Idagano lya kubutwa kwa Masiya
9
1 Tondo kapilo takakaba lingo ku wozo wabezaga na lusungio. Anga myaka za wakalazi gaababazizie kisi kya Zebuluni nu kisi kya Nafutali, tondo kuzinda byabe na lutanuno, bwigi na nzila za kitatenge, aaba nu ku ungo mutili wa Yordani, Galilaya wa baBilongo. 2 Bantu babo babezaga mu kapilo bamonine kyengi kinene, nu bo beikalaga mu kilimelime kya lukuo kyengi kyabasanine. 3 Watalikide kilongo nu witizizie mbogimbogi zabo, nu kubogaboga lwabusio lwobe anga mbogimbogi za nkungu za matubulo, anga bukubogaboga bantu nkungu zibakubegania bikulo. 4 Kubuno nakekile kisanga kya mizigo zage nu musumbo wa kituli kyage, nu kasusula ka wozo wamubengaga, anga mu bindi bya kukindwa kwa baMidiani. 5 Kubuno bisalapata binsania bya bita, nu nsulu zabongibwa mikila, byagisibwe na keiya. 6 Kubuno ku kabamba keitu mwana abutilwe, twakasilwe mwana wamulume, nu bukota bwabe ku kituli kyage nu amanwe izina lyage buno: Mwiya Kuganiagania, Musunguzi, nu Kalaga Mwiya Magala, nu Isi wa Milyalya, nu Mukota wa Bubobelelo. 7 Kutalikilwa kwa bwangato nu bubobelelo takukaba na kuzinda; akangata ga kisumbi kya Davidi nu bukota bwage, abwimike nu kubulongeka, ku lusungio nu ku kwisanana, kutukila kano kaluma aaba nu ku milyalya. Lugi lwa Yehowa, Mwiya Mayombo u, lwakite bubuno.
8 Yehowa asingile kitondo ku Yakobo nu kyabasile ku baIsraeli. 9 Bantu bansania bakimenye aba baEfuraimu babo bakwikala ku Samaria, u babo bakutenda na lwikotio nu kwiganuna mu mitima zabo bunee: 10 “Mabiliki magoa, tondo iswe tobake na makozi mabazwa, miti za mikuyu zaseswa, tondo twabike miti za mierezi mu kiziki kyazo.” 11 Ububo Yehowa asakike beiti ba Resini kweli, nu We asakamizie beiti bage. 12 BaAsuria lwabusio nu baFilistini kumbusa nu bakanyaga baIsraeli bwasi bwasi gamozi. Aaba bubuno bunsania bwavule, bongoa bwa Yehowa tabwagaluke bulazi, tondo kuboko kwage kwalambibwa aaba nu kano kaluma. 13 Tondo bantu babano tabeibotezie ku wozo wabalibwide aba tabakulonda Yehowa, Mwiya Mayombo.
14 Ku kabamba kako Yehowa aketule itoe nu mukila mu Israeli, nu ntabi nu bisugu ku busi bumozi. 15 Mukungu nu ukwanzwa, u itoe, nu mulengania ukwigisia buza u mukila. 16 Kubuno basondelezia ba bantu babano bakubeitia kiti, nu bo bakusondelezibwa bakuzika. 17 Ku kitondo kikino Mukota ntabogeboge na basikila babo, nu ntakwile nkubi nu misigala zabo kyombo, kubuno na muntu na muntu eli mubi nu mwagi, nu lulami na lulami lukutendaga bukongolo; gamozi na bubuno bunsania bongoa bwa Yehowa tabwagalukile bulazi, tondo kuboko kwage kwalambibwa aaba nu kano kaluma.
18 Kubuno bubi bukugisagia anga keiya; bukugisia binkelenkele nu mikele, nu bukubanga mu magunda ma miti za mu lubanda nu kusakama mu bimpa bya muuki. 19 Ku kabamba ka bongoa bukali bwa Yehowa, Mwiya Mayombo, kisi kikino kikugia nunsania, nu bantu babano babe anga nkuzi zikubanga keiya; takuli muntu wakwile munyage kyombo. 20 Akunyaga ku lulenge lwa kuboko kwa seidume nu akue na nzala, ndi alia ku lulenge lwa kuboko kwa seikazi nti nteikute; balie na muntu na muntu misuna za kuboko kwage wenyene. 21 BaManase bakwitana na baEfuraimu nu baEfuraimu bakwitana na baManase, nu bobabili beitane na baYuda. Gamozi na bubuno bunsania bongoa bwa Yehowa tabwagalukile bulazi, tondo kuboko kwage kwalambibwa aaba nu kano kaluma.