8
1 Yehowa antendile lingo bunee: “Tola lubavu lunene, nu sanza gantata galo na kiliyo kya muntu ku mwana wobe Maheri-Salali-Hasi-Bazi. 2 Nu nabe na balongeki bakatizie musagu, nu meina mabo Uria, sankoga, nu Zekaria, mwana wa Yeberekia.” 3 Nu nendile ku wozo mulengania mukikulu, nu we abede n'iyimi nu abutile mwana wamulume. Kumbusa Yehowa antendile bunee: “Mwinike izina lyage Maheri-Salali-Hasi-Bazi. 4 Kubuno lwabusio mwana wono ntemenya kutenda bunee: ‘Tatane nu mmane,’ kikagi kya Damasiki nu bikulo bya Samaria byekwe lwabusio lwa mukota wa baAsuria.”
5 Nu Yehowa antendile lingo bunee: 6 “Kubuno bantu babano basomba mazi ma Siloa makugelaga bukebuke nu kubogaboga ku kabamba ka Resini nu wozo mwana wa Remalia, 7 ububo kano kaluma Mukota akulusia mazi meingi ma Luuzi Furati, lulo meli na magala, u mukota wa baAsuria na lutanuno lwage lunsania, nu lwatinge mu kiziki kyage nu kuziba mitili zage insania. 8 Nu lukatinga munkatini mwa kisi kya baYuda, nu lukakukila kutinga munkatini mwakyo. Ee, Emanueli, akatinga anga mazi ma mwiyalo aba mu ikosi, nu kulambya byupi byage kukeizazia bungulu bwa kisi kyobe.
9 Batende bunee: ‘Inyuwe bantu, ungwazi nu mwaketulwe byindi byindi, nu inyuwe bansania ba kisi kili bulazi, tegazi matuzi nu kokomeziazi bibunda byeinyu kubuno mwaketulwe byindi byindi. Ee, kokomeziazi bibunda byeinyu kubuno mwaketulwe byindi byindi. 10 Kalazi lwango gamozi, nulo lwagaluke; tendazi kitondo, nukyo kyagaluke, kubuno Kalaga eli gamozi n'iswe.’”
11 Kubuno Yehowa ambwide bubuno na kuboko kwage kwa magala mage gantata gane; anigisizie nsyende mu nzila za bantu babano. Antendile bunee: 12 “Tamutende buno musona ku bitondo binsania bikumana bantu babano buno musona, aba tamukue boba ku bibyo bibakukua boba. 13 Mwatunganana kuganuna Yehowa, Mwiya Mayombo tugu, nu kumukua boba nu We abe magala meinyu. 14 Nu We abe kiziki kyasililila nu itinino; tondo ku numba ibili za baIsraeli abe ikozi lya kwikuka nu lwanda lwa kugusia, nu ku bantu ba ku Yerusalema abe itega ly'ipu. 15 Nu beingi bakeikuka; nu kugwa nu kuketuka byindi byindi, kutegwa nu kukatwa.”
16 Kanda bulongeki bubuno, bika kamenyikilo mu ikakizio munkatini mwa beigisibwa bane. 17 Nu nne nalindile Yehowa ukubisa meiso mage ku bantu ba numba za Yakobo. Nu nne namukatizie. 18 Lola, nne nu bana banakasilwe na Yehowa, tuli tulolesio nu miganogano ku baIsraeli,a bikutuka ku Yehowa, Mwiya Mayombo ukwikalaga ku mwiduko wa Sayuni. 19 Nkungu zibakukubula bunee: “Londa misagu ku baganga nu ku bagila bakulila anga tuzoni nu kutonga,” ndi bantu tabanalonda musagu ku Kalaga wabo? Ndi banabuzia ku bantu bakule ku kabamba ka bantu beli na kalamo?
20 Ku ikakizio nu bulongeki; ndi tabakutenda bulingilingi na kitondo kikino, nti takuli kyengi mubeli. 21 Batingetinge mu kisi, bakutwe nunsania nu kukua na nzala, nu gabakue na nzala, bakongoa nu bagalamine kwigulu kuswilila mukota wabo nu Kalaga wabo. 22 Bakalola ku kisi, tubebe nu kapilo, kyengi kikasigulila ku kabamba ka mbabazio nu bakeimbibwa mu kapilo kanene.