2
1 Nili anga iduba lya Saroni, u iduba lya mpinga. 2 Anga iduba munkatini mwa mikele u buli mutundwa wane munkatini mwa bakinga.
3 Anga buli muti wa biguma munkatini mwa miti za mu lubanda u buli mutundwa wane munkatini mwa basikila. Nabogaboga kwikala mu kilimelime kyage, nu biguma byage byabezaga nse mu kanua kane. 4 Anekile ku numba zage za kisagulo. Lutundo u luli ibendela lyage kundi. 5 Munnikutie na biguma bya mizabibu, Nkase lingo magala na biguma bya mapela; kubuno nili na lusambo ku kabamba ka lutundo. 6 Kuboko kwage kwa seikazi kuli kunsi kw'itoe lyane, nu kuboko kwage kwa seidume kwankumbatila. 7 Inyuwe bakinga ba ku Yerusalema, nkumusengezia buno tamuyukye aba kuzanzula lutundo aaba nu nkungu zalo, anga mubale nu kangolo.
8 Nkungwa ku iyuki lya mutundwa wane! Ntukumona! Akuvwa, akubakama ga mwiduko nu kusuluka nkangamo. 9 Mutundwa wane asusania mubale aba kangolo. Ntukumona! Emana kumbusa kwa kitutu, akulola g'idilisa nu ga tumpyengenge twa lwibi. 10 Mutundwa wane atenda nu ambula bunee: “Mutundwa, u mbangilwa zane, zanzuka twende. 11 Ntukumona, mpego zasila, nu mbula zumbuka. 12 Maluba makwasa mu kisi, nkungu za lwimbo lwa tuzoni zabasa, iyuki lya nkulimba lyungubwa ko mu kisi kyeitu. 13 Mutini ukukolama biguma byago, mizigi za biguma zikulusia nsunu zago. Mutundwa wane, mbangilwa, zanzuka twende.”
14 Ee, nkulimba zane zili mu matengu ma kalimba, matingilo ma biziki bya kubakama. Nilole kilungi kyobe, nu nungwe ku iyuki lyobe; kubuno iyuki lyobe lili lisoga, nu kilungi kyobe kili kisoga nunse. 15 Tukatilazi mikala, u mikala mikeke zikwita masoa meitu ma biguma, kubuno masoa meitu ma biguma makukolama maluba.