Kuganuna Kalaga ku bulangi bwage.
147
1 Ganunazi Yehowa! Kubuno buli busoga kwimbila Kalaga weitu.
Kubuno buli mbogimbogi nunse kuganuna.
2 Yehowa akobaka Yerusalema.
Akundamania baIsraeli babalanganizibwe.
3 Akonia babo babezaga na kabebe mu mutima,
Nu akusakila byulu byabo.
4 Eizi maganzo ma nkeninkeni,
Akumana insania mu meina mazo.
5 Yehowa weitu eli munene nu bwangato bwage buli bunene,
Bumenyinino bwage tabuli na kuzinda.
6 Yehowa akusakika bantu bola,
Nu bantu babi akubagusia gansi.
7 Imbilazi Yehowa na mbogimbogi,
Imbilazi Kalaga weitu na kindanda kya nti ikumi.
8 Akubika bimpa mwigulu,
Nu akulongekela kisi mbula,
Akwasia bisugu gantata ga miduko.
9 Akukasa nyama idia lyazo,
Nu ku bana ba kibombobombo bakulila.
10 Ntakubogaboga na magala ma farasi,
Aba ntakutananizibwa na bupuka bwa bantu.
11 Yehowa akutananizibwa na babo bakumwanza,
Nu na babo bakulemanina kyombo kyage.
12 Ee Yerusalema, ganunazi Yehowa!
Ee Sayuni, ganuna Kalaga wobe!
13 Kubuno akokomezizie mitandulwa za nibi zobe,
Nu abikile mponga ku bana beli munda mwobe.
14 Abikile bubobelelo mu myaga zobe,
Akukwikutia na ngano nsoga.
15 Akusinga ikakizio lyage mu kisi.
Idagi lyage likwenda lubilo nunse.
16 Akulokya teluji anga myoza za mikoko,
Akukubula bususuli bwage anga lwito.
17 Akutogia bususuli bwage anga mbula za lubula,
Nazi unavwama kwikalila mpego zage?
18 Akusinga ikakizio lyage nu kubinyengula,
Akupupia lumpumpu lwage nu mazi makugela.
19 Akusambalila Yakobo idagi lyage,
Nu baIsraeli milembe zage nu makakizio mage.
20 Ntakitide bingo bilongo bitondo bibino,
Aba bingo bilongo tabyamenyine makakizio mage.
Ganunazi Yehowa.