YOBU
Yobu nu kikanga kyage
1
1 Mu kisi kya Uzi mwabezaga muntu umozi, izina lyage Yobu. Abezaga asililila nu eisanana; asombaga bwagi nu akuaga Kalaga boba. 2 Abezaga na basikila mutubakamo nu bakinga basatu. 3 Lingo abezaga na bakiti beingi, nu bituganwa bibino: mikoko tununu mutubakamo, nu ngamia tununu tusatu, nu ngombe zikukita mulimo bibombo nkama itano, nu mabuti ma mpunda nkama itano. Ububo wono muntu abezaga munene kutinga bango bansania ba ku lulenge lwa kukutukaga kisongo kya busi. 4 Babo bana bage bamulume mutubakamo bakitilaga bisagulo mu numba zabo, nawe nawe na bwage busi. Basingile kumana babitu babo basatu, kulia nu kunua gamozi nabo. 5 Nu gasilile bindi bya bisagulo, Yobu ayukile lukesikesi kukita kisansa ku mwana na mwana, buno abengie. Yobu atendile bunee: “Embe bana bane bagile nu kulinga Kalaga mu mitima zabo.” Bubo u bwakitaga Yobu kankanka.
Kwisanana kwa Yobu
6 Busi bumozi banzelo ba Yehowa bavule kwemana lwabusio lwa Yehowa, nu we Satana avule kwemana gamozi nabo. 7 Yehowa abuzizie Satana bunee: “Ukutuka kuni?”
Satana amwakwide bunee: “Nkutuka mu kutimbatimba nu kutabanga mu kisi.”
8 Lingo Yehowa abuzizie Satana bunee: “Ndi wamonine ku mukiti wane Yobu, buno takuli ungo mu kisi anga we? Eli wasililila nu wisanana; akusomba bwagi nu kukua Kalaga boba.”
9 Satana akwide Yehowa bunee: “Ndi Yobu akukua Kalaga boba buliabulia? 10 Ndi ntukumulanga, we nu numba zage nu binsania byage, na mukolo ku ntungo insania? Wakasile mponga ku milimo zage nu kutalikila bikulo byage mu kisi. 11 Tondo ndi walambya kuboko nu kubigia byage, anakwililika.”
12 Yehowa abwide Satana bunee: “Kasi, binsania byage bili ku maboko mobe. Tugu ntubike kuboko kwobe kweli wenyene.” Ububo Satana atukile lwabusio lwa Yehowa.
Tubebe twa Yobu
13 Busi bumozi, bana bage basikila nu bakinga babezaga mu numba z'iselenzibo kulia nu kunua. 14 Mugenzi avule ku Yobu kumubula bunee: “Ngombe zabezaga zikukita mulimo mu isoa, nu mpunda zaliaga bwigi nazo; 15 baSabea bavule nu kwita bakiti bansania na mwene nu kunyaga bituganwa binsania, nu nne tugu u wonine buno nikuvwile na musagu.”
16 Gaabezaga eki atenda, ungo avule nu amutendile bunee: “Keiya ka Kalaga katukile kwigulu nu kuzikya bakiti bansania nu mikoko insania, nu nnenyene nonine buno nivwe kukusambalila musagu.”
17 Gabezaga wozo ungo eki atenda, kwavule ungo nu atendile bunee: “BaKaldea bavule bibombo bisatu nu kunyaga ngamia insania, nu beitile bakiti bansania na myene, nu nnenyene nonine buno nivwe kukusambalila musagu.”
18 Gabezaga wozo ungo eki atenda, kwavule ungo nu atendile bunee: “Bana bobe bamulume nu bamukazi gababezaga bakulia nu kunua mu numba z'iselenzibo, 19 kitangalabesi kisoa kinene kyavule ku lulenge lwa kalula nu kyagusizie numba. Bana bobe bakule, nu nnenyene tugu u wonine kuvwa kukusambalila.”
20 Yobu emanukile, nu ku kabamba ka kabebe, atile nsulu zage, eibegile, nu agwede bukukama gansi, 21 akumbaminne nu atendile bunee: “Nabutilwe mundulu nu nasubye geteli kampa. Yehowa u wankasile, nu Kalaga u watola lingo. Izina lya Yehowa liganunwe.” 22 Mu bitondo bibyo binsania, Yobu ntagile aba ntatendile kitondo kibi ku Yehowa.
Mango malindiko makali ma Yobu