongoa bwage tabwagalukile bulazi, tondo kuboko kwa Yehowa kwalambibwa aaba nu kano kaluma. Lwikotio lwa baAsuri lwasila
5 Kabebe ku baAsuria, u kasusu ka bongoa bwane, nu musumbo guli mu kuboko kwabo, u bongoa bwane. 6 Namusinge ku kilongo kya babi, nu namukase makakizio ku bantu ba kunongia bukali, kubakanda nu kunyaga bikulo byabo, nu kubanyanta anga bisogo bya mu nzila. 7 Tondo ta bubo bwakukengela wenyene mu mutima wage, tondo akukengela kwita nu kuzikya baBilongo beingi. 8 Kubuno atenda bunee: “Ta bantu bane banene bansania u bakota? 9 Kalno taguli anga Karkemisi? nu Hamati nteli anga Arpadi? nu Samaria nteli anga Damasiki? 10 Anga bwakatile maboko mane makota ma nkisi, nu nkisi zabo za kubaza zabezaga nsoga kutinga nkisi za Yerusalema nu za Samaria. 11 Anga bunakitide Samaria nu nkisi zage, ndi nsikakita bubo na Yerusalema nu nkisi zage?”
12 Tondo gabe Mukota azindilizia milimo zage insania ku mwiduko wa Sayuni nu Yerusalema, nti akatenda bunee: “Nkasungia mukota wa baAsuria ku kabenga ka mutima wage, nu ku lwikotio lwa meiso mage ma kabenga. 13 Kubuno akutenda bunee: ‘Ku magala ma kuboko kwane nakitile kitondo kikino, nu ku menge mane, kubuno nili na bumenyinino, nu nne natikizye myaga za bantu nu kunyaga masuku mabo, nu nagusizie babo bakwikala ga bisumbi bya bukota. 14 Kuboko kwane kukutolaga bikulo bya bilongo, anga bukutolagwa mongu masigede mu kizumba kya kazoni, u bunakundamanizizie kisi kinsania, aba takuli walimbwide kyupe, aba kukandula kanua, aba kulila.’”
15 Ndi isaga lineiganuna ku wozo ukusinda nalyo? Ndi likuki lineiganuna ku wozo ukusesa nalyo? Songo kasusula kanatengiatengia wozo ukekete, aba musumbo unazanzula kuboko, aba nkoma kuzanzuka anga tazili muti?
16 Ububo Mukota, Yehowa, Mwiya Mayombo, alusizie bantu bage balunda, kyonda, nu kiziki kya lutanuno lwage kyabange ndembelela, ndembelela za keiya. 17 Nu Yehowa, Kyengi kya Israeli, abe anga keiya, nu Wasililila wabo abe anga ndembelela za keiya nu azikye mikele nu binkelenkele byage mu busi bumozi. 18 Nu Yehowa azikye busoga bwa lubanda nu bwa masoa mage, mubili nu mutima, anga bukondaga musambi. 19 Nu miti za mu lubanda lwage zabe mikeke, buno mwana anavwama kusanza maganzo mazo.
Basigede ku baIsraeli bagalukide Yehowa
20 Mu busi bubo basigede ku ba baIsraeli nu babo bonine ba numba za Yakobo tabalemanine lingo wozo wabalibwide, tondo bakalemanina Yehowa, Wasililila wa Israeli, mu bulili. 21 Babo basigede bakasubya, basigede ba numba za Yakobo, kuli Kalaga Mwiya Magala. 22 Aba baIsraeli babe beingi anga misege za kitatenge, nti kibombo kyabo kikeke tugu kikasubya, kubiga kwabo kwabikwa, nu ko kwitile mu kwisanana. 23 Ku kabamba kakano Mukota, Yehowa, Mwiya Mayombo, asililizie nsungio zakengedwe mu kisi kinsania.
24 Ububo Mukota, Yehowa, Mwiya Mayombo, atendile bunee: “Inyuwe bantu bane bakwikalaga mu Sayuni, tamukue Asuria boba! Aba ndi amulibula na kasusula; aba ndi asakika musumbo wage kumuli anga bwakitile baMisri. 25 Ta bindi byingi bongoa bwane kumuli bwasile nu bwagaluke kubazikya.”
26 Nu Yehowa, Mwiya Mayombo, akabasusula na kasusula kakali anga bwalibwide baMidiani ku nanda za Orebu; nu akalambya musumbo wa Yehowa ku kitatenge anga bwagusakikile ku baMisri. 27 Mu bindi bibyo muzigo wa Yehowa ukatuka ga kituli kyobe nu kisanga kyabo mu ikosi lyobe, nu kikando kyakalike mu kubikwa makiti.
28 Babasile ku Ayati, batingile mu Migironi, abikile mizigo zabo ku Mikimasi. 29 Basokile g'isokelo, nu kutenda bunee: “Twiyombeke mu ido ku Geba.” Rama agiliminne, Gibea wa Saulo atinine. 30 Ee mukinga wa Galimu, lila n'iyuki ibibu! Ee Laisi, ungwilila! Ee kabebe ku Anatoti. 31 Babo ba ku Madimena bakutina; bakwikalaga ku Gebimu bakwibisa. 32 Busi bubuno bwa lelo akemana ku Noba, akutengia kuboko kwage gantata ga mwiduko wa bakinga ba Sayuni, u mwiduko wa Yerusalema.