Makengelo ma mwakali.
3
1 Ga mugu wane mu kindi nalondile wozo u nkutunda, tondo nsyamumonine. 2 Natendile bunee: “Nazanzuke kano kaluma kutimba mwino, kulonda wozo u nkutunda mu makano. Namulondile tondo nsyamumonineko.” 3 Balangi ba mwino bansangile, nababwide bunee: “Ndi mwamona ku wozo u nkutunda?” 4 Ganabasile, nkungu nkeke tugu nasangile wozo mutundwa wane, namukatile, nsyamusigile. Namusondelezizie ku numba za mmane, ku busio bwa wozo wambutile. 5 Bakinga ba ku Yerusalema, nkumusengezia: tamuyukye, aba kuzanzula lutundo aaba nu galwabe lusoga, anga mubale na kangolo Kwenda kwa Mwakali.
6 Nazi wabakama kutuka kalula anga kimpa kya muuki, wabongibwa bulago nu aliga nsoga zasambikwa na bulago bwa bakunzi? 7 Lolazi kipoyo kya Solomono kyatimbwa na bakoloboyo makumi mutuba, u mapuka ma baIsraeli. 8 Nawe nawe akatile mwene, nu beli mapuka ma bita, na muntu na muntu na mwene wage, ku kabamba ka boba mu kindi. 9 Mukota Solomono eikitide kipoyo na miti za Lebanoni. 10 Akitile mango makyo na feza, gansi gakyo na olo, nu kisumbi kyakyo na nsulu z'idangi lya bukota. Akikukide na malebo masoga, makitilwe na bakinga ba ku Yerusalema ku lutundo lwabo. 11 Inyuwe bakinga ba ku Sayuni, basazi, mulole Mukota Solomono, nu nkumbu zamuvwalikizie nina busi bw'isonga lyage, u busi bwa mbogimbogi za mutima wage.