Mutali wa bulili nu bwagi.
11
1 Yehowa asomba bilindiko bya bwengelezi, tondo bilindiko bya bulili byamutananizia. 2 Gavwe lwikotio, nsoni nuzo nti zabasa, tondo menge meli ku babo beibotya.
3 Bulili bwa beisanana bwabasondelezie, tondo bubi bwa babo beli bengelezi bwabababazie.
4 Bugumi tabuli na mutali ku busi bwa bongoa bwa Kalaga, tondo kwisanana ukonagia ku lukuo.
5 Kwisanana kwa wasililila kwamusondelezie mu nzila nsoga, tondo mwiya bwagi akue wenyene.
6 Kwisanana kwa beisanana kukubonia, tondo beiya bwagi bakukatwa mu mibi zabo.
7 Kungwa mwagi akua nti kilemanizio kyage kyazinde, nu kilemanizio kya bagi nti kyazimina.
8 Wisanana akonibwa ku kabebe na Kalaga, nu mubi nti abikwa ga kiziki kyage.
9 Kanua ka muntu mubi kakubigagia ungo, tondo bumenyinino bwa beisanana nti bukubonia.
10 Kungwa beisanana bakukita busoga, mwino nti wabogaboga, nu kungwa mubi akua, mwino nti wiyala na kulaluka kwa mbogimbogi.
11 Ku mponga za wisanana mwino nti walumbe, tondo kanua ka mubi kakugubigia.
12 Na wozo uteli na menge akubenga munyage, tondo mwiya menge atelekela.
13 Wozo ukutendatenda ntakubisa kakungu, tondo wozo uli na mutima wa bukatizio akulanga bitondo.
14 Kungwa kilongo takili na basunguzi, nti bantu bakyo bagoe, tondo bwingi bwa basunguzi bukulusagia lonio.
15 Wozo ukuliga mwima wa mugeni ababazibwe, tondo wozo ukunana kuliga mwima wage abe na bubobelelo.
16 Mukikulu wa lwanzo akuganunagwa, tondo bantu babibu bakumona bikulo tugu.
17 Muntu wa kyombo akwikitila busoga, tondo wozo mukali akukutia mubili wage tugu.
18 Muntu mubi akukitaga misako za bwengelezi, tondo wozo ukukita bwisanana abe na mutali musoga.
19 Wozo ukukita bwisanana akaba na kalamo, nu wozo ukutunda bubi kankanka akwidondela lukuo lwage tugu;
20 Na wozo uli na mutima wa myango nti ntatananizia Yehowa, tondo babo beisanana mu nzila zabo bakubogelabogela Yehowa.
21 Lebelebe bagi ndi bagomanizie mu bubi, nti tabeibembukye na lusungio, tondo ibuta lya beisanana likonibwa.
22 Kungwa mukikulu eli mbangilwa, tondo nteli na misako misoga, nti eli anga kakomu ka olo kabikwa ku mwembe wa ngulube.
23 Kusombola kwa wisanana kuli kusoga nunse, tondo kilemanizio kya mubi kili tugu bongoa.
24 Kuli wozo ukubalangania nu nti itila ku bikulo, tondo wozo ukukunga bikulo bukali azambe.
25 Kalamo ka wozo ukukasana kabe kasoga, nu wozo ukukita mponga akaswe mponga.
26 Wozo ukwimanaga ku ngano nti alingwe na bantu, tondo mponga zitila ku wozo ukuzikunzia.
27 Wozo ukulonda busoga nu menge na komanizia nti akwilwe kyombo, tondo wozo ukulonda bubi nti bubi bwamubasile.
28 Na wozo ukulemanina iguma lyage nti agoe, tondo wozo wisanana abe anga nsamba mbisi.
29 Wozo ukusungia numba zage nti akapiena lumpumpu, nu kikongolo abe mukobe wa mwiya menge.
30 Kiguma kya wisanana kili muti wa kalamo, nu wozo ukutulaga mitima za bantu eli na menge.
31 Ndi wisanana akuligwa mu kisi, embe lino babi nu bagi.